Wanindu Hasaranga Marriage: ಆ ವಿಚಾರವನ್ನು ಗೌಪ್ಯವಾಗಿಟ್ಟು ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಆರ್​ಸಿಬಿ ಸ್ಟಾರ್​ ಆಟಗಾರ; ಫೋಟೋಸ್ ವೈರಲ್​​​!

ಶ್ರೀಲಂಕಾ ಕ್ರಿಕೆಟಿಗ ವನಿಂದು ಹಸರಂಗ ತಮ್ಮ ಜೀವನದಲ್ಲಿ ಹೊಸ ಇನ್ನಿಂಗ್ಸ್​​ ಆರಂಭಿಸಿದ್ದಾರೆ. ವಿಂಧ್ಯಾ ಎಂಬ ಯುವತಿಯೊಂದಿಗೆ ಮದುವೆಯಾಗುವ ಮೂಲಕ ಹಸರಂಗ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ಆಪ್ತ ಸ್ನೇಹಿತರು ಹಾಗೂ ಕುಟುಂಬ ಸದಸ್ಯರ ಸಮ್ಮುಖದಲ್ಲಿ ಗುರುವಾರ ವನಿಂದು ಹಸರಂಗ ಹಾಗೂ ವಿಂಧ್ಯಾ ಜೋಡಿಯ ಮದುವೆ ಕಾರ್ಯಕ್ರಮ ಅದ್ಧೂರಿಯಾಗಿ ನಡೆದಿದೆ. ಅಂದಹಾಗೆ, ವಿಂಧ್ಯಾ ಅವರನ್ನು ಹಸರಂಗ ಪ್ರೀತಿಸಿ ಮದುವೆಯಾಗಿದ್ದು, ಆದರೆ ಈ ವಿಚಾರ ಮದುವೆಗೂ ಮುನ್ನ ಎಲ್ಲಿಯೂ ಬಹಿರಂಗ ಆಗದಂತೆ ನೋಡಿಕೊಂಡಿದ್ದರು.

ತಮ್ಮ ವಿವಾಹ ಕಾರ್ಯಕ್ರಮದ ಫೋಟೋಗಳನ್ನು ಆರ್​​ಸಿಬಿ ಆಲ್​ರೌಂಡರ್​ ಸಾಮಾಜಿಕ ಜಾಲತಾಣದಲ್ಲಿ ಶೇರ್​ ಮಾಡಿದ್ದು, ಸಖತ್ ವೈರಲ್​ ಆಗುತ್ತಿದೆ. ಜೋಡಿ ತುಂಬಾ ಚೆನ್ನಾಗಿದೆ ಅಂತ ಅಭಿಮಾನಿಗಳು ಕಾಮೆಂಟ್ ಮಾಡಿ ನೂತನ ದಂಪತಿಗೆ ಶುಭ ಕೋರುತ್ತಿದ್ದಾರೆ.

ಶ್ರೀಲಂಕಾ ತಂಡ ಸದ್ಯ ನ್ಯೂಜಿಲೆಂಡ್​ ಪ್ರವಾಸದಲ್ಲಿ ಬ್ಯುಸಿಯಾಗಿದೆ. ಟೆಸ್ಟ್​, ಏಕದಿನ ಹಾಗೂ ಟಿ20 ಸರಣಿ ಆಡಲು ಲಂಕಾ ಆಟಗಾರರು ನ್ಯೂಜಿಲೆಂಡ್​ಗೆ ತೆರಳಿದ್ದಾರೆ. ಇತ್ತ ಮದುವೆ ಕಾರ್ಯಕ್ರಮದ ಹಿನ್ನೆಲೆಯಲ್ಲಿ ಹಸರಂಗ ಟೆಸ್ಟ್​ ಟೂರ್ನಿಯಿಂದ ದೂರವಾಗಿದ್ದಾರೆ.

ಇನ್ನು, ನ್ಯೂಜಿಲೆಂಡ್ ವಿರುದ್ಧದ ಸಿಮೀತ ಓವರ್​ಗಳ ಸರಣಿ ಆರಂಭವಾಗುವ ವೇಳೆಗೆ ಹಸರಂಗ ತಂಡವನ್ನು ಸೇರ್ಪಡೆಯಾಗುವ ಸಾಧ್ಯತೆ ಇದೆ. ಮಾರ್ಚ್​ 9ರಿಂದ ಶ್ರೀಲಂಕಾ-ನ್ಯೂಜಿಲೆಂಡ್​ ಟೆಸ್ಟ್​ ಸರಣಿ ಆರಂಭವಾಗಲಿದೆ.

ಉಳಿದಂತೆ ಮಾರ್ಚ್​25 ರಿಂದ 31ರ ವರೆಗೂ ಮೂರು ಏಕದಿನ ಪಂದ್ಯ, ಏಪ್ರಿಲ್​ 2ರಿಂದ 8ರ ಅವಧಿಯಲ್ಲಿ ಮೂರು ಟಿ20 ಪಂದ್ಯಗಳು ಜರುಗಲಿದೆ. ಇನ್ನು, ಹಸರಂಗ ಐಪಿಎಲ್​ನಲ್ಲಿ ಆರ್​ಸಿಬಿ ತಂಡದ ಪರ ಆಡುತ್ತಿದ್ದು, 2023ರ ಟೂರ್ನಿಗೆ ತಂಡದಲ್ಲಿ ಪ್ರಮುಖ ಆಟಗಾರರಾಗಿದ್ದಾರೆ.

25 ವರ್ಷದ ಹಸರಂಗ ಶ್ರೀಲಂಕಾ ಪರ ಜಿಂಬಾಬ್ವೆ ವಿರುದ್ಧ ಏಕದಿನ ಪಂದ್ಯದಲ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್​​ಗೆ ಪಾದಾರ್ಪಣೆ ಮಾಡಿದ್ದರು. ಇದುವರೆಗೂ 4 ಟೆಸ್ಟ್​, 37 ಏಕದಿನ ಹಾಗೂ 55 ಟಿ20 ಪಂದ್ಯಗಳನ್ನು ಹಸರಂಗ ಆಡಿದ್ದಾರೆ.

ಟೆಸ್ಟ್​​ನಲ್ಲಿ 196 ರನ್​​ ಗಳಿಸಿ 4 ವಿಕೆಟ್​ ಪಡೆದುಕೊಂಡಿದ್ದಾರೆ. ಏಕದಿನ ಮಾದರಿಯಲ್ಲಿ 710 ರನ್ ಗಳಿಸಿ, 39 ವಿಕೆಟ್​ ಕಬಳಿಸಿದ್ದಾರೆ. ಟಿ ಮಾದರಿಯಲ್ಲಿ 503 ರನ್​​ಗಳೊಂದಿಗೆ 89 ವಿಕೆಟ್​ ಉರುಳಿಸಿದ್ದಾರೆ. ಐಪಿಎಲ್​​ನಲ್ಲಿ 18 ಪಂದ್ಯಗಳನ್ನು ಆಡಿದ್ದು, 39 ರನ್​​ ಗಳೊಂದಿಗೆ 26 ವಿಕೆಟ್​ ಪಡೆದು ಮಿಂಚಿದ್ದಾರೆ.