MS Dhoni: ಗಾಯದ ನಡುವೆ ಕೊನೆವರೆಗೂ ಧೋನಿ ಹೋರಾಟ, ನಿಮ್ಮಂತೆ ಆಡೋರು ಮತ್ಯಾರಿಲ್ಲ ಎಂದ ಫ್ಯಾನ್ಸ್!

ಮಹೇಂದ್ರ ಸಿಂಗ್ ಧೋನಿ ಇತ್ತೀಚಿನ ದಿನಗಳಲ್ಲಿ ಮೊಣಕಾಲಿನ ನೋವಿನಿಂದ ಬಳಲುತ್ತಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಕೋಚ್ ಸ್ಟೀಫನ್ ಫ್ಲೆಮಿಂಗ್ ಅವರಿಂದ ಈ ಮಾಹಿತಿ ಹೊರಬಿದ್ದಿದೆ. ವಿಶೇಷವೆಂದರೆ ಗಾಯದ ನಡುವೆಯೂ ರಾಜಸ್ಥಾನ್ ರಾಯಲ್ಸ್ ವಿರುದ್ಧದ ಪಂದ್ಯದ ವೇಳೆ ಕೊನೆಯವರೆಗೂ ಹೋರಾಡಿದರು.

ಮಹಿ ಕೊನೆಯವರೆಗೂ ಆಡಿದರೂ ಚೆನ್ನೈ ತಂಡ ಮೂರು ರನ್ ಗಳಿಂದ ಸೋಲನ್ನಪ್ಪಿತು. ಚೆಪಾಕ್ ಸ್ಟೇಡಿಯಂನಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ ಮತ್ತೊಂದು ಆಘಾತವಾಗಿದ್ದು ವೇಗದ ಬೌಲರ್ ಸಿಸಂದ ಮಂಗಳ ಗಾಯಗೊಂಡು ಒಂದು ವಾರ ಟೂರ್ನಿಯಿಂದ ಹೊರಗುಳಿದಿದ್ದಾರೆ.

ಧೋನಿ ಮೊಣಕಾಲಿನ ಗಾಯದಿಂದ ಬಳಲುತ್ತಿದ್ದಾರೆ. ಅದನ್ನು ಅವರ ಕೆಲವು ಚಲನವಲನಗಳಲ್ಲಿ ನೋಡಬಹುದು ಎಂದು ಫ್ಲೆಮಿಂಗ್ ಹೇಳಿದ್ದಾರೆ. ಇದರಿಂದ ಅವರಿಗೆ ಸ್ವಲ್ಪ ತೊಂದರೆಯಾಗುತ್ತಿದೆ. ಅವರ ಫಿಟ್ನೆಸ್ ವೃತ್ತಿಪರ ಆಟಗಾರನಂತೆಯೇ ಇದೆ.

ಪಂದ್ಯಾವಳಿ ಪ್ರಾರಂಭವಾಗುವ ಹಲವು ತಿಂಗಳುಗಳ ಮೊದಲು ಅವರು ಸಿದ್ಧತೆಗಳನ್ನು ಪ್ರಾರಂಭಿಸಿದ್ದರು. ಆ ಸಮಯದಲ್ಲಿಯೂ ಅವರು ಮೊಣಕಾಲಿನ ಸಮಸ್ಯೆಯಿಂದ ಬಳಲುತ್ತಿದ್ದರು. ಅದು ಈಗಲೂ ಅವರನ್ನು ಕಾಡುತ್ತಿದೆ. ಆದರೂ ಅವರು ಪ್ರತಿ ಪಂದ್ಯದಲ್ಲಿಯೂ ಅದ್ಭುತವಾಗಿ ಆಟವಾಡುತ್ತಿದ್ದಾರೆ. ಸದ್ಯ ಧೋನಿಗೆ 41 ವರ್ಷ ವಯಸ್ಸಾಗಿದೆ.

ಧೋನಿ ಗಾಯದ ಕುರಿತು ಮಾತನಾಡಿರುವ ಮಾಜಿ ಆಸ್ಟ್ರೇಲಿಯನ್ ಬ್ಯಾಟರ್ ಮ್ಯಾಥ್ಯೂ ಹೇಡನ್, ಧೋನಿ ಕುಂಟುತ್ತಿರುವುದು ಅವರಲ್ಲಿನ ಮೊಣಕಾಲಿನ ಸಮಸ್ಯೆ ಎಂದು ಕಾಣುತ್ತಿದೆ. 41 ವರ್ಷದ ವಿಕೆಟ್‌ ಕೀಪರ್ ಸಾಮಾನ್ಯವಾಗಿ 22 ಯಾರ್ಡ್‌ ನಡುವೆ ತುಂಬಾ ವೇಗವಾಗಿರುತ್ತಾರೆ. ಆದರೆ ಅದು ರಾಜಸ್ಥಾನ ರಾಯಲ್ಸ್ ವಿರುದ್ಧ ಕಾಣಲಿಲ್ಲ ಎಂದು ಹೇಳಿದ್ದಾರೆ.

ಪಂದ್ಯದ ವೇಳೆ ಧೋನಿ ಸಾಕಷ್ಟು ಕುಂಟುತ್ತಿರುವುದನ್ನು ನಾವು ನೋಡಿದ್ದೇವೆ. ಅವರ ಆಟ ಉತ್ತಮವಾಗಿದೆ. ಆದರೆ ಅವರ ಗಾಯದ ಬಗ್ಗೆ ಧೋನಿ ಉತ್ತರಿಸಬೇಕಿದೆ. ವೈದ್ಯಕೀಯ ಸಲಹೆಯನ್ನು ಅವರು ಪಡೆಯುತ್ತಾರೆ ಎಂದು ನನಗೆ ಖಾತ್ರಿಯಿದೆ ಎಂದು ಹೇಳಿದ್ದಾರೆ.

ಇನ್ನು, ಚೆನ್ನೈ ತಂಡದ ಪರ ಧೋನಿ ಬ್ಯಾಟಿಂಗ್​ಗೆ ಆಗಮಿಸುವಾಗ ಐಪಿಎಲ್​ 2023ರ ಲೈವ್​ ಸ್ಟ್ರೀಮಿಂಗ್​ನ್ನು ಜಿಯೋ ಸಿನಿಮಾದಲ್ಲಿ 1.5 ಕೋಟಿ ವೀಕ್ಷಣೆ ಪಡೆಯುತ್ತಿತ್ತು. ಧೋನಿ ಕ್ರೀಸ್​ಗೆ ಬಂದ ನಂತರ ಅದರಲ್ಲಿಯೂ ಕೊನೆಯ 20 ಓವರ್​ ವೇಳೆಗೆ ಈ ವೀಕ್ಷಣೆ ಬರೋಬ್ಬರಿ 2.2 ಕೋಟಿಗೆ ತಲುಪುವ ಮೂಲಕ ಈ ಸೀಸನ್​ನಲ್ಲಿ ಅತಿ ಹೆಚ್ಚು ವೀಕ್ಷಣೆ ಪಡೆದ ಪಂದ್ಯ ಎಂಬ ದಾಖಲೆ ನಿರ್ಮಿಸಿದೆ.