IPL 2023: ಚೆನ್ನೈ ತಂಡದ ಮುಂದಿನ ನಾಯಕ ಯಾರು? ಸುಳಿವು ನೀಡಿದ ಮೈಕಲ್ ಹಸ್ಸಿ

ಮುಂದಿನ ವರ್ಷದ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಸೀಸನ್‌ಗಾಗಿ ಡಿಸೆಂಬರ್ 23 ರಂದು ಮಿನಿ ಹರಾಜು ನಡೆಯಲಿದೆ ಎಂದು ತಿಳಿದಿದೆ. ಈ ಹರಾಜಿನಲ್ಲಿ ಈಗಾಗಲೇ 911 ಆಟಗಾರರು ತಮ್ಮ ಹೆಸರನ್ನು ನೋಂದಾಯಿಸಿಕೊಂಡಿದ್ದಾರೆ.

ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್ ನಂತರ ಚೆನ್ನೈ ಸೂಪರ್ ಕಿಂಗ್ಸ್ ಅತ್ಯಂತ ಯಶಸ್ವಿ ತಂಡವಾಗಿದೆ. ಧೋನಿ ನಾಯಕತ್ವದಲ್ಲಿ ಸಿಎಸ್​ಕೆ ತಂಡ ಈವರೆಗೆ ಬರೋಬ್ಬರಿ 4 ಬಾರಿ ಪ್ರಶಸ್ತಿ ಗೆದ್ದಿದೆ.

ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಯಶಸ್ಸಿನಲ್ಲಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರ ಪಾತ್ರ ದೊಡ್ಡದು. ಧೋನಿ ಮೊದಲಿನಿಂದ ಇಲ್ಲಿಯವರೆಗೂ ಚೆನ್ನೈ ಜೊತೆಯಲ್ಲಿಯೇ ಇದ್ದಾರೆ. ಧೋನಿಗೆ ಸದ್ಯ 41 ವರ್ಷ. ಈ ಕ್ರಮದಲ್ಲಿ 2023ರ ಐಪಿಎಲ್ ಧೋನಿಗೆ ಕೊನೆಯ ಐಪಿಎಲ್​ ಆಗಲಿದೆ.

ಈ ಕ್ರಮದಲ್ಲಿ ಧೋನಿ ನಂತರ ಚೆನ್ನೈಯನ್ನು ಮುನ್ನಡೆಸುವ ನಾಯಕನ್ನು ಪ್ರಾಂಚೈಸಿ ಈಗಾಗಲೇ ಹುಡುಕಾಡುತ್ತಿದೆ. 2022ರ ಐಪಿಎಲ್‌ನಲ್ಲಿ ರವೀಂದ್ರ ಜಡೇಜಾ ಕೂಡ ನಾಯಕರಾಗಿ ಪರೀಕ್ಷೆಗೆ ಒಳಪಟ್ಟಿದ್ದಾರೆ. ಆದರೆ, ಅದರಲ್ಲಿ ಜಡೇಜಾ ಸಂಪೂರ್ಣ ವಿಫಲರಾದರು.

ಐಪಿಎಲ್‌ 2022ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದಿಂದ ಜಡೇಜಾ ಅವರನ್ನು ಮೊದಲು ನಾಯಕರನ್ನಾಗಿ ನೇಮಿಸಲಾಯಿತು. ಆದರೆ ನಾಯಕನಾಗಿ ಜಡೇಜಾ ವಿಫಲರಾದರು. ಹೀಗಾಗಿ ಅವರನ್ನು ಮಧ್ಯದಲ್ಲಿ ಬಿಟ್ಟು ನಾಯಕತ್ವದ ಜವಾಬ್ದಾರಿಯನ್ನು ಧೋನಿಗೆ ವಹಿಸಲಾಗಿತ್ತು.

ಆದರೆ 2023ರಲ್ಲಿ ಧೋನಿ ನಾಯಕರಾಗುತ್ತಾರಾ? ಅಥವಾ ಮತ್ತೊಬ್ಬ ಆಟಗಾರನನ್ನು ನಾಯಕನನ್ನಾಗಿ ನೇಮಿಸಲಾಗುತ್ತದೆಯೇ? ಎಂಬ ವಿಷಯದ ಬಗ್ಗೆ ಸುದ್ದಿ ಹರಿದಾಡುತ್ತಿದೆ. ಧೊನಿ ಮಾರ್ಗದರ್ಶನದಲ್ಲಿ ಚೆನ್ನೈ ಈ ಬಾರಿಯಿಂದಲೇ ಹೊಸ ನಾಯಕನನ್ನು ಆಯ್ಕೆ ಮಾಡಿದರೆ ಉತ್ತಮ ಎಂದು ಫ್ರಾಂಚೈಸಿ ಅಭಿಪ್ರಾಯಪಟ್ಟಿದೆ ಎಂದು ವರದಿಯಾಗಿದೆ.

ಈ ಕ್ರಮದಲ್ಲಿ ಮುಂದಿನ ವರ್ಷ ಐಪಿಎಲ್ ನಲ್ಲಿ ಧೋನಿ ಹೊರತಾಗಿ ಮತ್ತೊಬ್ಬ ಯುವ ಆಟಗಾರ ಚೆನ್ನೈ ತಂಡವನ್ನು ಮುನ್ನಡೆಸುವ ಸಾಧ್ಯತೆ ಇದೆ. ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ವಿಜಯ್ ಹಜಾರೆ ಏಕದಿನ ಟೂರ್ನಿಯಲ್ಲಿ ಮಹಾರಾಷ್ಟ್ರ ತಂಡವನ್ನು ಮುನ್ನಡೆಸಿದ್ದ ರುತುರಾಜ್ ಗಾಯಕ್ವಾಡ್ ಅವರಿಗೆ ಚೆನ್ನೈ ತಂಡದ ನಾಯಕತ್ವದ ಜವಾಬ್ದಾರಿಯನ್ನು ಹಸ್ತಾಂತರಿಸುವ ಸಾಧ್ಯತೆ ಇದೆ. ಅಲ್ಲದೇ ಗಾಯಕ್ವಾಡ್​ ಅವರನ್ನು ಪ್ರಾಂಚೈಸಿ ಆಯ್ಕೆ ಮಾಡುವ ಕುರಿತು ಮೈಕಲ್ ಹಸ್ಸಿ ಸಹ ಒಂದು ಸುಳಿವನ್ನು ನೀಡಿದ್ದಾರೆ.

ರುತುರಾಜ್ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಮಹಾರಾಷ್ಟ್ರವನ್ನು ಫೈನಲ್‌ಗೆ ಕರೆದೊಯ್ದರು. ನಾಯಕನಾಗಿದ್ದಾಗಲೇ ಶತಕ ಬಾರಿಸಿದ್ದರು. ಧೋನಿ ಉತ್ತರಾಧಿಕಾರಿಯಾಗಿ ರುತುರಾಜ್ ಅವರೇ ಸರಿಯಾದ ಆಯ್ಕೆ ಎಂಬ ಮಾತು ಕೇಳಿ ಬರುತ್ತಿದೆ. ಅದೇ ಸಮಯದಲ್ಲಿ, ಆಸ್ಟ್ರೇಲಿಯಾದ ಮಾಜಿ ಆಟಗಾರ ಮೈಕಲ್ ಹಸ್ಸಿ ಕೂಡ ನಾಯಕನಾಗಿ ರುತುರಾಜ್ ಸರಿಯಾದ ಆಯ್ಕೆ ಎಂದು ಪ್ರತಿಕ್ರಿಯಿಸಿದ್ದಾರೆ.