IPL 2023: ಸಾವಿರ ಪಂದ್ಯ, ಒಂದೇ ಭಾವನೆ; ಕ್ರಿಕೆಟ್​ ದಿಕ್ಕನ್ನೇ ಬದಲಿಸಿದ ಐಪಿಎಲ್, ನಿಮ್ಮ ಫೆವರೇಟ್​ ಟೀಂ ಯಾವ್ದು?

ಐಪಿಎಲ್ ಮತ್ತೊಂದು ಮೈಲಿಗಲ್ಲು ತಲುಪಿದೆ. ಇಂದು ಐಪಿಎಲ್​ನ 1000ನೇ ಪಂದ್ಯ ನಡೆಯಲಿದೆ. ಮುಂಬೈನ ವಾಂಖೆಡೆ ಸ್ಟೇಡಿಯಂ ಈ ಕಾರ್ಯಕ್ರಮಕ್ಕೆ ವೇದಿಕೆಯಾಗಿದೆ. ಮುಂಬೈ ಇಂಡಿಯನ್ಸ್ ಮತ್ತು ರಾಜಸ್ಥಾನ್ ರಾಯಲ್ಸ್ ಐತಿಹಾಸಿಕ ಕದನದಲ್ಲಿ ಮುಖಾಮುಖಿಯಾಗಲಿವೆ.

1000ನೇ ಪಂದ್ಯವನ್ನು ಗುರುತಿಸಲು ಬಿಸಿಸಿಐ ವಿಶೇಷ ಸಮಾರಂಭವನ್ನು ನಡೆಸಲಿದೆ. 15 ನಿಮಿಷಗಳ ಕಾರ್ಯಕ್ರಮದಲ್ಲಿ ಐಪಿಎಲ್ ಫ್ಲ್ಯಾಗ್ ಮಾರ್ಚ್ ನಡೆಯಲಿದೆ. ನಂತರ ಮಾಜಿ ಕ್ರಿಕೆಟಿಗ ಹಾಗೂ ಕಾಮೆಂಟೇಟರ್ ರವಿಶಾಸ್ತ್ರಿ ಮೈದಾನದಲ್ಲಿ ಕ್ರಿಕೆಟ್ ಅಭಿಮಾನಿಗಳನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ.

ಇದೇ ವೇಳೆ ಐಪಿಎಲ್​ ಕುರಿತು ಆಟಗಾರರ ಸಂದೇಶಗಳ ವೀಡಿಯೊಗಳನ್ನು ಪ್ಲೇ ಮಾಡುತ್ತಾರೆ. ನಂತರ ಬಿಸಿಸಿಐ ಪದಾಧಿಕಾರಿಗಳು ಮುಂಬೈ ಇಂಡಿಯನ್ಸ್-ರಾಜಸ್ಥಾನ್ ರಾಯಲ್ಸ್ ತಂಡಗಳ ನಾಯಕರಿಗೆ ಸ್ಮರಣಿಕೆಯನ್ನು ನೀಡಲಿದ್ದಾರೆ. ಅಂತಿಮವಾಗಿ ರಾಷ್ಟ್ರಗೀತೆಯನ್ನು ಹಾಡುವುದರೊಂದಿಗೆ ಸಮಾರಂಭವು ಕೊನೆಗೊಳ್ಳುತ್ತದೆ.

15 ವರ್ಷಗಳ ಹಿಂದೆ 2008ರಲ್ಲಿ ಲಲಿತಾ ಮೋದಿ ಐಪಿಎಲ್ ಎಂಬ ಟಿ20 ಲೀಗ್ ಅನ್ನು ವಿನ್ಯಾಸಗೊಳಿಸಿದ್ದರು. ಇದು ಕ್ರಿಕೆಟ್‌ನ ಸ್ವರೂಪವನ್ನೇ ಬದಲಿಸಿತು. ಆಟಗಾರರ ಜತೆಗೆ ಫ್ರಾಂಚೈಸಿಗಳು ಹಾಗೂ ಬಿಸಿಸಿಐಗೆ ಹಣದ ಸುರಿಮಳೆಯಾಯಿತು.

ಹಾರ್ದಿಕ್ ಪಾಂಡ್ಯ, ಬುಮ್ರಾ ಅವರಂತಹ ಆಟಗಾರರು ಭಾರತ ತಂಡಕ್ಕೆ ಬರಲು ಐಪಿಎಲ್ ನೆರವಾಗಿದೆ. ರಾಷ್ಟ್ರೀಯ ತಂಡದ ಗೆಲುವಿಗೆ ಐಪಿಎಲ್ ನೆರವಾಗಿದೆ. ಅಲ್ಲಿಯವರೆಗೂ ರಣಜಿಗಳನ್ನು ಮಾತ್ರ ಪ್ರತಿಭೆಯ ಅಳತೆಗೋಲು ಎಂದು ಪರಿಗಣಿಸಲಾಗುತ್ತಿತ್ತು.

ಐಪಿಎಲ್ ಆಗಮನದಿಂದ ದೃಶ್ಯ ಬದಲಾಗಿದೆ. ಟಿ20 ಪಂದ್ಯಗಳು ಹೆಚ್ಚೆಚ್ಚು ನಡೆಯುತ್ತಿರುವುದರಿಂದ ಐಪಿಎಲ್‌ನಲ್ಲಿ ಅತ್ಯುತ್ತಮವಾಗಿ ಆಡುವ ಮೂಲಕ ಯುವಕರು ರಾಷ್ಟ್ರೀಯ ತಂಡಕ್ಕೆ ಬರುತ್ತಿದ್ದಾರೆ.

ಯುವ ಆಟಗಾರರಿಗಷ್ಟೇ ಅಲ್ಲ, ರಾಷ್ಟ್ರೀಯ ತಂಡದಲ್ಲಿ ಸ್ಥಾನ ಕಳೆದುಕೊಂಡಿರುವ ಹಿರಿಯ ಆಟಗಾರರಿಗೂ ಈ ಲೀಗ್ ವರದಾನವಾಗಿ ಪರಿಣಮಿಸಿದೆ. ರಹಾನೆ ಇತ್ತೀಚೆಗೆ ಡಬ್ಲ್ಯುಟಿಸಿ ಫೈನಲ್‌ಗೆ ಆಯ್ಕೆಯಾಗಿದ್ದಾರೆ. ಕಳೆದ ವರ್ಷ ಟಿ20ಗೆ ದಿನೇಶ್ ಕಾರ್ತಿಕ್ ಮರು ಪ್ರವೇಶ ಮಾಡಿರುವುದು ಇದನ್ನು ಸ್ಪಷ್ಟಪಡಿಸುತ್ತದೆ.