IPL 2023: ವಿರಾಟ್​ ಕೊಹ್ಲಿ 6ನೇ ಶತಕ; ಇದರಲ್ಲಿ ಆರ್​ಸಿಬಿ ಗೆದ್ದಿದ್ದೆಷ್ಟು? ಸೋತಿದೆಷ್ಟು?

ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡದ ಆರಂಭಿಕ ಆಟಗಾರ ವಿರಾಟ್ ಕೊಹ್ಲಿ ಗುರುವಾರ ಹೈದರಾಬಾದ್ ವಿರುದ್ಧ ನಡೆದ ಪಂದ್ಯದಲ್ಲಿ ಶತಕ ಸಿಡಿಸಿ ಮಿಂಚಿಸಿದ್ದಾರೆ. 62 ಎಸೆತಗಳಲ್ಲಿ ವಿರಾಟ್ ಕೊಹ್ಲಿ ಶತಕ ಸಿಡಿಸಿದ್ದು, ಇದರೊಂದಿಗೆ ಐಪಿಎಲ್​ ನಲ್ಲಿ 6ನೇ ಶತಕ ಗಳಿಸಿದ್ದಾರೆ.

ವಿರಾಟ್ ಕೊಹ್ಲಿಗೂ ಮುನ್ನ ಐಪಿಎಲ್​ನಲ್ಲಿ ಅತೀ ಹೆಚ್ಚು ಶತಕ ದಾಖಲಿಸಿದ ಆಟಗಾರರ ಪಟ್ಟಿಯಲ್ಲಿ ಕ್ರಿಸ್ ಗೇಲ್​ ಮೊದಲ ಸ್ಥಾನ ಪಡೆದಿದ್ದರು. ಸದ್ಯ ಗೇಲ್ ದಾಖಲೆಯನ್ನು ಸಮ ಮಾಡಿರುವ ಕೊಹ್ಲಿ, ಜಂಟಿಯಾಗಿ ನಂಬರ್ ಸ್ಥಾನವನ್ನು ಪಡೆದುಕೊಂಡಿದ್ದಾರೆ.

ಐಪಿಎಲ್​ನಲ್ಲಿ ವಿರಾಟ್​ ಕೊಹ್ಲಿ ಇದುವರೆಗೂ 6 ಶತಕ ಸಿಡಿಸಿದ್ದು, ವಿಶೇಷ ಎಂದರೆ 2016 ಆವೃತ್ತಿಯೊಂದರಲ್ಲೇ ಕೊಹ್ಲಿ 4 ಶತಕ ಗಳಿಸಿದ್ದರು. 2016ರ ಏಪ್ರಿಲ್​ 24ರಂದು ಗುಜರಾತ್ ಲಯನ್ಸ್ ವಿರುದ್ಧ ಪಂದ್ಯದಲ್ಲಿ ಕೊಹ್ಲಿ 63 ಎಸೆತಗಳಲ್ಲಿ ಅಜೇಯ 100 ರನ್ ಗಳಿಸಿದ್ದರು. ಆದರೆ ಪುಣೆ ಪರ ಭರ್ಜರಿ ಬ್ಯಾಟಿಂಗ್ ಮಾಡಿದ್ದ ಮೆಕಲಮ್​, ದಿನೇಶ್ ಕಾರ್ತಿಕ್ ಆರ್​​ಸಿಬಿ ಸೋಲಿಗೆ ಕಾರಣವಾಗಿದ್ದರು.

ಬಳಿಕ 2016ರ ಮೇ 07 ರಂದು ಪುಣೆ ತಂಡದ ವಿರುದ್ಧ ಐಪಿಎಲ್​ನಲ್ಲಿ 2ನೇ ಶತಕ ಗಳಿಸಿದ್ದ ವಿರಾಟ್​ ಕೊಹ್ಲಿ ಅಜೇಯರಾಗಿ ಉಳಿಸಿದ್ದರು. ಈ ಪಂದ್ಯದಲ್ಲಿ ಆರ್​ಸಿಬಿ ಗೆಲುವು ಪಡೆದಿತ್ತು. ಇದಾದ ಒಂದು ವಾರದ ಬಳಿ ಮೇ 14ರಂದು ಗುಜರಾತ್ ಲಯನ್ಸ್ ವಿರುದ್ಧ 55 ಎಸೆತಗಳಲ್ಲಿ 109 ರನ್ ಸಿಡಿಸಿ ಕೊಹ್ಲಿ ಶತಕಗಳಿಸಿದ್ದರು. ಈ ಪಂದ್ಯದಲ್ಲಿ ಎಬಿ ಡೆವಿಲಿಯರ್ಸ್​ ಕೂಡ ಶತಕ ಗಳಿಸಿ ಮಿಂಚಿದ್ದರು.

2016ರ ಮೇ 18 ರಂದು ಬೆಂಗಳೂರಿನಲ್ಲಿ ನಡೆದ ಪಂದ್ಯದಲ್ಲಿ ಪಂಜಾಬ್ ವಿರುದ್ಧ ಮೊದಲ ಶತಕ ಸಿಡಿದ್ದರು. ಈ ಪಂದ್ಯದಲ್ಲಿ 113 ರನ್​ ಗಳಿಸಿದ್ದು ವಿರಾಟ್ ಕೊಹ್ಲಿ ಅವರ ಐಪಿಎಲ್ ಗರಿಷ್ಠ ಸ್ಕೋರ್ ಆಗಿದೆ. ಈ ಪಂದ್ಯದಲ್ಲಿ ಆರ್​ಸಿಬಿ ತಂಡ ಡಕ್ವರ್ಥ್ ಲೂಯಿಸ್ ನಿಯಮದ ಅನ್ವಯ 82 ರನ್​ಗಳಿಂದ ಜಯ ಗಳಿಸಿತ್ತು.

2016 ಬಳಿಕ 2019ರ ವರೆಗೂ ಕೊಹ್ಲಿ ರನ್ ಬರ ಎದುರಿಸಿದ್ದರು. ಕೋಲ್ಕತ್ತಾ ವಿರುದ್ಧ 2019 ಏಪ್ರಿಲ್​ 19 ರಂದು ನಡೆದಿದ್ದ ಪಂದ್ಯದಲ್ಲಿ ಕೊಹ್ಲಿ 58 ಎಸೆತಗಳಲ್ಲೇ ಶತಕ ಸಿಡಿಸಿ ಮಿಂಚಿದ್ದರು. ಈ ಪಂದ್ಯದಲ್ಲಿ 215 ರನ್​ ಗಳ ಟಾರ್ಗೆಟ್ ಬೆನ್ನಟ್ಟಿದ್ದ ಕೆಕೆಆರ್ 10 ರನ್​​ಗಳಿಂದ ಸೋಲು ಕಂಡಿತ್ತು.

2019 ಬಳಿಕ ಶತಕಗಳ ಬರ ಎದುರಿಸಿದ್ದ ಕೊಹ್ಲಿ, ಬರೋಬ್ಬರಿ 4 ವರ್ಷಗಳ ಬಳಿಕ ಮತ್ತೆ ಶತಕದ ಸಾಧನೆ ಮಾಡಿದ್ದಾರೆ. ಅಲ್ಲದೆ, 2022ರ ಏಷ್ಯಾ ಕಪ್​ ಬಳಿಕ ವಿರಾಟ್ ಕೊಹ್ಲಿ ಆಡಿದ ಎಲ್ಲಾ ಮಾದರಿಯ ಕ್ರಿಕೆಟ್​ನಲ್ಲೂ ಶತಕ ಬಾರಿಸಿ ಮಿಂಚಿಸಿದ್ದಾರೆ.