IPL 2023: ನಾಯಕ ಆಡಿದರೆ ತಂಡಕ್ಕೆ ನಷ್ಟವೇ ಹೆಚ್ಚಂತೆ! ಸಖತ್​ ಟ್ರೋಲ್​ ಆಗ್ತಿದ್ದಾರೆ ರಾಹುಲ್​

ಇಂಡಿಯನ್ ಪ್ರೀಮಿಯರ್ ಲೀಗ್ 2023 ಋತುವಿನ ಭಾಗವಾಗಿ, ಕಳೆದ ಶುಕ್ರವಾರ ನಡೆದ ಹೋರಾಟದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ದಾಖಲೆಯ ಆಟವಾಡಿದರು. ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಅವರು ಮೊದಲು ಬ್ಯಾಟ್ ಮಾಡಿ 257 ರನ್ ಗಳಿಸಿದರು.

ಇದು ಐಪಿಎಲ್ ಇತಿಹಾಸದಲ್ಲಿ ಎರಡನೇ ಗರಿಷ್ಠ ಸ್ಕೋರ್ ಆಗಿದೆ. ನಂತರ ಮೊತ್ತ ಬೆನ್ನಟ್ಟಿದ ಪಂಜಾಬ್ ಕಿಂಗ್ಸ್ 19.5 ಓವರ್‌ಗಳಲ್ಲಿ 201 ರನ್‌ಗಳಿಗೆ ಆಲೌಟಾಯಿತು. ಲಕ್ನೋ 56 ರನ್‌ಗಳಿಂದ ಗೆದ್ದಿತು.

ಈ ಪಂದ್ಯದ ನಂತರ ಕ್ರಿಕೆಟ್ ಅಭಿಮಾನಿಗಳು ಲಕ್ನೋ ನಾಯಕ ಕೆಎಲ್ ರಾಹುಲ್ ಮೇಲೆ ಸಾಕಷ್ಟು ಟ್ರೋಲ್​ ಮಾಡುತ್ತಿದ್ದಾರೆ. ಲಕ್ನೋ ಗೆದ್ದರೂ ರಾಹುಲ್‌ಗೆ ಯಾಕೆ ಟ್ರೋಲ್​ ಆಗುತ್ತಿದ್ದಾರೆ ಎಂಬ ಅನುಮಾನ ನಿಮಗೆ ಬರಬಹುದು. ಅದಕ್ಕೊಂದು ಕಾರಣವಿದೆ.

ಈ ಬಾರಿಯ ಐಪಿಎಲ್‌ನಲ್ಲಿ ಕೆಎಲ್ ರಾಹುಲ್ ಕಳಪೆ ಪ್ರದರ್ಶನ ನೀಡುತ್ತಿದ್ದಾರೆ. ಪ್ರಸಕ್ತ ಋತುವಿನಲ್ಲಿ ರನ್‌ಗಾಗಿ ಪರದಾಡುತ್ತಿದ್ದಾರೆ. ಕೆಲವು ಪಂದ್ಯಗಳಲ್ಲಿ ಅರ್ಧಶತಕಗಳನ್ನು ಗಳಿಸಿದ್ದರೂ, ಅವರು ಕಳಪೆ ಸ್ಟ್ರೈಕ್ ರೇಟ್ ಅನ್ನು ಮುಂದುವರೆಸಿದ್ದಾರೆ.

ಗುಜರಾತ್ ವಿರುದ್ಧದ ಪಂದ್ಯದಲ್ಲಿ ರಾಹುಲ್​ ನಿಧಾನಗತಿಯ ಬ್ಯಾಟಿಂಗ್​ನಿಂದ ಲಕ್ನೋ ಪಾಲಿತ ವಿಲನ್ ಆದರು. ಮೊದಲ ಓವರ್‌ನಿಂದ 19.2 ಓವರ್‌ಗಳವರೆಗೆ ಕ್ರೀಸ್‌ನಲ್ಲಿದ್ದ ರಾಹುಲ್ 61 ಎಸೆತಗಳಲ್ಲಿ 68 ರನ್ ಗಳಿಸಿ ಲಕ್ನೋ ಸೋಲಿಗೆ ಪರೋಕ್ಷ ಕಾರಣರಾದರು.

ಲಕ್ನೋವನ್ನು ಸೋಲಿಸಲು ಮೊದಲಿಗೆ ರಾಹುಲ್​ ಅವರನ್ನು ಔಟ್​ ಮಾಡಬಾರದು ಎಂಬ ಟ್ರೋಲ್​ಗಳೂ ಸಹ ಆಗುತ್ತಿದೆ. ಆದರೆ ಇತ್ತೀಚೆಗೆ ಪಂಜಾಬ್ ಕಿಂಗ್ಸ್ ವಿರುದ್ಧದ ಹೋರಾಟದಲ್ಲಿ ರಾಹುಲ್ ಬೇಗನೆ ಔಟಾದರು. ಇದರಿಂದಾಗಿ ಸ್ಟೊಯಿನಿಸ್, ಪೂರನ್ ಮತ್ತು ಬಡೋನಿಯಂತಹ ಆಟಗಾರರಿಗೆ ಅವಕಾಶ ಸಿಕ್ಕಿತು.

ಈ ಮೂರೂ ಅಬ್ಬರಿಸುತ್ತಿದ್ದಂತೆ ಲಕ್ನೋ ದಾಖಲೆಯ ಸ್ಕೋರ್ ಸಾಧಿಸಿತು. ಆರಂಭಿಕ ಆಟಗಾರ ಕೈಲ್ ಮೇಯರ್ಸ್ ಕೂಡ ಅರ್ಧಶತಕ ಬಾರಿಸಿದರು. ಈಗಲಾದರೂ ರಾಹುಲ್ ವೇಗವಾಗಿ ಆಡಲು ಪ್ರಯತ್ನಿಸಬೇಕು. ಆದರೆ ಇದಕ್ಕೂ ಮುಂಚಿನ ಪಂದ್ಯಗಳಲ್ಲಿನ ಅವರ ಆಟದಿಂದ ಈಗಲೂ ಸಖತ್​ ಟ್ರೋಲ್​ ಆಗುತ್ತಿದ್ದಾರೆ.