IPL 2022: ಐಪಿಎಲ್ ಇತಿಹಾಸದಲ್ಲಿ ಅತಿ ದೊಡ್ಡ ಸಿಕ್ಸರ್ ಸಿಡಿದವರು ಯಾರು? ಈ ಪಟ್ಟಿಯಲ್ಲಿದ್ದಾರೆ ಕನ್ನಡಿಗ

ಇಂಡಿಯನ್ ಪ್ರೀಮಿಯರ್ ಲೀಗ್ 2022ರ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ನ ಲಿಯಾಮ್ ಲಿವಿಂಗ್ ಸ್ಟೋನ್ 108 ಮೀಟರ್ ಸಿಕ್ಸರ್ ಸಿಡಿಸಿದ್ದರು. ಈ ಸೀಸನ್​ನಲ್ಲಿ ಇದುವರೆಗೆ ಇದೇ ಅತೀ ದೊಡ್ಡ ಸಿಕ್ಸರ್ ಆಗಿದೆ. ಆದರೆ, ಈ ಸಿಕ್ಸರ್‌ಗಿಂತಲೂ ದೊಡ್ಡ ಸಿಕ್ಸರ್‌ಗಳು ಐಪಿಎಲ್‌ನಲ್ಲಿ ದಾಖಲಾಗಿವೆ. ಐಪಿಎಲ್ ನಲ್ಲಿ ಇದುವರೆಗೆ ದಾಖಲಾದ ಟಾಪ್ 5 ಸಿಕ್ಸರ್ ಗಳ ಬಗ್ಗೆ ತಿಳಿಯೋಣ.

ದಕ್ಷಿಣ ಆಫ್ರಿಕಾದ ಮಾಜಿ ಆಲ್‌ರೌಂಡರ್ ಆಲ್ಬಿ ಮೊರ್ಕೆಲ್ ಐಪಿಎಲ್‌ನಲ್ಲಿ ಅತಿ ದೊಡ್ಡ ಸಿಕ್ಸರ್ ಬಾರಿಸಿದ ಬ್ಯಾಟ್ಸ್‌ಮನ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್ ಪರ ಆಡುತ್ತಿದ್ದಾಗ ಮೋರ್ಕೆಲ್ ಈ ಸಾಧನೆ ಮಾಡಿದರು. ಡೆಕ್ಕನ್ ಚಾರ್ಜರ್ಸ್ ವಿರುದ್ಧದ ಪಂದ್ಯದಲ್ಲಿ ಮೊರ್ಕೆಲ್ 125 ಮೀ ಸಿಕ್ಸರ್ ಬಾರಿಸಿದ್ದಾರೆ. ಅಲ್ಲದೇ ಐಪಿಎಲ್ ಇತಿಹಾಸದಲ್ಲಿ ಇದು ಈವರೆಗೂ ಈ ಸಿಕ್ಸ್ ಅತೀ ದೊಡ್ಡ ಸಿಕ್ಸ್ ಆಗಿದೆ.

ಈ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿ ಬೌಲರ್ ಇರುವುದು ವಿಶೇಷವಾಗಿದೆ. ಹೌದು, 2011ರ ಋತುವಿನಲ್ಲಿ ಪಂಜಾಬ್ ಕಿಂಗ್ಸ್ ಪರ ಪದಾರ್ಪಣೆ ಮಾಡಿದ್ದ ಟೀಂ ಇಂಡಿಯಾದ ಮಾಜಿ ವೇಗಿ ಪ್ರವೀಣ್ ಕುಮಾರ್ 124 ಮೀಟರ್ ಸಿಕ್ಸರ್ ಬಾರಿಸಿದ್ದರು. ಈ ಸಿಕ್ಸರ್ ಈವರೆಗೂ ಲಾಂಗೆಸ್ಟ್ ಸಿಕ್ಸರ್​ಗಳ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದೆ.

ದೊಡ್ಡ ಸಿಕ್ಸರ್‌ಗಳ ಪಟ್ಟಿಯಲ್ಲಿ ಆಸ್ಟ್ರೇಲಿಯಾದ ಮಾಜಿ ವಿಕೆಟ್‌ಕೀಪರ್ ಆ್ಯಡಂ ಗಿಲ್‌ಕ್ರಿಸ್ಟ್ ಮೂರನೇ ಸ್ಥಾನದಲ್ಲಿದ್ದಾರೆ. ಅವರು 2011ರ ಸೀಸನ್​ನಲ್ಲಿ ಪಂಜಾಬ್ ಕಿಂಗ್ಸ್ ಪರ ಆಡುವಾಗ 122 ಮೀ ಸಿಕ್ಸರ್ ಬಾರಿಸಿದರು. ಇದು ಐಪಿಎಲ್‌ನಲ್ಲಿ ವಿಕೆಟ್‌ಕೀಪರ್ ಬಾರಿಸಿದ ಅತಿ ದೊಡ್ಡ ಸಿಕ್ಸರ್ ಆಗಿದೆ.

ಈ ಪಟ್ಟಿಯಲ್ಲಿ ರಾಬಿನ್ ಉತ್ತಪ್ಪ ನಾಲ್ಕನೇ ಸ್ಥಾನದಲ್ಲಿದ್ದಾರೆ. ಅವರು ಐಪಿಎಲ್ 2010ರ ಋತುವಿನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಈ ಸಾಧನೆಯನ್ನು ಮಾಡಿದರು. ಅವರು ಸಿಡಿಸಿದ ಸಿಕ್ಸರ್ 120 ಮೀಟರ್ ದೂರ ಹೋಗಿತ್ತು.

ಐಪಿಎಲ್​ ನಲ್ಲಿ ಕ್ರಿಸ್ ಗೇಲ್ ಬ್ಯಾಟಿಂಗ್​ ಎಂದರೆ ಒಂದು ಹಬ್ಬವಿದ್ದಂತೆ ಅದರಲ್ಲಿಯೂ ಆರ್​ಸಿಬಿ ಅಭಿಮಾನಿಗಳು ಇಂದಿಗೂ ಗೇಲ್ ಅವರನ್ನು ತುಂಬಾ ಮಿಸ್ ಮಾಡಿಕೊಳ್ಳುತ್ತಾರೆ. ಅವರು ಸಹ ಈ ಪಟ್ಟಿಯಲ್ಲ ಸ್ಥಾನಪಡೆದುಕೊಂಡಿದ್ದು, RCB ಪರ ಕಣಕ್ಕಿಳಿದಾಗ ಗೇಲ್ 119m ಸಿಕ್ಸ್ ಸಿಡಿಸುವ ಮೂಲಕ 5ನೇ ಸ್ಥಾನದಲ್ಲಿದ್ದಾರೆ.

ಉಳಿದಂತೆ ಅನೇಕ ಕ್ರಿಕೆಟಿಗರು ಸೂಪರ್ ಸಿಕ್ಸ್​ಗಳನ್ನು ಸಿಡಿಇದ್ದಾರೆ. ಅದರಲ್ಲಿ ಬೆನ್ ಕಟಿಂಗ್ (117 ಮೀ), ಗೌತಮ್ ಗಂಭೀರ್ (117 ಮೀ) ಮತ್ತು ಧೋನಿ (117 ಮೀ) ನಂತರದ ಸ್ಥಾನದಲ್ಲಿದ್ದಾರೆ.