IPL 2022 - MS Dhoni: ಮತ್ತೊಂದು ದಾಖಲೆಯ ನಿರೀಕ್ಷೆಯಲ್ಲಿ ಮಹೇಂದ್ರ ಸಿಂಗ್ ಧೋನಿ, ಮತ್ತೆ ಅಬ್ಬರಿಸಲು ರೆಡಿಯಾದ ಮಾಹಿ

ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ನಲ್ಲಿ ಹಿಂದೆಂದೂ ಕಾಣದ ರೀತಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಆಡಿದ ಮೊದಲ ಎರಡು ಪಂದ್ಯಗಳಲ್ಲಿ ಸೋತಿದೆ. ಮೊದಲ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಹಾಗೂ 2ಣೇ ಪಂದ್ಯದಲ್ಲಿ ಲಕ್ನೋ ಸೂಪರ್‌ಜೈಂಟ್ಸ್ ವಿರುದ್ಧ ಸೋಲನ್ನಪ್ಪಿದ್ದೆ. ಹೀಗಾಗಿ ಇಂದಿನ ಪಂದ್ಯವನ್ನು ಗೆಲ್ಲುವ ಅನಿವಾರ್ಯತೆ ಎದುರಾಗಿದೆ.

ಇಂದಿನ ಈ ಪಂದ್ಯದಲ್ಲಿ ಎಲ್ಲರ ಕಣ್ಣು ಧೋನಿ ಮೇಲಿದ್ದು, ಈ ಋತುವಿನಲ್ಲಿ ಧೋನಿ ಉತ್ತಮ ಫಾರ್ಮ್​ನಲ್ಲಿ ಇದ್ದಾರೆ. ಅಲ್ಲದೇ ಪ್ರತಿ ಪಂದ್ಯದಲ್ಲಿಯೂ ಹೊಸದೊಂದು ದಾಖಲೆಯನ್ನು ಮಾಡುತ್ತಿದ್ದಾರೆ.

ಈ ಸೀಸನ್​ ನಲ್ಲಿ ಧೋನಿ 2 ಪಂದ್ಯಗಳನ್ನಾಡಿದ್ದು, ಎರಡೂ ಪಂದ್ಯಗಳಲ್ಲಿಯೂ ಹೊಸ ದಾಖಲೆಗಳನ್ನು ಮಾಡಿದ್ದಾರೆ. ಕೊಲ್ಕತ್ತಾ ವಿರುದ್ಧ ಹಿರಿಯ ಆಟಗಾರನಾಗಿ 50 ರನ್ ಹೊಡೆದ ದಾಖಲೆ ಮಾಡಿದರೆ, ಲಕ್ನೋ ವಿರುದ್ಧ 16 ರನ್ ಗಳಿಸುವುದರ ಮೂಲಕ 7000 ರನ್​ ಗಳನ್ನು ಟಿ20 ಕ್ರಿಕೆಟ್​ನಲ್ಲಿ ಪೂರೈಸಿದ್ದಾರೆ. ಇಂದಿನ ಪಂದ್ಯದಲ್ಲಿಯೂ ಹೊಸ ದಾಖಲೆಗೆ ಕಾಯುತ್ತಿದ್ದಾರೆ.

ಆದರೆ ಧೋನಿ 2 ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ನೀಡಿದರೂ ಚೆನ್ನೈ ತಂಡ ಜಯ ಗಳಿಸಲು ಸಾಧ್ಯವಾಗಲಿಲ್ಲ. ಈ ಸೀಸನ್​ನಿಂದ ಧೋನಿ ನಾಯಕತ್ವದಿಂದಲೂ ಕೆಳಗಿಳಿದಿದ್ದಾರೆ.

ಧೋನಿ ಇನ್ನೂ 3 ಸಿಕ್ಸರ್‌ಗಳನ್ನು ಬಾರಿಸಿದರೆ, ಅವರು ಟಿ20 ಕ್ರಿಕೆಟ್‌ನಲ್ಲಿ ಚೆನ್ನೈ ಪರ ಅತಿ ಹೆಚ್ಚು ಸಿಕ್ಸರ್‌ಗಳ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವರು. ಸದ್ಯ ಧೋನಿ 217 ಸಿಕ್ಸರ್‌ ಸಿಡಿಸಿದ್ದಾರೆ. ಇದರಲ್ಲಿ 191 ಐಪಿಎಲ್‌ನಲ್ಲಿ ಮತ್ತು 26 ಚಾಂಪಿಯನ್ಸ್ ಲೀಗ್‌ನಲ್ಲಿ. ಇನ್ನು ಚೆನ್ನೈ ಪರ ರೈನಾ 219 ಸಿಕ್ಸರ್‌ಗಳೊಂದಿಗೆ ಅಗ್ರಸ್ಥಾನದಲ್ಲಿದ್ದಾರೆ.

ವಿಂಡೀಸ್ ದಿಗ್ಗಜ ಕ್ರಿಸ್ ಗೇಲ್ 263 ಸಿಕ್ಸರ್‌ಗಳೊಂದಿಗೆ ಅಗ್ರಸ್ಥಾನದಲ್ಲಿದ್ದಾರೆ. ಕೀರನ್ ಪೊಲಾರ್ಡ್ 249 ಸಿಕ್ಸರ್‌ಗಳು, ಎಬಿ ಡಿವಿಲಿಯರ್ಸ್ 240 ಸಿಕ್ಸರ್‌ಗಳು ಮತ್ತು ವಿರಾಟ್ ಕೊಹ್ಲಿ 226 ಸಿಕ್ಸರ್‌ಗಳ ಮೂಲಕ ನಂತರದ ಸಾಲಿನಲ್ಲಿದ್ದಾರೆ.

ಅವರು 3 ಸಿಕ್ಸರ್‌ಗಳನ್ನು ಬಾರಿಸಿದರೆ, ಅವರು T20 ಕ್ರಿಕೆಟ್‌ನಲ್ಲಿ ರಾಸ್ ಟೇಲರ್ ಅವರನ್ನು ಮೀರಿಸುತ್ತಾರೆ ಮತ್ತು ಅತಿ ಹೆಚ್ಚು ಸಿಕ್ಸರ್‌ಗಳನ್ನು ಹೊಡೆದ 27ನೇ ಬ್ಯಾಟ್ಸ್‌ಮನ್ ಆಗುತ್ತಾರೆ. ಇದುವರೆಗೆ ಟಿ20ಯಲ್ಲಿ 349 ಪಂದ್ಯಗಳನ್ನಾಡಿರುವ ಧೋನಿ 307 ಸಿಕ್ಸರ್‌ಗಳನ್ನು ಬಾರಿಸಿದ್ದಾರೆ. ಇಂದಿನ ಪಂದ್ಯದ ಮೂಲಕ 350 ಟಿ20 ಆಡಿದ ಅಪರೂಪದ ಆಟಗಾರರ ಪಟ್ಟಿಗೆ ಸೇರಲಿದ್ದಾರೆ.