Virat Kohli: 1043 ದಿನಗಳ ನಂತರ ಶತಕ ಗಳಿಸಿದ ಕೊಹ್ಲಿ, ರೆಕಾರ್ಡ್ಸ್​​ ಬ್ರೇಕ್​ ಮಾಡೋದ್ರಲ್ಲಿ ಇವರೇ ಕಿಂಗ್​!

ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ವಿರಾಟ್ ಕೊಹ್ಲಿ 2023ರ ಹೊಸ ವರ್ಷವನ್ನು ಶತಕದ ಮೂಲಕ ಆರಂಭಿಸಿದ್ದಾರೆ. ಶ್ರೀಲಂಕಾ ವಿರುದ್ಧದ 3 ಪಂದ್ಯಗಳ ಸರಣಿಯ ಮೊದಲ ODI ನಲ್ಲಿ ವಿರಾಟ್ ಅದ್ಭುತ ಶತಕ ಗಳಿಸಿದರು.

ಇದರೊಂದಿಗೆ ಭಾರತದಲ್ಲಿ 4 ವರ್ಷಗಳಿಂದ ನಡೆಯುತ್ತಿದ್ದ ಶತಕದ ಬರವನ್ನೂ ವಿರಾಟ್ ಅಂತ್ಯಗೊಳಿಸಿದರು. ಕೊಹ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 73ನೇ ಶತಕ ಬಾರಿಸಿದರೆ, ಇದು ಏಕದಿನ ವೃತ್ತಿಜೀವನದಲ್ಲಿ ಅವರ 45ನೇ ಶತಕವಾಗಿದೆ.

ವಿರಾಟ್ 80 ಎಸೆತಗಳಲ್ಲಿ ಶತಕ ಪೂರೈಸಿದರು. ಅವರು 87 ಎಸೆತಗಳಲ್ಲಿ 12 ಬೌಂಡರಿ ಮತ್ತು ಒಂದು ಸಿಕ್ಸರ್ ಒಳಗೊಂಡ 113 ರನ್ ಗಳಿಸಿದರು. ಕೆಎಲ್ ರಾಹುಲ್ ಜತೆಗೂಡಿ ನಾಲ್ಕನೇ ವಿಕೆಟ್‌ಗೆ ಕೊಹ್ಲಿ 90 ರನ್ ಜೊತೆಯಾಟವಾಡಿದರು.

ಈ ಸಮಯದಲ್ಲಿ, ವಿರಾಟ್ ಶ್ರೀಲಂಕಾ ವಿರುದ್ಧದ ODIಗಳಲ್ಲಿ ಸಚಿನ್ ತೆಂಡೂಲ್ಕರ್ ಅವರ ಅತಿ ಹೆಚ್ಚು ಶತಕಗಳ ದಾಖಲೆಯನ್ನು ಮುರಿದರು. ವಿರಾಟ್ ಮತ್ತು ಸಚಿನ್ ಶ್ರೀಲಂಕಾ ವಿರುದ್ಧದ ODIಗಳಲ್ಲಿ ಒಂದೇ ರೀತಿಯ 8-8 ಶತಕಗಳನ್ನು ಹೊಂದಿದ್ದರು. ಮಾಸ್ಟರ್ ಬ್ಲಾಸ್ಟರ್ 84 ಪಂದ್ಯಗಳಲ್ಲಿ 8 ಶತಕ ಬಾರಿಸಿದರೆ ಕೊಹ್ಲಿ 48ನೇ ಪಂದ್ಯದಲ್ಲಿ 9ನೇ ಶತಕ ಸಿಡಿಸಿದರು.

34 ವರ್ಷದ ವಿರಾಟ್ ಕೊಹ್ಲಿ 484 ಪಂದ್ಯಗಳಲ್ಲಿ 73ನೇ ಏಕದಿನ ಶತಕ ಪೂರೈಸಿದ್ದಾರೆ. ಇದು ಏಕದಿನದಲ್ಲಿ ಕೊಹ್ಲಿ ಅವರ ಸತತ ಎರಡನೇ ಶತಕವಾಗಿದೆ. ಇದಕ್ಕೂ ಮುನ್ನ ಕಳೆದ ತಿಂಗಳು ಡಿಸೆಂಬರ್‌ನಲ್ಲಿ ಬಾಂಗ್ಲಾದೇಶ ಪ್ರವಾಸದಲ್ಲಿ ಶತಕ ಬಾರಿಸಿದ್ದರು.

ವಿರಾಟ್ ಈ ಹಿಂದೆ ಭಾರತದಲ್ಲಿ 8 ಮಾರ್ಚ್ 2019 ರಂದು ರಾಂಚಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಶತಕವನ್ನು ಸಿಡಿಸಿದ್ದರು. ಅಂದರೆ 1043 ದಿನಗಳ ಬಳಿಕ ಕೊಹ್ಲಿ ತವರಿನಲ್ಲಿ ಶತಕ ಸಿಡಿಸಿ ಸಂಭ್ರಮಿಸಿದರು.

ವಿರಾಟ್ ಕೊಹ್ಲಿ ಅವರ 113 ರನ್ ಮತ್ತು ನಾಯಕ ರೋಹಿತ್ ಶರ್ಮಾ ಮತ್ತು ಶುಭಮನ್ ಗಿಲ್ ಅವರ ಅರ್ಧಶತಕಗಳ ಆಧಾರದ ಮೇಲೆ ಭಾರತ ನಿಗದಿತ 50 ಓವರ್‌ಗಳಲ್ಲಿ 7 ವಿಕೆಟ್‌ಗೆ 373 ರನ್ ಗಳಿಸಿತು.

ರೋಹಿತ್ 68 ಎಸೆತಗಳಲ್ಲಿ 9 ಬೌಂಡರಿ ಹಾಗೂ 3 ಸಿಕ್ಸರ್ ನೆರವಿನಿಂದ 83 ರನ್ ಗಳಿಸಿದರೆ, ಗಿಲ್ 60 ಎಸೆತಗಳಲ್ಲಿ 70 ರನ್ ಗಳಿಸಿದರು. ಗಿಲ್ ಅವರ ಅರ್ಧಶತಕದ ಇನ್ನಿಂಗ್ಸ್‌ನಲ್ಲಿ 11 ಬೌಂಡರಿಗಳನ್ನು ಬಾರಿಸಿದರು. ಕೆಎಲ್ ರಾಹುಲ್ 29 ಎಸೆತಗಳಲ್ಲಿ 39 ರನ್ ಗಳಿಸಿ ಪೆವಿಲಿಯನ್ ಗೆ ಮರಳಿದರು.