Suryakumar Yadav: ರೋಹಿತ್​ ದಾಖಲೆ ಮುರಿದ ಸೂರ್ಯಕುಮಾರ್! SKY ಶತಕಕ್ಕೆ ರೆಕಾರ್ಡ್ಸ್​​ಗಳೆಲ್ಲಾ ಪುಡಿ ಪುಡಿ

ಸೂರ್ಯಕುಮಾರ್ ಯಾದವ್ ಸದ್ಯ ಟೀಂ ಇಂಡಿಯಾ ಅಭಿಮಾನಿಗಳ ಮನದಲ್ಲಿ ಅಚ್ಚಳಿಯದಂತೆ ಉಳಿದಿರುವ ಹೆಸರು. 30ರ ಹರೆಯದಲ್ಲಿ ಟೀಂ ಇಂಡಿಯಾಕ್ಕೆ ಪದಾರ್ಪಣೆ ಮಾಡಿದ ಸೂರ್ಯಕುಮಾರ್ ಕೆಲವೇ ಸಮಯದಲ್ಲಿ ಟೀಂ ಇಂಡಿಯಾದ ಬೆನ್ನೆಲುಬಾಗಿ ನಿಂತಿದ್ದಾರೆ.

ಸೂರ್ಯಕುಮಾರ್ ಯಾದವ್ ಕಳೆದ ಒಂದು ವರ್ಷದಿಂದ ರನ್​ಗಳ ಮಳೆ ಸುರಿಸುತ್ತಿದ್ದಾರೆ. ಮಧ್ಯಮ ಓವರ್‌ಗಳಲ್ಲಿ 200 ಸ್ಟ್ರೈಕ್ ರೇಟ್‌ನೊಂದಿಗೆ ರನ್ ಗಳಿಸುವುದು ಸೂರ್ಯಕುಮಾರ್ ಅವರ ವಿಶೇಷತೆಯಾಗಿದೆ.

ಟಿ20 ವಿಶ್ವಕಪ್‌ನಲ್ಲಿ ಸೂರ್ಯ ವಿಫಲವಾಗಿದ್ದರೂ ಇದೀಗ ಮತ್ತೊಮ್ಮೆ ತಮ್ಮ ಶಕ್ತಿ ಪ್ರದರ್ಶಿಸಿದರು. ಈ ಬಾರಿ ರಾಜ್​ಕೋಟ್​ನಲ್ಲಿ ಸೂರ್ಯ ಭರ್ಜರಿಯಾಗಿ ಪ್ರಜ್ವಲಿಸಿತ್ತು. ಶ್ರೀಲಂಕಾ ವಿರುದ್ಧದ ಮೂರನೇ ಟಿ20 ಪಂದ್ಯದಲ್ಲಿ ಸೂರ್ಯಕುಮಾರ್ ಯಾದವ್ ಭರ್ಜರಿ ಶತಕ ಸಿಡಿಸಿದ್ದರು.

ಶ್ರೀಲಂಕಾ ವಿರುದ್ಧದ ಮೂರನೇ ಟಿ20ಯಲ್ಲಿ ಸೂರ್ಯಕುಮಾರ್ ಯಾದವ್ (51 ಎಸೆತಗಳಲ್ಲಿ ಔಟಾಗದೆ 112; 7 ಬೌಂಡರಿ, 9 ಸಿಕ್ಸರ್) ಸೂಪರ್ ಶತಕ ಸಿಡಿಸಿದ್ದರು. ಇದು ಸೂರ್ಯ ಅವರ ಮೂರನೇ ಟಿ20 ಶತಕವಾಗಿದೆ. ಈ ಇನ್ನಿಂಗ್ಸ್‌ನಲ್ಲೂ ಅವರು ತಮ್ಮ 360 ಡಿಗ್ರಿ ಮಾರ್ಕ್ ಶಾಟ್‌ಗಳ ಮೂಲಕ ಅಭಿಮಾನಿಗಳನ್ನು ರಂಜಿಸಿದರು. ಈ ಮೂಲಕ ಹಲವು ದಾಖಲೆಗಳನ್ನು ತಮ್ಮ ಖಾತೆಗೆ ಸೇರಿಸಿಕೊಂಡಿದ್ದಾರೆ.

ಈ ಪಂದ್ಯದಲ್ಲಿ ಸೂರ್ಯಕುಮಾರ್ 45 ಎಸೆತಗಳಲ್ಲಿ ಶತಕ ಪೂರೈಸಿದರು. ಇದರ ಫಲವಾಗಿ ಭಾರತದ ಪರವಾಗಿ ಟಿ20ಯಲ್ಲಿ ಅತಿವೇಗದ ಶತಕ ಬಾರಿಸಿದ ಎರಡನೇ ಕ್ರಿಕೆಟಿಗ ಎನಿಸಿಕೊಂಡರು. ಇದಕ್ಕೂ ಮುನ್ನ ಇಂದೋರ್‌ನಲ್ಲಿ ಶ್ರೀಲಂಕಾ ವಿರುದ್ಧ ರೋಹಿತ್ ಶರ್ಮಾ ಕೇವಲ 35 ಎಸೆತಗಳಲ್ಲಿ ಶತಕ ಸಿಡಿಸಿದ್ದರು.

ಸೂರ್ಯ ಈ ವರ್ಷ ಟಿ20 ಮಾದರಿಯಲ್ಲಿ ಶತಕ ಸಿಡಿಸಿದ ಮೊದಲ ಬ್ಯಾಟ್ಸ್‌ಮನ್ ಎಂಬ ದಾಖಲೆ ನಿರ್ಮಿಸಿದ್ದಾರೆ. ಈ ಮೂಲಕ ಸೂರ್ಯಕುಮಾರ್ ಯಾದವ್ ಟಿ20 ಕ್ರಿಕೆಟ್​ನಲ್ಲಿ ಒಟ್ಟು ಬಳಿ 3 ಶತಕ, 13 ಅರ್ಧ ಶತಕಗಳಿಸಿದ್ದಾರೆ.

ಟಿ20ಯಲ್ಲಿ ರೋಹಿತ್ ನಂತರ ಅತಿ ಹೆಚ್ಚು ಶತಕ ಗಳಿಸಿದ ಬ್ಯಾಟ್ಸ್‌ಮನ್ ಎಂಬ ದಾಖಲೆಯನ್ನು ಸೂರ್ಯಕುಮಾರ್ ಯಾದವ್ ಹೊಂದಿದ್ದಾರೆ. ರೋಹಿತ್ 4 ಶತಕ ಬಾರಿಸಿದರೆ, ಸೂರ್ಯ ಅವರ ಖಾತೆಯಲ್ಲಿ ಈಗಾಗಲೇ 3 ಶತಕಗಳಿವೆ. ಸೂರ್ಯ ಅವರ ಅಗ್ರೆಸಿವ್ ನೆಸ್ ನೋಡಿದರೆ ರೋಹಿತ್ ದಾಖಲೆ ಮುರಿಯುವುದು ಖಚಿತ. ಟಿ20ಯಲ್ಲಿ 3 ಶತಕಗಳನ್ನು ಸಿಡಿಸಿದ ಮೊದಲ ನಾನ್ ಓಪನರ್ ಸೂರ್ಯಕುಮಾರ್ ಆಗಿದ್ದಾರೆ.

ಇದಲ್ಲದೆ, ಈ ಇನ್ನಿಂಗ್ಸ್‌ನಲ್ಲಿ ಸೂರ್ಯಕುಮಾರ್ ಯಾದವ್ ಅವರ ಸ್ಟ್ರೈಕ್ ರೇಟ್ 219.61 ಆಗಿತ್ತು. ಒಟ್ಟಾರೆ ಟಿ20 ವೃತ್ತಿಜೀವನದ ಸ್ಟ್ರೈಕ್ ರೇಟ್ ಕೂಡ ಆಕರ್ಷಕವಾಗಿದೆ. T20 ವೃತ್ತಿಜೀವನದಲ್ಲಿ ಸೂರ್ಯಕುಮಾರ್ ಸ್ಟ್ರೈಕ್ ರೇಟ್ 180.34 ಆಗಿದೆ. ಈಗಿನ ಕ್ರಿಕೆಟಿಗರಲ್ಲಿ ಯಾವುದೇ ಬ್ಯಾಟ್ಸ್‌ಮನ್ ಇಷ್ಟೊಂದು ಸ್ಟ್ರೈಕ್ ರೇಟ್ ಹೊಂದಿಲ್ಲ.