IND vs NZ 1st ODI: ಹಾರ್ದಿಕ್‌ ನಾಟೌಟ್​ ಆದ್ರೂ ಔಟ್​ ನೀಡಿದ ಅಂಪೈರ್, ಕಣ್ಣು ಮುಚ್ಚಿ ಅಂಪೈರಿಂಗ್ ಮಾಡ್ತಿದ್ದೀರಾ ಎಂದ ಫ್ಯಾನ್ಸ್

ಭಾರತ ಮತ್ತು ನ್ಯೂಜಿಲ್ಯಾಂಡ್​ ವಿರುದ್ಧದ 3 ಪಂದ್ಯಗಳ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತದ ಪರ ಶುಭ್​ಮನ್ ಗಿಲ್​ ಭರ್ಜರಿ ಬ್ಯಾಟಿಂಗ್ ಮಾಡಿದ್ದಾರೆ. ಗಿಲ್​ ಕಿವೀಸ್​ ವಿರುದ್ಧ ಆಕರ್ಷಕ ದ್ವಿಶತಕ ಸಿಡಿಸಿ ಮಿಂಚಿದರು.

ಶುಭ್​ಮನ್ ಗಿಲ್​ ಕಿವೀಸ್​ ವಿರುದ್ಧ ದ್ವಿಶತಕ ಸಿಡಿಸಿ ಆರ್ಭಟಿಸಿದರು. ಅವರು, 149 ಬೌಲ್​ಗಳಿಗೆ 9 ಸಿಕ್ಸ್​ ಮತ್ತು 19 ಫೋರ್​ ಮೂಲಕ ಆಕರ್ಷಕ 208 ರನ್​ಗಳಿಸಿದರು. ಆದರೆ, ಈ ಪಂದ್ಯದಲ್ಲಿ ಅಂಪೈರ್ ತೆಗೆದುಕೊಂಡ ನಿರ್ಧಾರವೊಂದು ವಿವಾದಕ್ಕೀಡಾಗಿದೆ.

ಹಾರ್ದಿಕ್ ಪಾಂಡ್ಯ ವಿಚಾರದಲ್ಲಿ ಆನ್ ಫೀಲ್ಡ್ ಅಂಪೈರ್ ಮತ್ತು ಟಿವಿ ಅಂಪೈರ್ ಇಬ್ಬರೂ ದೊಡ್ಡ ತಪ್ಪು ಮಾಡಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿದೆ. ಡ್ಯಾರಿಲ್ ಮಿಚೆಲ್ 40ನೇ ಓವರ್ ಬೌಲ್​ ಮಾಡುವಾಗ ಹಾರ್ದಿಕ್ ಪಾಂಡ್ಯ ವಿಕೆಟ್ ಪಡೆದರು.

ಈ ವೇಳೆ ಬಾಲ್​ ಹಾರ್ದಿಕ್​ ಬ್ಯಾಟಿಗೆ  ತಟ್ಟದೇ ನೇರವಾಗಿ ಕೀಪರ್​ ಕೈ ಸೇರಿದೆ. ಕೀಪರ್​ ಸ್ಟಂಪಿಂಗ್​ ಮಾಡಿದ್ದಾರೆ. ಇದನ್ನು ಕಿವೀಸ್ ವಿಕೆಟ್ ಕೀಪರ್ ಮತ್ತು ನಾಯಕ ಲ್ಯಾಥಮ್ ಬೌಲ್ಡ್ ವಿಕೆಟ್​ಗಾಗಿ ಮನವಿ ಮಾಡಿದ್ದಾರೆ.

ಫೀಲ್ಡ್ ಅಂಪೈರ್‌ಗಳು ಟಿವಿ ಅಂಪೈರ್ ಅನ್ನು ಸಹ ಬಳಸದೆ ಹಾರ್ದಿಕ್ ಅವರನ್ನು ಔಟ್ ಎಂದು ಘೋಷಿಸಿದರು. ಆದರೆ ಟಿವಿಯಲ್ಲಿ ಪಂದ್ಯ ನೋಡಿದವರೆಲ್ಲ ಔಟಾಗಿಲ್ಲ ಎಂದು ಭಾವಿಸಿದ್ದರು. ನಂತರ ಮರು ಪ್ರಸಾರದಲ್ಲಿ ಹಾರ್ದಿಕ್ ಔಟಾಗದೆ ಇರುವುದು ಕಂಡುಬಂದಿದೆ.

ಚೆಂಡನ್ನು ಹಿಡಿಯುತ್ತಿದ್ದಾಗ ಲಾಥಮ್ ಅವರ ಕೈಗವಸುಗಳು ಬೇಲ್ಸ್‌ಗೆ ತಾಗಿದವು. ಅದರಿಂದಾಗಿ ಸ್ಟಂಪ್​ನಲ್ಲಿ ಬೆಳಕು ಬಂದಿದೆ. ಟಿವಿ ರಿಪ್ಲೇಯಲ್ಲಿ ಅದು ಸ್ಪಷ್ಟವಾಗಿ ಕಾಣಿಸಿತು. ಅಲ್ಲದೇ ಈ ವೇಳೆ ಕ್ರೀಸ್​ನಲ್ಲಿ ಹಾರ್ದಿಕ್​ ಕಾಲುಗಳು ಇದ್ದಿದ್ದರೂ ಸಹ ಔಟ್​ ನೀಡಿದ್ದು ಚರ್ಚೆಗೆ ಗ್ರಾಸವಾಗಿದೆ.

ಆದರೆ ಹಾರ್ದಿಕ್ ಪಾಂಡ್ಯ ಆಗಲೇ ಮೈದಾನದಿಂದ ನಿರ್ಗಮಿಸಿದ್ದರು. ಜೊತೆಗೆ ವಾಷಿಂಗ್ಟನ್ ಸುಂದರ್ ಕೂಡ ಕ್ರೀಸ್‌ಗೆ ಬಂದಿದ್ದರು. ಹೀಗಾಗಿ ಯಾರೂ ಏನೂ ಮಾಡಲಾಗಲಿಲ್ಲ. ಸ್ವಲ್ಪ ಸಮಯದ ನಂತರ ಗಿಲ್‌ಗೆ ಇದೇ ರೀತಿಯ ಘಟನೆ ಸಂಭವಿಸಿತು. ಆದರೆ ಅವರು ಔಟ್​ ಆಗದೇ ಉಳಿದರು.

ಆದರೆ ಅದನ್ನು ಮೂರನೇ ಅಂಪೈರ್‌ಗೆ ಸೂಚಿಸಲಾಯಿತು ಮತ್ತು ಗಿಲ್ ಔಟ್​ ಆಗದೆಯೇ ಉಳಿದರು. ಇಲ್ಲಿಯೂ ಲಾಥಮ್‌ನ ಕೈಗವಸುಗಳು ಬಡಿದು ಬೇಲ್ಸ್​ಗಳು ಕೆಳಗೆ ಬಿದ್ದಿದ್ದವು. ಆದರೆ ಹಾರ್ದಿಕ್ ಅವರ ವಿಕೆಟ್​ ನೀಡಿರುವುದಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ಅಂಪೈರ್​ಗಳ ಬಗ್ಗೆ ಅಭಿಮಾನಿಗಳು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.