Rohit Sharma: ಮತ್ತೆ ವಿಫಲರಾದ ರೋಹಿತ್ ಶರ್ಮಾ, 35 ತಿಂಗಳಾದ್ರೂ ಇಲ್ಲ ಒಂದೇ ಒಂದು ಶತಕ!

ಟಿ20 ಮತ್ತು ಏಕದಿನ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ರೋಹಿತ್ ಶರ್ಮಾ ಅವರ ದಾಖಲೆ ಅತ್ಯುತ್ತಮವಾಗಿದೆ. ಅಂತಾರಾಷ್ಟ್ರೀಯ ಟಿ20ಯಲ್ಲಿ 4 ಶತಕ ಸಿಡಿಸಿದ ಏಕೈಕ ಬ್ಯಾಟ್ಸ್‌ಮನ್. ಅವರು ಏಕದಿನ ಪಂದ್ಯಗಳಲ್ಲಿ 3 ದ್ವಿಶತಕಗಳನ್ನು ಸಹ ಗಳಿಸಿದ್ದಾರೆ. ವಿಶ್ವದ ಯಾವುದೇ ಬ್ಯಾಟ್ಸ್‌ಮನ್‌ಗಳು ಇದನ್ನು ಮಾಡಲು ಸಾಧ್ಯವಾಗಿಲ್ಲ, ಆದರೆ ನಾಯಕ ರೋಹಿತ್ ಕಳೆದ 35 ತಿಂಗಳಿಂದ ರನ್‌ಗಾಗಿ ಪರದಾಡುತ್ತಿದ್ದಾರೆ.

ರೋಹಿತ್ ಶರ್ಮಾ ಕಳೆದ ODI ಮತ್ತು T20 ಅಂತರಾಷ್ಟ್ರೀಯ 54 ಪಂದ್ಯಗಳಲ್ಲಿ ಒಂದೇ ಒಂದು ಶತಕವನ್ನು ಗಳಿಸಲು ಸಾಧ್ಯವಾಗಲಿಲ್ಲ. ಅವರು ತಮ್ಮ ಕೊನೆಯ ಶತಕವನ್ನು 19 ಜನವರಿ 2020 ರಂದು ಆಸ್ಟ್ರೇಲಿಯಾ ವಿರುದ್ಧ ಏಕದಿನ ಕ್ರಿಕೆಟ್​ನಲ್ಲಿ ಸಿಡಿಸಿದ್ದರು. ಬೆಂಗಳೂರಿನಲ್ಲಿ ನಡೆದ ಈ ಪಂದ್ಯದಲ್ಲಿ ಅವರು 128 ಎಸೆತಗಳಲ್ಲಿ 119 ರನ್ ಗಳಿಸಿದ್ದರು. ಹೀಗಾಗಿ ರೋಹಿತ್ ಕಳೆದ 35 ತಿಂಗಳಿಂದ ಶತಕದ ಇನ್ನಿಂಗ್ಸ್ ಆಡಲು ಸಾಧ್ಯವಾಗಿಲ್ಲ.

ಜನವರಿ 2020 ರಿಂದ, ರೋಹಿತ್ 10 ODIಗಳಲ್ಲಿ 32 ರ ಸರಾಸರಿಯಲ್ಲಿ 288 ರನ್ ಗಳಿಸಲು ಸಾಧ್ಯವಾಯಿತು. 2 ಅರ್ಧ ಶತಕಗಳನ್ನು ಗಳಿಸಿದ್ದಾರೆ ಮತ್ತು ಅವರ ಗರಿಷ್ಠ ಸ್ಕೋರ್ 76 ಔಟಾಗದೆ. ಈ ಸಮಯದಲ್ಲಿ, ಅವರ ಸ್ಟ್ರೈಕ್ ರೇಟ್ 98 ಆಗಿದೆ. ಈ ವೇಳೆ ಶ್ರೇಯಸ್ ಅಯ್ಯರ್, ಶುಭಮನ್ ಗಿಲ್, ಕೆಎಲ್ ರಾಹುಲ್ ಮತ್ತು ರಿಷಬ್ ಪಂತ್ ಟೀಂ ಇಂಡಿಯಾ ಪರ ಏಕದಿನದಲ್ಲಿ ಶತಕ ಸಿಡಿಸಿದ್ದಾರೆ.

ರೋಹಿತ್ ಶರ್ಮಾ 20 ಜನವರಿ 2020 ರಿಂದ 44 T20 ಅಂತರಾಷ್ಟ್ರೀಯ ಪಂದ್ಯಗಳಲ್ಲಿ ಶತಕ ಗಳಿಸಲು ಸಾಧ್ಯವಾಗಲಿಲ್ಲ. 74 ರನ್ ಅವರ ದೊಡ್ಡ ಸ್ಕೋರ್ ಆಗಿತ್ತು. ಅವರು 30 ರ ಸರಾಸರಿಯಲ್ಲಿ 1220 ರನ್ ಗಳಿಸಿದರು. 10 ಅರ್ಧಶತಕಗಳನ್ನು ಗಳಿಸಿದ್ದಾರೆ. ಸ್ಟ್ರೈಕ್ ರೇಟ್ 142 ಆಗಿದೆ. ಟಿ20 ವಿಶ್ವಕಪ್‌ನಲ್ಲೂ ನಿರೀಕ್ಷಿತ ಪ್ರದರ್ಶನ ನೀಡಲು ಸಾಧ್ಯವಾಗಲಿಲ್ಲ.

35 ವರ್ಷದ ರೋಹಿತ್ ಇದುವರೆಗೆ 234 ಏಕದಿನ ಪಂದ್ಯಗಳಲ್ಲಿ 48ರ ಸರಾಸರಿಯಲ್ಲಿ 9403 ರನ್ ಗಳಿಸಿದ್ದಾರೆ. 29 ಶತಕ ಹಾಗೂ 45 ಅರ್ಧ ಶತಕ ಬಾರಿಸಿದ್ದಾರೆ. 264 ರನ್‌ಗಳ ದಾಖಲೆಯ ಆಟವಾಡಿದ್ದಾರೆ. ಅಲ್ಲದೇ ಅವರು 860 ಬೌಂಡರಿಗಳು ಮತ್ತು 251 ಸಿಕ್ಸರ್‌ಗಳನ್ನು ಸಹ ಹೊಡೆದಿದ್ದಾರೆ.

ಇದಲ್ಲದೇ ರೋಹಿತ್ T20 ಅಂತರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 148 ಪಂದ್ಯಗಳಲ್ಲಿ 31 ರ ಸರಾಸರಿಯಲ್ಲಿ 3853 ರನ್ ಗಳಿಸಿದ್ದಾರೆ. 4 ಶತಕ ಹಾಗೂ 29 ಅರ್ಧ ಶತಕ ಗಳಿಸಿದ್ದಾರೆ. 118 ರನ್‌ಗಳ ಅತ್ಯುತ್ತಮ ಇನ್ನಿಂಗ್ಸ್‌ಗಳನ್ನು ಆಡಿದ್ದಾರೆ ಮತ್ತು ಸ್ಟ್ರೈಕ್ ರೇಟ್ 139 ಆಗಿದೆ. ಐಪಿಎಲ್​ ಸೇರಿ ಒಟ್ಟಾರೆ ಟಿ20ಯಲ್ಲಿ 10 ಸಾವಿರಕ್ಕೂ ಹೆಚ್ಚು ರನ್ ಗಳಿಸಿದ್ದಾರೆ.

ರೋಹಿತ್ ಶರ್ಮಾ ಇದುವರೆಗೆ 45 ಟೆಸ್ಟ್ ಪಂದ್ಯಗಳಲ್ಲಿ 46ರ ಸರಾಸರಿಯಲ್ಲಿ 3137 ರನ್ ಗಳಿಸಿದ್ದಾರೆ. 8 ಶತಕ ಹಾಗೂ 14 ಅರ್ಧ ಶತಕ ಬಾರಿಸಿದ್ದಾರೆ. 212 ರನ್ ಅವರ ಅತ್ಯುತ್ತಮ ಸ್ಕೋರ್ ಆಗಿದೆ. ಪ್ರಸ್ತುತ, ಅವರು ಟೀಮ್ ಇಂಡಿಯಾದ ಎಲ್ಲಾ ಮೂರು ಫಾರ್ಮ್ಯಾಟ್‌ಗಳ ನಾಯಕರಾಗಿದ್ದಾರೆ. ODI ಸರಣಿಯ ನಂತರ, ಡಿಸೆಂಬರ್ 14 ರಿಂದ ಭಾರತ ಮತ್ತು ಬಾಂಗ್ಲಾದೇಶ ನಡುವೆ 2 ಪಂದ್ಯಗಳ ಟೆಸ್ಟ್ ಸರಣಿ ಕೂಡ ನಡೆಯಲಿದೆ.

ಇಂದಿನಿಂದ ಆರಂಭವಾಗಿರುವ ಬಾಂಗ್ಲಾದೇಶದ ವಿರುದ್ಧದ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿಯೂ ರೋಹಿತ್ ವಿಫಲರಾಗಿದ್ದಾರೆ. ಅವರು ಇಂದು 31 ಎಸೆತದಲ್ಲಿ 4 ಫೋರ್​ ಮತ್ತು 1 ಸಿಕ್ಸ್ ಮೂಲಕ 27 ರನ್ ಗಳಿಸಿ ವಿಕೆಟ್​ ಒಪ್ಪಿಸುವ ಮೂಲಕ ಮತ್ತೊಮ್ಮೆ ನಿರಾಸೆ ಮೂಡಿಸಿದ್ದಾರೆ.