KL Rahul: ಉಪನಾಯಕನ ಸ್ಥಾನದಿಂದ ರಾಹುಲ್ ಔಟ್​! ವೈಸ್​ ಕ್ಯಾಪ್ಟನ್​ಗಾಗಿ ಭರ್ಜರಿ ಪೈಪೋಟಿ

ಭಾರತ-ಆಸ್ಟ್ರೇಲಿಯಾ ನಡುವೆ ನಡೆಯುತ್ತಿರುವ 4 ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಒಬ್ಬ ಆಟಗಾರನ ಬಗ್ಗೆ ನಿರಂತರವಾಗಿ ಚರ್ಚೆ ನಡೆಯುತ್ತಿದೆ. ಈ ಸರಣಿಯಲ್ಲಿ ಸೂರ್ಯಕುಮಾರ್ ಯಾದವ್ ಚೊಚ್ಚಲ ಟೆಸ್ಟ್ ಆಡಿದರೂ ಎಲ್ಲರ ಕಣ್ಣು ಕೆಎಲ್ ರಾಹುಲ್ ಮೇಲಿತ್ತು. ಮೊದಲೆರಡು ಪಂದ್ಯಗಳಲ್ಲಿ ರನ್ ಗಳಿಸಲು ಸಾಧ್ಯವಾಗದೆ ಉಪನಾಯಕತ್ವವನ್ನು ಕಳೆದುಕೊಂಡರು.

ಆಸ್ಟ್ರೇಲಿಯಾ ವಿರುದ್ಧ ನಡೆಯಲಿರುವ ಬಾರ್ಡರ್-ಗವಾಸ್ಕರ್ ಟ್ರೋಫಿಯ ಉಳಿದ ಎರಡು ಪಂದ್ಯಗಳಿಗೆ ಆಯ್ಕೆ ಆದ ತಂಡದಲ್ಲಿ ರಾಹುಲ್ ಆಯ್ಕೆ ಆದರೂ ಸಹ ಉಪನಾಯಕನ ಸ್ಥಾನದಿಂದ ಔಟ್ ಆಗಿದ್ದಾರೆ. ಹೀಗಾಗಿ ಅವರ ಸ್ಥಾನಕ್ಕೆ ರವೀಮದ್ರ ಜಡೇಜಾ ಆಯ್ಕೆ ಆಗುತ್ತಾರೆಯೇ ಎಂದು ನೋಡಬೇಕಿದೆ.

ಆದರೆ, ಕಳೆದ ವರ್ಷ ಮಹೇಂದ್ರ ಸಿಂಗ್ ಧೋನಿ ಜಡೇಜಾಗೆ ಐಪಿಎಲ್ ನಾಯಕತ್ವವನ್ನು ನೀಡಿದಾಗ, ಅವರು ಹೆಚ್ಚು ಪ್ರಭಾವ ಬೀರಲು ಸಾಧ್ಯವಾಗಲಿಲ್ಲ. ಅವರ ಇಡೀ ವೃತ್ತಿಜೀವನದಲ್ಲಿ, ಜಡೇಜಾ ಸೌರಾಷ್ಟ್ರದ ನಾಯಕನಾಗಿರಲಿಲ್ಲ. ಹೀಗಾಗಿ ಅವರಿಗೆ ಉಪನಾಯಕತ್ವ ಸಿಗುವುದು ಅನುಮಾನ ಎನ್ನಬಹುದು.

ರವಿಚಂದ್ರನ್ ಅಶ್ವಿನ್ ಅವರ ಹೆಸರು ತಂಡದ ಪ್ರಬಲ ಆಯ್ಕೆಯಾಗಿದೆ. ಬಹುಶಃ ಇಷ್ಟೊತ್ತಿಗೆ ಭಾರತದ ಟೆಸ್ಟ್ ನಾಯಕತ್ವ ಪಡೆಯಬೇಕಿದ್ದ ಆಟಗಾರನಿಗೆ ಈವರೆಗೆ ಉಪನಾಯಕತ್ವವೂ ಸಿಗದಿರುವುದು ಅಚ್ಚರಿಯ ಸಂಗತಿ.

ಆದಾಗ್ಯೂ, ಅಶ್ವಿನ್ ದೀರ್ಘಾವಧಿಯ ಚಿಂತನೆಯ ಭಾಗವಾಗದಿರಬಹುದು, ಆದರೆ ಪಂತ್ ಮತ್ತೆ ಫಿಟ್ ಆಗುವವರೆಗೆ, ಅಶ್ವಿನ್ 1-2 ವರ್ಷಗಳ ಕಾಲ ಈ ಪಾತ್ರವನ್ನು ನಿರ್ವಹಿಸಬಹುದು.

ಬಿಸಿಸಿಐ ಬಿಡುಗಡೆ ಮಾಡಿರುವ ತಂಡದಲ್ಲಿ ಯಾವುದೇ ಆಟಗಾರನನ್ನು ಉಪನಾಯಕನನ್ನಾಗಿ ಮಾಡಲಾಗಿಲ್ಲ, ಆದರೆ ತಂಡದ ಅತ್ಯಂತ ಅನುಭವಿ ಬ್ಯಾಟ್ಸ್‌ಮನ್ ಚೇತೇಶ್ವರ ಪೂಜಾರ ಅವರು ಸ್ಥಾನವನ್ನು ಅಲಂಕರಿಸುವ ನಿರೀಕ್ಷೆಯಿದೆ. ರೋಹಿತ್ ಶರ್ಮಾ ಅನುಪಸ್ಥಿತಿಯಲ್ಲಿ, ಟೀಂ ಇಂಡಿಯಾ ಬಾಂಗ್ಲಾದೇಶ ವಿರುದ್ಧದ ಸರಣಿಯನ್ನು ಆಡಲು ಪ್ರಾರಂಭಿಸಿದಾಗ, ಕೆಎಲ್ ರಾಹುಲ್ ಅವರನ್ನು ನಾಯಕರನ್ನಾಗಿ ಮಾಡಲಾಯಿತು ಮತ್ತು ಪೂಜಾರ ಅವರನ್ನು ಉಪನಾಯಕರನ್ನಾಗಿ ನೇಮಿಸಲಾಗಿತ್ತು.

ಕಳೆದ ವರ್ಷ ಟೆಸ್ಟ್ ತಂಡದಿಂದ ಕೈಬಿಟ್ಟ ನಂತರ ಚೇತೇಶ್ವರ ಪೂಜಾರ ಪುನರಾಗಮನ ಮಾಡಿದರು. ಅವರು ದೆಹಲಿಯಲ್ಲಿ ತಮ್ಮ ವೃತ್ತಿಜೀವನದ 100 ನೇ ಟೆಸ್ಟ್ ಪಂದ್ಯವನ್ನು ಆಡಿದರು. ತಂಡದಿಂದ ಕೈಬಿಟ್ಟ ನಂತರ ಪೂಜಾರ ಇಂಗ್ಲಿಷ್ ಕ್ಲಬ್ ಕ್ರಿಕೆಟ್‌ನತ್ತ ಮುಖ ಮಾಡಿದ್ದರು.

ಚೇತೇಶ್ವರ ಪೂಜಾರ ಬಾಂಗ್ಲಾದೇಶ ಪ್ರವಾಸದಲ್ಲಿ ತಮ್ಮ ವೃತ್ತಿಜೀವನದ ವೇಗದ ಶತಕ ಬಾರಿಸಿ ಎಲ್ಲರನ್ನೂ ಅಚ್ಚರಿಗೊಳಿಸಿದರು. ಪೂಜಾರ 100 ಟೆಸ್ಟ್ ಪಂದ್ಯಗಳನ್ನು ಆಡಿದ ಭಾರತದ 13 ನೇ ಆಟಗಾರರಾದರು. ಇಲ್ಲಿಯವರೆಗೆ, ಅವರು 19 ಶತಕಗಳನ್ನು ಒಳಗೊಂಡಂತೆ 44.07 ಸರಾಸರಿಯಲ್ಲಿ ಒಟ್ಟು 7052 ರನ್ ಗಳಿಸಿದ್ದಾರೆ.