IND vs AUS: ಮೊದಲ ಟೆಸ್ಟ್​​ನಲ್ಲೇ ಮೈಂಡ್ ಗೇಮ್​ ಶುರು; ಲಬುಶೇನ್​ಗೆ ಅಶ್ವಿನ್​​ ಕೌಂಟರ್​, ಅಸಲಿಗೆ ಆಗಿದ್ದೇನು?

ಮೈದಾನದಲ್ಲಿ ಎದುರಾಳಿ ತಂಡದ ವಿರುದ್ಧ ಮೈಂಡ್ ಗೇಮ್ಸ್ ಆಡುವುದರಲ್ಲಿ ಆಸ್ಟ್ರೇಲಿಯಾ ತಂಡದ ನಂತರವೇ ಯಾರಾದರೂ ಎಂದು ಹೇಳಬಹುದು. ಸ್ವದೇಶದಲ್ಲಿ ಆಡುತ್ತಿದ್ದರು, ವಿದೇಶಿ ನೆಲದಲ್ಲಿ ಆಡುತ್ತಿದ್ದರು ತಮ್ಮ ಬಾಯಿಗೆ ಕೆಲಸ ಕೊಡುವುದರಲ್ಲಿ ಆಸೀಸ್​ ಪ್ಲೇಯರ್​ಗಳು ಎಂದು ಮುಂದಿರುತ್ತಾರೆ.

ಅದರಲ್ಲೂ ಇಂಗ್ಲೆಂಡ್, ಭಾರತ ಮತ್ತು ದಕ್ಷಿಣ ಆಫ್ರಿಕಾ ದೇಶಗಳ ತಂಡದ ವಿರುದ್ಧ ಆಡುವ ಸಂದರ್ಭದಲ್ಲಿ ಆಸೀಸ್ ಆಟಗಾರರು ಮೈಂಡ್​ ಗೇಮ್​ ಪ್ಲೇ ಮಾಡೋದರಲ್ಲಿ, ಮಾತಿನ ಮೂಲಕ ಆಕ್ರಮಣಕಾರಿ ಎದುರಾಳಿಯನ್ನ ಕುಗ್ಗಿಸುವ ಕೆಲಸ ಮಾಡ್ತಾರೆ. ಸದ್ಯ ಆಸ್ಟ್ರೇಲಿಯಾ ತಂಡ ಟೀಂ ಇಂಡಿಯಾ ವಿರುದ್ಧ ಟೆಸ್ಟ್​ ಪಂದ್ಯವನ್ನು ಆಡುತ್ತಿದ್ದು, ಟೆಸ್ಟ್ ಸರಣಿಯ ​ಮೊದಲ ಪಂದ್ಯದ ಮೊದಲ ದಿನವೇ ಆಸೀಸ್ ಆಟಗಾರರು ಮೈಂಡ್​ ಗೇಮ್​​ ಶುರು ಮಾಡಿದ್ದಾರೆ.

ಆಸ್ಟ್ರೇಲಿಯಾ ತಂಡ ಭಾರತದಲ್ಲಿ ನೆಲದಲ್ಲಿ ಕಾಲಿಡುತ್ತಿದ್ದಂತೆಯೇ ಆಸೀಸ್​ ಮಾಜಿ ಆಟಗಾರ ಟೀಂ ಇಂಡಿಯಾ ಬಗ್ಗೆ ಕೀಳಾಗಿ ಮಾತನಾಡಲು ಆರಂಭಿಸಿದ್ದರು. ಅಲ್ಲದೇ ಆಸೀಸ್ ಮಾಧ್ಯಮಗಳು ಕೂಡ ಭಾರತದಲ್ಲಿ ಸ್ಪಿನ್​ಗೆ ಸಹಕಾರಿ ಆಗುವ ಪಿಚ್​ಗಳನ್ನು ಸಿದ್ಧಪಡಿಸಲಾಗಿದೆ ಎಂದು ವರದಿಗಳನ್ನು ಬಿತ್ತರಿಸಿದ್ದವು.

ಇದರ ಬೆನ್ನಲ್ಲೇ ನಿನ್ನೆ ನಾಗ್ಪುರ ಮೈದಾನದಲ್ಲಿ ಆರಂಭವಾಗಿರುವ ಮೊದಲ ಟೆಸ್ಟ್‌ನ ಮೊದಲ ದಿನವೇ ಉಭಯ ತಂಡಗಳ ಆಟಗಾರರ ನಡುವೆ ಮೈಂಡ್ ಗೇಮ್ಸ್ ಆರಂಭವಾಗಿತ್ತು. ಅದರಲ್ಲೂ ಅಶ್ವಿನ್ ಮತ್ತು ಲಬುಶೇನ್ ನಡುವಿನ ಮೈಂಡ್ ಗೇಮ್ಸ್ ಅಭಿಮಾನಿಗಳನ್ನು ಸಖತ್ ರಂಜಿಸಿತ್ತು.

ಅಶ್ವಿನ್ ಎಸೆದ ಚೆಂಡು ಪಿಚ್​​ ಆಗಿ ಬ್ಯಾಟರ್​ಗೆ ಅಚ್ಚರಿಯಾಗುವಂತೆ ಬೌನ್ಸ್​ ಆಗಿ ಟರ್ನ್​ ಆಗಿತ್ತು. ಇದರಿಂದ ಬ್ಯಾಟ್​ ಬೀಸುತ್ತಿದ್ದ ಲಬುಶೇನ್​ ಕ್ಷಣ ಕಾಲ ಶಾಕ್​ಗೆ ಒಳಗಾಗಿದ್ದರು. ಆದರೆ ಇದನ್ನು ಮರೆಮಾಚಲು ಮೈಂಡ್ ಗೇಮ್​ ಶುರು ಮಾಡಿದ್ದ ಆತ, ಬೌಲರ್​ ಕಡೆ ತಿರುಗಿ ನನ್ನಿಂದ ಆಗುತ್ತೆ ಎಂದು ಸನ್ನೆ ಮಾಡಿದ್ದ. ಇತ್ತ ಲಬುಶೇನ್​ಗೆ ಕೌಂಟರ್​​ಗೆ ಕೊಟ್ಟ ಅಶ್ವಿನ್​, ಚೆಂಡು ತಿರುಗಿ ತಿರುಗಿ ನಿನ್ನತ್ತ ಬರುತ್ತೆ ಹುಷಾರು ಅಂತ ಕೈಯಲ್ಲಿ ಸನ್ನೆ ಮಾಡಿದ್ದರು. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗುತ್ತಿದೆ.

ಇತ್ತ ಆಸೀಸ್ ಮಾಜಿ ನಾಯಕ ಸ್ಟೀವ್ ಸ್ಮಿತ್ ಕೂಡ ತಮ್ಮ ಟ್ರೇಡ್ ಮಾರ್ಕ್ 'ನೋ ಕಾಲ್' ಮೂಲಕ ಟೀಂ ಇಂಡಿಯಾ ಬೌಲರ್​ಗಳಿಗೆ ಕಿರಿಕಿರಿ ಮಾಡಲು ಯತ್ನಿಸಿದ್ದರು. ಅಂದಹಾಗೇ, ಎಸೆತವನ್ನು ಎದುರಿಸಿದ ಬಳಿಕ ಸ್ಮಿತ್‌ ನಾನ್‌ಸ್ಟ್ರೈಕರ್‌ನ ತುದಿಗೆ 'ನೋ' ಎಂದು ಕೂಗುವ ಅಭ್ಯಾಸವಿದ್ದು, ಇದನ್ನು ಬೌಲರ್​ಗಳ ಯೋಜನೆಯನ್ನು ವಿಫಲಗೊಳಿಸಲು ಮೈಂಡ್​ ಗೇಮ್​ ರೀತಿ ಬಳಕೆ ಮಾಡ್ತಾರೆ ಎನ್ನಲಾಗಿದೆ.

ಜಡೇಜಾ ಬೌಲಿಂಗ್​​ ವೇಳೆಯೂ ಇಂತದ್ದೆ ಘಟನೆ ನಡೆದಿದೆ. ಜಡೇಜಾ ಎಸೆದ ಚೆಂಡು ಬಿಗ್​ ಟರ್ನ್​​ ತೆಗೆದುಕೊಳ್ಳುವ ಮೂಲಕ ಸ್ಮಿತ್​ಗೆ ಬ್ಯಾಟ್​​ಗೆ ಮಿಸ್​ ಆಗಿ ವಿಕೆಟ್​ಗಳ ಮೇಲೆ ಹಾದು ಹೋಗಿತ್ತು. ಇದರಿಂದ ಅಚ್ಚರಿಗೊಂಡ ಸ್ಮಿತ್, ತಮ್ಮ ಕೈಯನ್ನು ನೇರವಾಗಿ ಬೌಲರ್​ ಕಡೆ ತೋರಿಸಿ ಜೋರಾಗಿ ನೋ ಎಂದು ಕೂಗಿದ್ದರು. ಆ ಬಳಿಕ ಟೀಂ ಇಂಡಿಯಾ ಆಟಗಾರ ಜಡೇಜಾರ ಬೌಲಿಂಗ್​ ದಾಳಿಗೆ ಮೆಚ್ಚುಗೆ ನೀಡುತ್ತಿದ್ದ ವೇಳೆ ಸ್ಮಿತ್ ಕೂಡ ಥಂಬ್ಸ್ ಅಪ್​ ತೋರಿಸಿದ್ದರು.

ಇನ್ನು, ಮೊದಲ ಟೆಸ್ಟ್​ ಪಂದ್ಯದ ಮೊದಲ ದಿನವೇ ಬ್ಯಾಟಿಂಗ್​ನಲ್ಲಿ ವಿಫಲರಾದ ಆಸೀಸ್​ ಆಟಗಾರರು ಚಿತ್ರವಿಚಿತ್ರ ಸನ್ನೆಗಳೊಂದಿಗೆ ಅಭಿಮಾನಿಗಳಿಗೆ ಸಖತ್ ಮನರಂಜನೆಯನ್ನೇ ನೀಡಿದ್ದಾರೆ ಎಂದು ಹೇಳಬಹುದು. ಅದರಲ್ಲೂ ಅಶ್ವಿನ್ ಮತ್ತು ಲಬುಶೇನ್ ನಡುವಿನ ಸನ್ನೆಯ ಮೈಂಡ್​ ಗೇಮ್​​ ಅಭಿಮಾನಿಗಳಿಗೆ ಸಖತ್ ಥ್ರಿಲ್​ ಕೊಟ್ಟಿದ್ದು, ಮತ್ತೆ ಮುಂದುವರೆಯುತ್ತಾ ಕಾದು ನೋಡಬೇಕಿದೆ.