IND vs AUS 1st Test: ಅಶ್ವಿನ್ ಹೆಸರು ಕೇಳಿದ್ರೆ ಆಸ್ಟ್ರೇಲಿಯಾ ಕ್ರಿಕೆಟಿಗರಿಗೆ ನಡುಕ! ಹಲವು ದಾಖಲೆಗಳು ಉಡೀಸ್

ನಾಗ್ಪುರದ ವಿದರ್ಭ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಬಾರ್ಡರ್ ಗವಾಸ್ಕರ್ ಟ್ರೋಫಿಯ ಟೀಂ ಇಂಡಿಯಾ, ಆಸ್ಟ್ರೇಲಿಯಾ ನಡುವಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ರೋಹಿತ್ ಶರ್ಮಾ ಪಡೆ ಭರ್ಜರಿ ಗೆಲುವು ಸಾಧಿಸಿದೆ. ಪಂದ್ಯದಲ್ಲಿ ಟೀಂ ಇಂಡಿಯಾ ಇನ್ನಿಂಗ್ಸ್​​ ಜೊತೆಗೆ 132 ರನ್‌ಗಳೊಂದಿಗೆ ಜಯ ಸಾಧಿಸಿದೆ. ಆಸೀಸ್ ತಂಡ ತನ್ನ ಎರಡನೇ ಇನಿಂಗ್ಸ್​​ನಲ್ಲಿ ಕೇವಲ 91 ರನ್​ಗಳಿಗೆ ಆಲೌಟ್​ ಆಗಿತ್ತು. ಅಶ್ವಿನ್ ಸ್ಪಿನ್​ಗೆ ಮೋಡಿಗೆ ಆಸೀಸ್ ಬೆಚ್ಚಿ ಬಿದ್ದಿತ್ತು.

ಅನುಭವಿ ಸ್ಪಿನ್ನರ್ ಅಶ್ವಿನ್​​ ಅವರ ಕೈಚಳಕ ಆಸ್ಟ್ರೇಲಿಯಾ ಸೋಲಿಗೆ ಕಾರಣವಾಗಿತ್ತು. ಆಸೀಸ್​ ಬ್ಯಾಟರ್​​ಗಳಲ್ಲಿ ಸ್ಮಿತ್ ಮಾತ್ರ 25 ರನ್​ ಗಳಿಸಿ ಪರವಾಗಿಲ್ಲ ಎನಿಸಿಕೊಂಡಿದ್ದರು. ಉಳಿದಂತೆ ಎಲ್ಲಾ ಬ್ಯಾಟರ್​​ಗಳು 20 ರನ್​​ಗಳಿಗಿಂತ ಹೆಚ್ಚಿನ ಮೊತ್ತ ದಾಟಿಲ್ಲ. ಆರಂಭಿಕ ಡೇವಿಡ್​ ವಾರ್ನರ್​ 10 ರನ್​​, ಲಾಬುಶೇನ್ 17 ರನ್, ಅಲೆಕ್ಸ್ ಕ್ಯಾರಿ 10 ರನ್ ಗಳಿಸಿದ್ದರು. ಉಳಿದ ಬ್ಯಾಟರ್‌ಗಳು ಒಂದಂಕಿ ಮೊತ್ತಕ್ಕೆ ವಿಕೆಟ್ ಒಪ್ಪಿಸಿದ್ದರು.

ಟೀಂ ಇಂಡಿಯಾ ಪರ ಅಶ್ವಿನ್ ಐದು ವಿಕೆಟ್​ ಪಡೆದುಕೊಂಡರೆ, ಜಡೇಜಾ ಮತ್ತು ಶಮಿ ತಲಾ ಎರಡು ವಿಕೆಟ್​ ಹಾಗೂ ಅಕ್ಷರ್ ಪಟೇಲ್ ಒಂದು ವಿಕೆಟ್​ ಪಡೆದುಕೊಂಡಿದ್ದಾರೆ. ಅಶ್ಚಿನ್ ಈ ಪಂದ್ಯದಲ್ಲಿ ಕನ್ನಡಿಗ ಅನಿಲ್ ಕುಂಬ್ಳೆ ಸಾಧನೆಯನ್ನು ಸಮಗೊಳಿಸಿದ್ದು, ಸ್ವದೇಶದಲ್ಲಿ 25 ಬಾರಿ 5 ವಿಕೆಟ್ ಗೊಂಚಲು ಪಡೆದ ಸಾಧನೆ ಮಾಡಿದ್ದಾರೆ.

ಅಶ್ವಿನ್ ಮತ್ತೊಂದು ದಾಖಲೆಯನ್ನು ತನ್ನದಾಗಿಸಿಕೊಂಡಿದ್ದು, ಹೆಚ್ಚು ಮಂದಿ ಎಡಗೈ ಬ್ಯಾಟರ್​​ಗಳನ್ನು ಔಟ್ ಮಾಡಿದ ದಾಖಲೆ ನಿರ್ಮಿಸಿದ್ದಾರೆ. 166 ಪಂದ್ಯಗಳಿಂದ ಅಶ್ವಿನ್​ ಈ ಸಾಧನೆ ಮಾಡಿದ್ದು, ಇದುವರೆಗೂ ಎಡಗೈ ಆಟಗಾರರನ್ನು 230 ಬಾರಿ ಔಟ್ ಮಾಡಿದ್ದಾರೆ.

ಮತ್ತೊಂದೆಡೆ ಒಂದೇ ಇನ್ನಿಂಗ್ಸ್‌ನಲ್ಲಿ ಐದು ವಿಕೆಟ್ ಪಡೆದ ಬೌಲರ್‌ಗಳ ಪಟ್ಟಿಯಲ್ಲಿ ಅಶ್ವಿನ್ ಏಳನೇ ಸ್ಥಾನದಲ್ಲಿದ್ದಾರೆ. ಈ ಪಟ್ಟಿಯಲ್ಲಿ ಸ್ಪಿನ್ ಕಿಂಗ್ ಮುರಳೀಧರನ್ ಮೊದಲ ಸ್ಥಾನದಲ್ಲಿದ್ದಾರೆ.

ಉಳಿದಂತೆ ಆಸ್ಟ್ರೇಲಿಯಾ ಅನುಭವಿ ಆರಂಭಿಕ ಆಟಗಾರ ಡೇವಿಡ್​ ವಾರ್ನರ್​ ಅವರನ್ನು 11 ಬಾರಿ ಔಟ್ ಮಾಡಿ ಅಶ್ವಿನ್ ದಾಖಲೆ ಮಾಡಿದ್ದಾರೆ. ಟೀಂ ಇಂಡಿಯಾ ಪರ ಟೆಸ್ಟ್ ಕ್ರಿಕೆಟ್​​ನ ಓರ್ವ ಬ್ಯಾಟರ್​​​ಅನ್ನು ಹೆಚ್ಚು ಬಾರಿ ಔಟ್ ಮಾಡಿದ ಪಟ್ಟಿಯಲ್ಲಿ ಅಶ್ವಿನ್ ಎರಡನೇ ಸ್ಥಾನದಲ್ಲಿದ್ದು, ಕಪೀಲ್​ ದೇವ್ ಅವರು ಮೊದಲ ಸ್ಥಾನದಲ್ಲಿದ್ದಾರೆ.

ಇನ್ನು, ಟೀಂ ಇಂಡಿಯಾ ಸ್ಪಿನ್​ ಬೌಲರ್​ಗಳಾದ ಅಶ್ವಿನ್​, ಜಡೇಜಾ ಸ್ಪರ್ಧೆಗೆ ಬಿದ್ದಂತೆ ಆಸ್ಟ್ರೇಲಿಯಾ ಆಟಗಾರರ ವಿಕೆಟ್​ ಪಡೆದುಕೊಂಡಿದ್ದಾರೆ. ಆಸೀಸ್ ವಿರುದ್ಧದ ಟೆಸ್ಟ್​ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ ಜಡೇಜಾ 5 ವಿಕೆಟ್​​ಗಳನ್ನು ಪಡೆದುಕೊಂಡಿದ್ದರು. ಇತ್ತ ಎರಡನೇ ಇನ್ನಿಂಗ್ಸ್​ನಲ್ಲಿ ಅಶ್ವಿನ್ 5 ವಿಕೆಟ್​ ಗಳಿಸಿದ್ದಾರೆ. ಎರಡು ಇನ್ನಿಂಗ್ಸ್​ಗಳಲ್ಲಿ ಅಶ್ವಿನ್ 8 ವಿಕೆಟ್​, ಜಡೇಜಾ 7 ವಿಕೆಟ್ ಗಳಿಸಿದ್ದಾರೆ.