HBD Suresh Raina: ಮಿಸ್ಟರ್‌ ಐಪಿಎಲ್‌ಗೆ 36ನೇ ಜನ್ಮದಿನದ ಸಂಭ್ರಮ, ಲೈಫಲ್ಲಿ ಸೆಂಚುರಿ ಸಿಡಿಸಿ ಅಂತ ಫ್ಯಾನ್ಸ್ ಹಾರೈಕೆ!

ಭಾರತದ ಮಾಜಿ ಸ್ಟಾರ್ ಬ್ಯಾಟ್ಸ್‌ಮನ್ ಸುರೇಶ್ ರೈನಾ (Suresh Raina) ಇಂದು 36ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ. ರೈನಾ ಒಂದು ಕಾಲದಲ್ಲಿ ಸೀಮಿತ ಓವರ್‌ಗಳ ಸ್ವರೂಪದಲ್ಲಿ ತಂಡದ ಅತ್ಯಂತ ವಿಶ್ವಾಸಾರ್ಹ ಆಟಗಾರರಾಗಿದ್ದರು. 27 ನವೆಂಬರ್ 1986 ರಂದು ಗಾಜಿಯಾಬಾದ್‌ನಲ್ಲಿ ಜನಿಸಿದ ರೈನಾ ಭಾರತಕ್ಕಾಗಿ 226 ODI, 78 T20 ಮತ್ತು 18 ಟೆಸ್ಟ್ ಪಂದ್ಯಗಳನ್ನು ಆಡಿದ್ದಾರೆ.

ಸುರೇಶ್ ರೈನಾ ಅವರ ತಂದೆ ಜಮ್ಮು ಮತ್ತು ಕಾಶ್ಮೀರ ಪ್ರದೇಶದ ರೈನಾವರಿ ನಿವಾಸಿಯಾಗಿದ್ದು, ಅವರ ತಾಯಿ ಹಿಮಾಚಲ ಪ್ರದೇಶದವರು. ಮಧ್ಯಮ ಕ್ರಮಾಂಕದಲ್ಲಿ ವೇಗದ ಬ್ಯಾಟಿಂಗ್, ಅರೆಕಾಲಿಕ ಸ್ಪಿನ್ ಬೌಲಿಂಗ್ ಮತ್ತು ಅತ್ಯುತ್ತಮ ಫೀಲ್ಡಿಂಗ್ ಮೂಲಕ ಸುರೇಶ್ ರೈನಾ ಟೀಂ ಇಂಡಿಯಾದಲ್ಲಿ ಹೊಸ ಸಂಚಲನ ಮೂಡಿಸಿದ್ದರು.

ಎಲ್ಲಾ ಮೂರು ಮಾದರಿಗಳಲ್ಲಿ ಶತಕ ಬಾರಿಸಿದ ಮೊದಲ ಭಾರತೀಯ ಎಂಬ ದಾಖಲೆಯನ್ನು ಸುರೇಶ್ ರೈನಾ ಹೊಂದಿದ್ದಾರೆ. 2010ರಲ್ಲಿ, ಅವರು ಶ್ರೀಲಂಕಾ ವಿರುದ್ಧದ ತಮ್ಮ ಚೊಚ್ಚಲ ಟೆಸ್ಟ್ ಪಂದ್ಯದಲ್ಲಿ ಈ ದಾಖಲೆಯನ್ನು ಮಾಡಿದ್ದರು. ಐಪಿಎಲ್‌ನಲ್ಲಿ ಮೊದಲು 3000 ರನ್ ಪೂರೈಸಿದ ದಾಖಲೆ ರೈನಾ ಹೆಸರಿನಲ್ಲಿದೆ. ಟಿ20 ಮತ್ತು ಏಕದಿನ ವಿಶ್ವಕಪ್‌ನಲ್ಲಿ ಶತಕ ಸಿಡಿಸಿದ ಏಕೈಕ ಭಾರತೀಯ ಬ್ಯಾಟ್ಸ್‌ಮನ್ ರೈನಾ.

ರೈನಾ 18 ಟೆಸ್ಟ್ ಪಂದ್ಯಗಳಲ್ಲಿ 26.48 ಸರಾಸರಿಯಲ್ಲಿ 768 ರನ್ ಗಳಿಸಿದ್ದರೆ, 226 ODIಗಳಲ್ಲಿ 35.41 ಸರಾಸರಿಯಲ್ಲಿ 5615 ರನ್ ಗಳಿಸಿದ್ದಾರೆ. ಟಿ20 ಬಗ್ಗೆ ಮಾತನಾಡುವಾಗ ಅವರು 78 ಪಂದ್ಯಗಳಲ್ಲಿ 1604 ರನ್ ಗಳಿಸಿದ್ದಾರೆ.

ರೈನಾಗೆ ಹಾಡುಗಾರಿಕೆಯ ಹೊರತಾಗಿ ಅಡುಗೆ ಮಾಡುವುದು ತುಂಬಾ ಇಷ್ಟವಂತೆ. ನಾಯಕನಾಗಿ ಮೊದಲ ಬಾರಿಗೆ ತಂಡದೊಂದಿಗೆ ಹೋದಾಗ ಇಡೀ ತಂಡಕ್ಕೆ ಅಡುಗೆ ಮಾಡಿದ್ದೆ ಎಂದು ಸಂದರ್ಶನವೊಂದರಲ್ಲಿ ಹೇಳಿದ್ದರು.

ಎಂಎಸ್ ಧೋನಿ ಅವರು ಆಗಸ್ಟ್ 15, 2020 ರಂದು ನಿವೃತ್ತಿ ಘೋಷಿಸಿದ್ದರು ಮತ್ತು ಅಂದೇ ಸುರೇಶ್ ರೈನಾ ಕೂಡ ಅಂತರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳಿದರು. ಅಲ್ಲದೇ ಧೊನಿ ಮತ್ತು ರೈನಾ ಅದ್ಭುತ ಸ್ನೇಹಿತರು. ಈಗಲೂ ಸಹ ರೈನಾ ಅವರ ಫೇಸ್​ಬುಕ್​ ಡಿಪಿ ಅಲ್ಲಿ ಧೋನಿ ಜೊತೆಗಿನ ಫೋಟೋ ಇದೆ.

ಸುರೇಶ್ ರೈನಾ ಟಿ20ಯಲ್ಲಿ 6000 ಮತ್ತು 8000 ರನ್ ಗಳಿಸಿದ ಭಾರತದ ಮೊದಲ ಕ್ರಿಕೆಟಿಗ. ರೈನಾ ಚೆನ್ನೈ ಸೂಪರ್ ಕಿಂಗ್ಸ್, ಗುಜರಾತ್ ಲಯನ್ಸ್, ಟೀಂ ಇಂಡಿಯಾ ಮತ್ತು ಉತ್ತರ ಪ್ರದೇಶ ಪರ ಆಡುವಾಗ ಈ ಸಾಧನೆ ಮಾಡಿದ್ದಾರೆ.

ಮಿಸ್ಟರ್ ಐಪಿಎಲ್ ಎಂದೇ ಖ್ಯಾತಿಯಾಗಿರುವ ರೈನಾ ಐಪಿಎಲ್‌ನಲ್ಲಿ 5000 ರನ್ ಪೂರೈಸಿದ ಮೊದಲ ಕ್ರಿಕೆಟಿಗ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಇದಲ್ಲದೇ ಸತತ 7 ಸೀಸನ್‌ಗಳಲ್ಲಿ 400ಕ್ಕೂ ಹೆಚ್ಚು ರನ್ ಗಳಿಸಿದ ಏಕೈಕ ಐಪಿಎಲ್ ಆಟಗಾರ.