RIP Pele: ಫುಟ್ಬಾಲ್​ ದಂತಕಥೆ ಪೀಲೆ ಇನ್ನಿಲ್ಲ, ಶೋಕಸಾಗರದಲ್ಲಿ ಮುಳುಗಿದ ಅಭಿಮಾನಿಗಳು!

ಫುಟ್​ಬಾಲ್​ ದಂತಕಥೆ ಪೀಲೆ (Pele) ಕೊನೆಯುಸಿರೆಳೆದಿದ್ದಾರೆ. ಕೊಲೊನ್ ಟ್ಯೂಮರ್ ನಂತರ ಕ್ಯಾನ್ಸರ್​ ಚಿಕಿತ್ಸೆಯಲ್ಲಿದ್ದ 82 ವರ್ಷದ ಪೀಲೆ ನಿಧನರಾಗಿದ್ದಾರೆ.

ಸಾರ್ವಕಾಲಿಕ ಶ್ರೇಷ್ಠ ಫುಟ್ಬಾಲ್ ಆಟಗಾರ ಎಂದು ಪರಿಗಣಿಸಲ್ಪಟ್ಟ ಎಡ್ಸನ್ ಅರಾಂಟೆಸ್ ಡೊ ನಾಸಿಮೆಂಟೊ ಪೀಲೆ ಅವರ ನಿಜವಾದ ಹೆಸರಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚು ದುರ್ಬಲವಾದ ಆರೋಗ್ಯದಿಂದ ಅವರು ಬಳಲುತ್ತಿದ್ದರು.

ಪೀಲೆ ಅವರು ಸ್ವಲ್ಪ ಸಮಯದವರೆಗೆ ಕ್ಯಾನ್ಸರ್‌ನೊಂದಿಗೆ ಹೋರಾಡುತ್ತಿದ್ದರು. ಇತ್ತೀಚೆಗೆ, ಅವರ ಆರೋಗ್ಯ ಸ್ಥಿತಿಯು ಹದಗೆಟ್ಟಿತ್ತು ಎಂದು ವೈದ್ಯರು ಈ ವಾರದ ಆರಂಭದಲ್ಲಿ ಘೋಷಿಸಿದ್ದರು.

ಮೂರು ವಿಶ್ವಕಪ್‌ಗಳನ್ನು ಗೆದ್ದ ಇತಿಹಾಸದಲ್ಲಿ ಏಕೈಕ ಆಟಗಾರ ಎಂಬ ಹೆಗ್ಗಳಿಕೆಗೆ (1958, 1962 ಮತ್ತು 1970), ಪೀಲೆ ಅವರು 1977ರಲ್ಲಿ ನಿವೃತ್ತರಾಗುವ ಮೊದಲು 1,000 ಕ್ಕೂ ಹೆಚ್ಚು ಗೋಲುಗಳನ್ನು ಗಳಿಸಿದ ಕ್ರೀಡೆಯಲ್ಲಿ ಅತ್ಯಂತ ಶ್ರೇಷ್ಠ ವೃತ್ತಿಜೀವನವನ್ನು ಹೊಂದಿದ್ದರು.

1956ರಿಂದ 1974ರ ವರೆಗೆ ಬ್ರೆಝಿಲ್​ನ ಸ್ಯಾಂಟೋಸ್ ಕ್ಲಬ್ ಪರ ಆಡಿದ್ದ ಪೀಲೆ 757 ಪಂದ್ಯಗಳಲ್ಲಿ 643 ಗೋಲ್ ಬಾರಿಸಿ ಫುಟ್​ಬಾಲ್ ಇತಿಹಾಸದಲ್ಲೇ ಯಾರು ಮಾಡದ ಸಾಧನೆ ಮರೆದಿದ್ದರು.

ಈ ಅಪೂರ್ವ ದಾಖಲೆಯನ್ನು ಮೆಸ್ಸಿ 644 ಗೋಲು ಗಳಿಸುವುದರೊಂದಿಗೆ ಮುರಿದಿದ್ದರು. 17 ಸೀಸನ್​ಗಳಿಂದ ಬಾರ್ಸಿಲೋನಾ ಫುಟ್​ಬಾಲ್ ಕ್ಲಬ್ ಪರ ಕಣಕ್ಕಿಳಿಯುತ್ತಿರುವ ಅರ್ಜೆಂಟೀನಾ ಆಟಗಾರ ಮೆಸ್ಸಿ 644 ಗೋಲ್‌ಗಳನ್ನು ಬಾರಿಸುವ ಮೂಲಕ ಈ ಅಪರೂಪದ ದಾಖಲೆ ನಿರ್ಮಿಸಿದ್ದರು.

ಇನ್ನೂ ಪೀಲೆ ನಿಧನಕ್ಕೆ ಫುಟ್​ಬಾಲ್​ ಪ್ರೇಮಿಗಳು ಕಣ್ಣೀರಿಡುತ್ತಿದ್ದಾರೆ. ಜೊತೆಗೆ ಮೆಸ್ಸಿ ಹಾಗೂ ರೊನಾಲ್ಡೋ ಸಂತಾಪ ಸೂಚಿಸಿದ್ದಾರೆ.

ಅಕ್ಟೋಬರ್ 23, 1940 ರಂದು ಮಿನಾಸ್ ಗೆರೈಸ್ ಪಟ್ಟಣವಾದ ಟ್ರೆಸ್ ಕೊರಾಸ್ ನಲ್ಲಿ ಪೀಲೆ ಜನಿಸಿದರು. ತನ್ನ ತಂದೆಯಿಂದ ಈ ಫುಟ್​ಬಾಲ್​ ಆಟವನ್ನು ಕಲಿತಿದ್ದರು.