FIFA World Cup 2026: 2026 ಫಿಫಾ ವಿಶ್ವಕಪ್​ ಮಹಾಯುದ್ಧದಲ್ಲಿ ಟೀಂ ಇಂಡಿಯಾ? ಸುನೀಲ್​ ಛೇತ್ರಿಗೆ ಗೋಲ್ಡನ್​ ಬೂಟ್​ ಪಕ್ಕಾ ಎಂದ ಫ್ಯಾನ್ಸ್

ಒಂದು ತಿಂಗಳ ಕಾಲ ಕತಾರ್‌ನಲ್ಲಿ ನಡೆದ ಫಿಫಾ ಫುಬಾಲ್ ವಿಶ್ವಕಪ್ 2022 ಮುಕ್ತಾಯಗೊಂಡಿದೆ. ಕಳೆದ ಭಾನುವಾರ ನಡೆದ ಫೈನಲ್‌ನಲ್ಲಿ ಲಿಯೋನೆಲ್ ಮೆಸ್ಸಿ ನಾಯಕತ್ವದ ಅರ್ಜೆಂಟೀನಾ ಪೆನಾಲ್ಟಿ ಶೂಟೌಟ್‌ನಲ್ಲಿ ಫ್ರಾನ್ಸ್ ತಂಡವನ್ನು ಸೋಲಿಸಿ 36 ವರ್ಷಗಳ ನಂತರ ಮತ್ತೊಮ್ಮೆ ವಿಶ್ವಕಪ್ ಟ್ರೋಫಿಗೆ ಮುತ್ತಿಕ್ಕಿತು.

ಫುಟ್ಬಾಲ್ ವಿಶ್ವಕಪ್ ಗೆದ್ದ ನಂತರ ಲಿಯೋನೆಲ್ ಮೆಸ್ಸಿ ಅವರ ಕನಸು ನನಸಾಗಿದೆ. ಈ ಮೂಲಕ ಮೆಸ್ಸಿ ಮುಂದಿನ ವಿಶ್ವಕಪ್​ನಲ್ಲಿ ಕಣಕ್ಕಿಳಿಯುವುದು ಅನುಮಾನವಾಗಿದೆ.

ಇನ್ನು ಭಾರತೀಯ ಫುಟ್ಬಾಲ್ ತಂಡದ ವಿಷಯಕ್ಕೆ ಬಂದರೆ ನಾವು ಇನ್ನೂ ಸಾಕರ್ ಜಗತ್ತಿನಲ್ಲಿ ಶಿಶುಗಳು ಎಂದು ಹೇಳಬಹುದು. 92 ವರ್ಷಗಳ ವಿಶ್ವಕಪ್ ಇತಿಹಾಸದಲ್ಲಿ ಭಾರತ ಒಂದು ಬಾರಿಯೂ ನೇರವಾಗಿ ಅರ್ಹತೆ ಪಡೆದಿಲ್ಲ. ಬ್ರೆಜಿಲ್‌ನಲ್ಲಿ ನಡೆದ 1950ರ ಫುಟ್‌ಬಾಲ್ ವಿಶ್ವಕಪ್‌ಗೆ ಭಾರತವನ್ನು ಆಹ್ವಾನಿಸಲಾಯಿತು, ಆದರೆ ಹಲವಾರು ಕಾರಣಗಳಿಂದ ಭಾರತವು ದೂರ ಉಳಿಯಿತು.

ವಿಶ್ವಕಪ್‌ಗೆ ಅರ್ಹತೆ ಪಡೆಯುವ ಸ್ಪರ್ಧೆಯ ಮೊದಲ ಸುತ್ತಿನಿಂದ ಭಾರತ ಹಿಂದೆ ಸರಿದಿದೆ. 2022 ರ FIFA ವಿಶ್ವಕಪ್‌ಗಾಗಿ ಅರ್ಹತಾ ಸ್ಪರ್ಧೆಯಲ್ಲಿ, ಭಾರತವು ಮೊದಲ ಸುತ್ತಿನಿಂದ ಹೊರಬಿದ್ದಿತ್ತು.

ಮೆಕ್ಸಿಕೊ ಮತ್ತು ಕೆನಡಾ 2026 ರ ಫಿಫಾ ವಿಶ್ವಕಪ್ ಅನ್ನು ಅಮೆರಿಕದೊಂದಿಗೆ ಆಯೋಜಿಸುತ್ತಿವೆ. ಆದರೆ 2026ರ ವಿಶ್ವಕಪ್‌ನಿಂದ ಸ್ವರೂಪ ಬದಲಾಗಲಿದೆ. ತಂಡಗಳ ಸಂಖ್ಯೆ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಲಿದೆ.

ಪ್ರಸ್ತುತ, ಕೇವಲ 32 ತಂಡಗಳು ವಿಶ್ವಕಪ್​​ ಅಂತಿಮ ತಂಡವಾಗಿ ಕಣಕ್ಕಿಳಿಯುತ್ತಿದ್ದವು. ಆದರೆ ಇದೀಗ ಈ ಸಂಖ್ಯೆ 2026ರಲ್ಲಿ 48ಕ್ಕೆ ತಲುಪಲಿದೆ. ಪ್ರತಿ ಗುಂಪಿಗೆ 3 ತಂಡಗಳಂತೆ 16 ಗುಂಪುಗಳಾಗಿ ವಿಂಗಡಿಸಲಾಗುತ್ತದೆ. ಅಗ್ರ 2 ರಲ್ಲಿ ನಿಲ್ಲುವ ಎಲ್ಲಾ 32 ತಂಡಗಳು ನಾಕೌಟ್ ತಲುಪುತ್ತವೆ. ಏಷ್ಯಾದ 5 ತಂಡಗಳು ಮಾತ್ರ 2022ರ ವಿಶ್ವಕಪ್‌ಗೆ ನೇರವಾಗಿ ಅರ್ಹತೆ ಪಡೆದಿವೆ. ಕತಾರ್ ಆತಿಥೇಯರಾಗಿ ಅರ್ಹತೆ ಪಡೆದಿತ್ತು.

ಏಷ್ಯಾದ 8 ಅಥವಾ 9 ತಂಡಗಳು 2026ರ ವಿಶ್ವಕಪ್‌ಗೆ ಅರ್ಹತೆ ಪಡೆಯುವ ಸಾಧ್ಯತೆಯಿದೆ. ಭಾರತಕ್ಕೆ ಇದೊಂದು ಅದ್ಭುತ ಅವಕಾಶ ಎಂದೇ ಹೇಳಬೇಕು. ಸದ್ಯ ಭಾರತ ರ‍್ಯಾಂಕಿಂಗ್ ನಲ್ಲಿ ಏಷ್ಯಾದಲ್ಲಿ 106ನೇ ಸ್ಥಾನದಲ್ಲಿದೆ. ಜಪಾನ್, ಕೊರಿಯಾ, ಸೌದಿ ಅರೇಬಿಯಾ, ಇರಾನ್, ಆಸ್ಟ್ರೇಲಿಯಾ, ಕತಾರ್, ಯುಎಇ ಏಷ್ಯಾದ ಬಲಿಷ್ಠ ತಂಡಗಳಾಗಿವೆ.

ಭಾರತ ತನ್ನ ಸಾಮರ್ಥ್ಯ ಮೀರಿ ಆಡಿದರೆ 2026ರ ವಿಶ್ವಕಪ್ ಗೆ ಅರ್ಹತೆ ಪಡೆಯುವುದು ಖಚಿತ. ಅದು ನಡೆದರೆ ಭಾರತೀಯ ಫುಟ್‌ಬಾಲ್‌ನ ಸುವರ್ಣಯುಗ ಆರಂಭವಾಗಲಿದೆ. ಇಂಡಿಯನ್ ಸೂಪರ್ ಲೀಗ್‌ನ ಪ್ರವೇಶದೊಂದಿಗೆ, ಭಾರತದ ಆಟವು ಮೊದಲಿಗಿಂತ ಉತ್ತಮವಾಗಿದೆ. ಅಲ್ಲದೇ 2026ರಲ್ಲಿ ವಿಶ್ವಕಪ್​ ಪ್ರವೇಶಿಸಿದರೆ ಭಾರತದ ಫುಟ್​ಬಾಲ್​ ದಂತಕಥೆ ಸುನೀಲ್​ ಛೇತ್ರಿ ತಂಡಲ್ಲಿ ಇರುತ್ತಾರಾ ಎಂಬುದು ಕಾದುನೋಡಬೇಕಿದೆ.