IPL 2023: ಲಕ್ಷ ಲಕ್ಷ ಬೆಲೆಬಾಳುವ ಬ್ಯಾಟ್, ಗ್ಲೌಸ್​ ಕಳ್ಳತನ! ಡೆಲ್ಲಿ ತಂಡಕ್ಕೆ ತಲೆನೋವಾದ ಕಳ್ಳರು

ಡೆಲ್ಲಿ ಕ್ಯಾಪಿಟಲ್ಸ್‌ನ ಆಟಗಾರರಿಗೆ ಇದೀಗ ಕಳ್ಳರ ಭಯ ಹೆಚ್ಚಿಸಿದೆ. ಸಾಲು ಸಾಲು ಸೋಲಿನಿಂದ ಕಂಗೆಟ್ಟಿರುವ ತಂಡಕ್ಕೆ ಇದೀಗ ಕಳ್ಳತನದ ತಲೆನೋವು ಹುಟ್ಟಿಕೊಂಡಿದೆ. ಹೌದು, ಕಳ್ಳರು ಡೆಲ್ಲಿ ಆಟಗಾರರ ಅನೇಕ ವಸ್ತುಗಳನ್ನು ಕದ್ದಿದ್ದಾರೆ.

ಡೆಲ್ಲಿ ಕ್ರಿಕೆಟಿಗರ ಕಿಟ್ ಬ್ಯಾಗ್ ಗಳನ್ನು ಕಳ್ಳರು ಕದ್ದಿದ್ದಾರೆ. ಡೇವಿಡ್ ವಾರ್ನರ್‌ನಿಂದ ಹಿಡಿದು ಮಿಚೆಲ್ ಮಾರ್ಷ್ ಮತ್ತು ಇತರ ಕ್ರಿಕೆಟಿಗರ ವಸ್ತುಗಳು ಕಳ್ಳತನವಾಗಿದೆ. ಕಳ್ಳರು ಚಿನ್ನ, ಬೆಳ್ಳಿ ವಸ್ತುಗಳ ಬದಲು ಬ್ಯಾಟ್, ಬಾಲ್, ಶೂ, ಪ್ಯಾಡ್ ಗಳನ್ನು ಕದ್ದಿದ್ದಾರೆ.

ಆದರೆ ಇದರ ನಡುವೆ ಕಳ್ಳರು ಇದೆನ್ನೆಲ್ಲಾ ಕದ್ದು ಏನು ಮಾಡುತ್ತಾರೆ ಎಂಬ ಪ್ರಶ್ನೆ ಉದ್ಭವಿಸಿದೆ. ಈ ಸಂಬಂಧ ದೆಹಲಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಆದರೆ, ಇನ್ನೂ ಎಫ್‌ಐಆರ್‌ ದಾಖಲಾಗಿಲ್ಲ. ಮಾಧ್ಯಮ ವರದಿಗಳ ಪ್ರಕಾರ, ಹೈದರಾಬಾದ್‌ನಿಂದ ದೆಹಲಿಗೆ ಹಿಂದಿರುಗಿದ ನಂತರ, ಡೇವಿಡ್ ವಾರ್ನರ್ ನೇತೃತ್ವದ ತಂಡ ಕಳ್ಳತನಕ್ಕೆ ಗುರಿಯಾಗಿದೆ.

ಹೈದರಾಬಾದ್ ನಿಂದ ದೆಹಲಿಗೆ ಬರುವಾಗ ಎಲ್ಲ ಕ್ರಿಕೆಟಿಗರ ಬ್ಯಾಗ್ ನಲ್ಲಿದ್ದ ಒಟ್ಟು 16 ಬ್ಯಾಟ್ ಗಳು ಕಳ್ಳತನವಾಗಿವೆ ಎಂದು ತಿಳಿದುಬಂದಿದೆ. ಕ್ರಿಕೆಟಿಗರ ಕಿಟ್‌ನಲ್ಲಿ ಬ್ಯಾಟ್, ಪ್ಯಾಡ್ ಕಳ್ಳತನವಾಗಿದೆ.

ಅದೇ ಸಾಲಿನಲ್ಲಿ ಹಲವು ಕ್ರಿಕೆಟಿಗರ ಶೂ ಕೂಡ ನಾಪತ್ತೆಯಾಗಿದೆ. ಕ್ರಿಕೆಟಿಗರ ಕಿಟ್ ಬ್ಯಾಗ್ ತುಂಬಾ ದುಬಾರಿಯಾಗಿರುತ್ತದೆ. ಪ್ರತಿ ಕಿಟ್ ಬ್ಯಾಗ್ ಬೆಲೆ ಸುಮಾರು ಒಂದು ಲಕ್ಷಕ್ಕೂ ಹೆಚ್ಚಿನ ವಸ್ತುಗಳು ಕಳ್ಳಯನವಾಗಿದೆ. ಅಲ್ಲದೇ 1 ಬ್ಯಾಟ್​ ಬೆಲೆಯೇ ಸುಮಾರು 1 ಲಕ್ಷವಾಗಿದೆಯಂತೆ.

ಡೆಲ್ಲಿ ಕ್ಯಾಪಿಟಲ್ಸ್‌ನ ಮುಂಬರುವ ಪಂದ್ಯಗಳನ್ನು ಗಮನದಲ್ಲಿಟ್ಟುಕೊಂಡು, ಈಗ ಕ್ರಿಕೆಟಿಗರಿಗೆ ಹೊಸ ಐಟಂಗಳನ್ನು ಆರ್ಡರ್ ಮಾಡಲಾಗುತ್ತಿದೆ. ಡೆಲ್ಲಿ ತನ್ನ ಮುಂದಿನ ಪಂದ್ಯವನ್ನು ಗುರುವಾರ ಮಧ್ಯಾಹ್ನ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಆಡಬೇಕಾಗಿದೆ.

ವರದಿ ಪ್ರಕಾರ, ಡೇವಿಡ್ ವಾರ್ನರ್, ಮಿಚೆಲ್​ ಮಾರ್ಷ್, ಯಶ್ ಧುಲ್ ಮತ್ತು ಇತರ ಆಟಗಾರರು ದೆಹಲಿಯ ತಮ್ಮ ಹೋಟೆಲ್‌ಗೆ ತಲುಪಿದಾಗ, ಅವರು ತಮ್ಮ ಕಿಟ್ ಬ್ಯಾಗ್‌ಗಳನ್ನು ಪರಿಶೀಲಿಸಿದರು. ಈ ವೇಳೆ ಬ್ಯಾಟ್​ಗಳು ಕಳ್ಳತನವಾಗಿರುವುದು ತಿಳಿದುಬಂದಿದೆ. ಆದರೆ ಆಟಗಾರರ ಬ್ಯಾಗ್​ಗಳನ್ನು ರಕ್ಷಿಸಿಕೊಳ್ಳುವುದು ಫ್ರಾಂಚೈಸಿಯ ಜವಾಬ್ದಾರಿಯಾಗಿರುತ್ತದೆ. ಈ ಬೆಳವಣಿಗೆಯ ಬಗ್ಗೆ ಐಜಿಐ ಪೊಲೀಸರಿಗೆ ಮಾಹಿತಿ ನೀಡಲಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.