IPL 2023: ಐಪಿಎಲ್​ನಲ್ಲಿ ಮತ್ತೊಬ್ಬ ಭಾರತೀಯ ಸ್ಟಾರ್​ ಪ್ಲೇಯರ್​ ಇಂಜುರಿ, ವಿಶ್ವಕಪ್​ಗೂ ಮುನ್ನ ಹೆಚ್ಚಾಯ್ತು ಟೀಂ ಇಂಡಿಯಾ ಟೆನ್ಷನ್​!

ಐಪಿಎಲ್ 2023ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಸತತ ಎರಡನೇ ಗೆಲುವು ದಾಖಲಿಸಿದೆ. ಆದರೆ ಪಂದ್ಯದ ವೇಳೆ ಸಿಎಸ್​ಕೆಗೂ ದೊಡ್ಡ ಪೆಟ್ಟು ಬಿದ್ದಿತ್ತು. ವೇಗದ ಬೌಲರ್ ದೀಪಕ್ ಚಹಾರ್ ಕೇವಲ ಒಂದು ಓವರ್ ಬೌಲಿಂಗ್ ಮಾಡಿದ ನಂತರ ಮೈದಾನದಿಂದ ಹೊರ ಹೋದರು. ಆದರೆ ಮುಂಬೈ ಇಂಡಿಯನ್ಸ್ ವಿರುದ್ಧ ಸಿಎಸ್ ಕೆ ತಂಡ ಗೆಲುವು ದಾಖಲಿಸುವಲ್ಲಿ ಯಶಸ್ವಿಯಾಗಿದೆ.

ಪಂದ್ಯದಲ್ಲಿ ಮುಂಬೈ ತಂಡ ಮೊದಲು ಆಡುವಾಗ ಕೇವಲ 157 ರನ್ ಗಳಿಸಲಷ್ಟೇ ಶಕ್ತವಾಯಿತು. ಇದಕ್ಕೆ ಉತ್ತರವಾಗಿ ಎಂಎಸ್ ಧೋನಿ ಸಾರಥ್ಯದ ಚೆನ್ನೈ ಸೂಪರ್ ಕಿಂಗ್ಸ್ 18.1 ಓವರ್‌ಗಳಲ್ಲಿ ಗುರಿ ತಲುಪಿತು. ಅಜಿಂಕ್ಯ ರಹಾನೆ 61 ರನ್‌ಗಳ ಅಬ್ಬರದ ಇನ್ನಿಂಗ್ಸ್‌ ಆಡಿದರು. ಮತ್ತೊಂದೆಡೆ, ದೀಪಕ್ ಚಹಾರ್​ ಒಂದು ವರ್ಷದಲ್ಲಿ ನಾಲ್ಕನೇ ಬಾರಿಗೆ ಗಾಯಗೊಂಡಿದ್ದಾರೆ.

ಐಪಿಎಲ್ 2022ರ ಮೊದಲು, ಅವರು ಬೆನ್ನುನೋವಿನಿಂದ ಸುಮಾರು 6 ತಿಂಗಳ ಕಾಲ ಹೊರಗಿದ್ದರು. ಇದರ ನಂತರ, ಅವರು 2022 ರ ಟಿ 20 ವಿಶ್ವಕಪ್‌ನಲ್ಲಿ ಪುನರಾಗಮನ ಮಾಡಲು ಪ್ರಯತ್ನಿಸುತ್ತಿದ್ದರು, ಆದರೆ ನಂತರ ಗಾಯಗೊಂಡರು ಮತ್ತು ಪಂದ್ಯಾವಳಿಯನ್ನು ಆಡಲು ಸಾಧ್ಯವಾಗಲಿಲ್ಲ. ಇದರ ನಂತರ ಅವರು ಬಾಂಗ್ಲಾದೇಶ ಪ್ರವಾಸಕ್ಕೆ ಆಯ್ಕೆಯಾದರು, ಆದರೆ ಮತ್ತೊಮ್ಮೆ ಅವರು ಗಾಯದ ಕಾರಣ ಮೈದಾನಕ್ಕೆ ಬರಲು ಸಾಧ್ಯವಾಗಲಿಲ್ಲ.

ಭಾರತದ ಮಾಜಿ ಆಟಗಾರ ಸುರೇಶ್ ರೈನಾ, ಗಾಯದ ನಂತರ ದೀಪಕ್ ಚಹಾರ್ ಮರಳುವುದು ಸುಲಭವಲ್ಲ ಎಂದು ಪಂದ್ಯದ ನಂತರ ಜಿಯೋ ಸಿನಿಮಾದಲ್ಲಿ ಹೇಳಿದರು. ಅವರು 4 ರಿಂದ 5 ಪಂದ್ಯಗಳಿಗೆ ಹೊರಗುಳಿಯಬಹುದು, ಏಕೆಂದರೆ ಆಟಗಾರರು ಸಾಕಷ್ಟು ಪ್ರಯಾಣಿಸಬೇಕು ಮತ್ತು ಪ್ರತಿ ತಂಡವು ಸತತ ಪಂದ್ಯಗಳನ್ನು ಆಡಬೇಕಾಗುತ್ತದೆ ಎಂದಿದ್ದಾರೆ.

ದೀಪಕ್ ಚಹಾರ್ ಗಾಯಗೊಂಡಿರುವುದು ಟೀಂ ಇಂಡಿಯಾಗೆ ಹೊಡೆತವಾಗಿದೆ. ಈ ವರ್ಷ ODI ವಿಶ್ವಕಪ್ ಭಾರತದಲ್ಲಿ ಅಕ್ಟೋಬರ್-ನವೆಂಬರ್‌ನಲ್ಲಿ ನಡೆಯಲಿದೆ. ಈ ಹಿಂದೆ ರಿಷಭ್​ ಪಂತ್‌ನಿಂದ ಜಸ್ಪ್ರೀತ್ ವರೆಗೆ ಗಾಯದ ಸಮಸ್ಯೆಯಿಂದ ತಂಡದಿಂದ ಹೊರಗುಳಿಯುತ್ತಿದ್ದಾರೆ. ಹೀಗಾಗಿ ದೀಪಕ್​ ಚಹಾರ್​ ಹೀಗೆ ಪದೇ ಪದೇ ಇಂಜುರಿಗೆ ತುತ್ತಾಗುತ್ತಿರುವುದು ಸಂಕಷ್ಟಕ್ಕೆ ತಂದಿದೆ.

ಮುಂಬೈ ಇಂಡಿಯನ್ಸ್ ವಿರುದ್ಧದ ಮೊದಲ ಓವರ್‌ನ 5ನೇ ಎಸೆತದಲ್ಲಿ ದೀಪಕ್ ಚಹಾರ್ ಗಾಯಗೊಂಡಿದ್ದರು. ಇದಾದ ಬಳಿಕ ಫಿಸಿಯೋ ಮೈದಾನಕ್ಕೆ ಬಂದಿದ್ದರಿಂದ ಸುಮಾರು 5 ನಿಮಿಷಗಳ ಕಾಲ ಪಂದ್ಯವನ್ನು ನಿಲ್ಲಿಸಬೇಕಾಯಿತು. ಇದಾದ ಬಳಿಕವೂ ದೀಪಕ್ ಚಹಾರ್ ಅವರಿಗೆ ಪಂದ್ಯದಲ್ಲಿ ಮತ್ತೊಮ್ಮೆ ಬೌಲಿಂಗ್ ಮಾಡಲು ಸಾಧ್ಯವಾಗಲಿಲ್ಲ.

30 ವರ್ಷದ ದೀಪಕ್ ಇದುವರೆಗೆ 125 ಟಿ20 ಪಂದ್ಯಗಳನ್ನು ಆಡಿದ್ದಾರೆ. 25ರ ಸರಾಸರಿಯಲ್ಲಿ 137 ವಿಕೆಟ್ ಪಡೆದಿದ್ದಾರೆ. 7 ರನ್ ನೀಡಿ 6 ವಿಕೆಟ್ ಪಡೆದದ್ದು ಅತ್ಯುತ್ತಮ ಪ್ರದರ್ಶನ. ದೀಪಕ್ ಚಹಾರ್ ಟೀಂ ಇಂಡಿಯಾ ಪರ ಇದುವರೆಗೆ 13 ಏಕದಿನ ಹಾಗೂ 24 ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಏಕದಿನದಲ್ಲಿ 16 ಹಾಗೂ ಟಿ20ಯಲ್ಲಿ 29 ವಿಕೆಟ್ ಪಡೆದಿದ್ದಾರೆ. ದೀಪಕ್ ಚಹಾರ್ ಅವರನ್ನು 14 ಕೋಟಿ ರೂ.ಗೆ ಸಿಎಸ್‌ಕೆ ತನ್ನ ತಂಡಕ್ಕೆ ಸೇರಿಸಿಕೊಂಡಿದೆ.