ಸಿಕ್ಸರ್ ಸಿಂಗ್ ಯುವರಾಜ್​ರನ್ನು ಅತೀ ಹೆಚ್ಚು ಕಾಡಿದ್ದು ಈ ಬೌಲರುಗಳಂತೆ..!

2011ರ ವಿಶ್ವಕಪ್ ಟೂರ್ನಿಯನ್ನು ಯಾರಿಂದ ತಾನೆ ಮರೆಯಲು ಸಾಧ್ಯ. ಯುವಿಯ ಆಲ್​ರೌಂಡರ್​ ಪ್ರದರ್ಶನದಿಂದ ಟೀಂ ಇಂಡಿಯಾ ಎರಡನೇ ಬಾರಿ ವಿಶ್ವಕಪ್​ಗೆ ಮುತ್ತಿಕ್ಕಿತು.

ಹೌದು, ಯುವರಾಜ್​ ಕ್ರೀಸ್​ನಲ್ಲಿದ್ದರೆ ಎದುರಾಳಿ ಬೌಲರುಗಳಿಗೆ ಅದೇಕೋ ನಡುಕ. ಏಕೆಂದರೆ ಅತ್ಯುತ್ತಮ ವೇಗಿ ಎನಿಸಿಕೊಂಡಿದ್ದ ಸ್ಟುವರ್ಟ್ ಬ್ರಾಡ್ ಆರು ಎಸೆತಗಳನ್ನೂ ಯುವಿ ಸಿಕ್ಸರ್​ಗೆ ಅಟ್ಟಿದ್ದರು.

ಆದರೆ ಇದೇ ಸಿಕ್ಸರ್ ಸಿಂಗ್ ಕೆಲ ಬೌಲರುಗಳನ್ನು ಎದುರಿಸಲು ಸಿಕ್ಕಾಪಟ್ಟೆ ಕಷ್ಟಪಟ್ಟಿದ್ದಾರೆ ಎಂದರೆ ನಂಬಲೇಬೇಕು. ಏಕೆಂದರೆ ಯುವರಾಜ್ ಸಿಂಗ್ ಅತ್ಯುತ್ತಮ ವೇಗಿಗಳನ್ನು ನೀರಾಯಾಸವಾಗಿ ಎದುರಿಸುತ್ತಿದ್ದರು. ಅದೇ ಸ್ಪಿನ್​ ಬೌಲರುಗಳ ವಿರುದ್ಧ ಬ್ಯಾಟ್ ಬೀಸಲು ತಡಕಾಡುತ್ತಿದ್ದರು.

ತಮ್ಮ ಕೆರಿಯರ್​ನಲ್ಲಿ ಅತೀ ಹೆಚ್ಚು ಕಾಡಿದ ಬೌಲರುಗಳ ಬಗ್ಗೆ ಇದೀಗ ಯುವರಾಜ್ ಸಿಂಗ್ ಮಾತನಾಡಿದ್ದಾರೆ. ಮೂರು ಮಾದರಿಯ ಕ್ರಿಕೆಟ್​ನಲ್ಲೂ ಸಂಚಲನ ಸೃಷ್ಟಿಸಿದ್ದ ಯುವಿಯನ್ನು ಅತೀ ಹೆಚ್ಚು ಕಾಡಿದ ಬೌಲರ್ ಯಾರು ಎಂಬುದನ್ನು ಬಹಿರಂಗಪಡಿಸಿದ್ದಾರೆ.

ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವುದು ಸ್ಪಿನ್ ಮಾಂತ್ರಿಕ ಲೆಜೆಂಡ್ ಮುತ್ತಯ್ಯ ಮುರಳೀಧರನ್. ಹೌದು, ಯುವರಾಜ್​ ಸಿಂಗ್​ಗೆ ಶ್ರೀಲಂಕಾದ ಮುರಳೀಧರನ್ ಎಸೆತವನ್ನು ಎದುರಿಸಲು ತಡಕಾಡುತ್ತಿದ್ದೆ ಎಂದು ತಿಳಿಸಿದ್ದಾರೆ.

ಮುರಳೀಧರನ್ ಅವರ ಎಸೆತಗಳನ್ನು ಎದುರಿಸುವುದು ನನಗೆ ಸವಾಲಿನ ವಿಷಯವಾಗಿತ್ತು. ಅವರ ಬೌಲಿಂಗ್​ನಲ್ಲಿ ಏನು ಮಾಡಬೇಕೆಂದು ತಿಳಿಯುತ್ತಿರಲಿಲ್ಲ ಎಂದು ಯುವಿ ಹೇಳಿದ್ದಾರೆ.

ಆದರೆ ಮುರಳೀಧರನ್ ಅವರ ಚೆಂಡುಗಳನ್ನು ಎದುರಿಸಲು ಆ ಬಳಿಕ ಕ್ರಿಕೆಟ್ ದೇವರು ನೀಡಿದ ಸಲಹೆ ಉಪಯುಕ್ತವಾಯಿತು ಅಂದಿದ್ದಾರೆ ಯುವಿ. ನನ್ನ ಸಮಸ್ಯೆಯಲ್ಲಿ ಸಚಿನ್ ಪಾಜಿ ಅವರ ಬಳಿ ಹೇಳಿಕೊಂಡೆ.

ಈ ವೇಳೆ ಮಾಸ್ಟರ್ ಬ್ಲಾಸ್ಟರ್ ನೀಡಿದ ಸಲಹೆಯಿಂದ ಮುಂದೆ ಮುತ್ತಯ್ಯ ಮುರಳೀಧರನ್ ಅವರ ಎಸೆತಗಳನ್ನು ಆತ್ಮ ವಿಶ್ವಾಸದಿಂದಲೇ ಎದುರಿಸಿದೆ ಎಂದು ಯುವರಾಜ್ ಸಿಂಗ್ ಹೇಳಿದರು.

ಇನ್ನು ವೇಗದ ಬೌಲರುಗಳಲ್ಲಿ ನಾನು ಆಸ್ಟ್ರೇಲಿಯಾದ ಮಾಜಿ ವೇಗಿ ಗ್ಲೆನ್ ಮೆಕ್​ಗ್ರಾಥ್ ಎಸೆತಗಳನ್ನು ಎದುರಿಸಲು ಒದ್ದಾಡುತ್ತಿದ್ದೆ. ಅವರ ಕರಾರುವಾಕ್ ದಾಳಿ ಮುಂದೆ ಕ್ರೀಸ್ ಕಚ್ಚಿ ನಿಲ್ಲುವುದೇ ದೊಡ್ಡ ಸವಾಲು.

ಮೆಕ್​ಗ್ರಾಥ್ ಅವರ ಚೆಂಡುಗಳು ಬ್ಯಾಟ್ ಸವರಿಕೊಂಡು ಕೀಪರ್​ನತ್ತ ಹೋಗುತ್ತಿತ್ತು. ಇದರಿಂದ ಅವರ ಬೌಲಿಂಗ್​ನಲ್ಲಿ ಔಟಾಗದೇ ಉಳಿಯುವುದು ಸವಾಲಿನ ವಿಷಯವಾಗಿತ್ತು ಎಂದು ಯುವರಾಜ್ ಸಿಂಗ್ ಹೇಳಿದ್ದಾರೆ.

ಟೀಂ ಇಂಡಿಯಾದ ಸಾರ್ವಕಾಲಿಕ ಮ್ಯಾಚ್ ವಿನ್ನರ್ ಎಂದೇ ಖ್ಯಾತರಾಗಿದ್ದ ಆಲ್​ರೌಂಡರ್ ಯುವರಾಜ್ ಸಿಂಗ್ 2007ರ ಟಿ20 ವಿಶ್ವಕಪ್ ಹಾಗೂ 2011ರ ವಿಶ್ವಕಪ್ ಗೆದ್ದು ಕೊಡುವಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.

ಟೀಂ ಇಂಡಿಯಾ ಪರ  301 ಏಕದಿನ ಪಂದ್ಯವಾಡಿರುವ ಯುವರಾಜ್​ ಸಿಂಗ್ 8701 ರನ್​ ಬಾರಿಸಿದ್ದಾರೆ. ಹಾಗೆಯೇ 40 ಟೆಸ್ಟ್​ ಪಂದ್ಯಗಳಿಂದ 1900 ರನ್​ ಕಲೆಹಾಕಿದ್ದಾರೆ. ಇನ್ನು 132 ಟಿ20 ಪಂದ್ಯಗಳಿಂದ 2750 ರನ್ ಬಾರಿಸಿದ್ದಾರೆ. ಇನ್ನು ಮೂರು ಮಾದರಿಯ ಕ್ರಿಕೆಟ್​ನಲ್ಲಿ 148 ವಿಕೆಟ್ ಉರುಳಿಸಿದ್ದಾರೆ.