Kieron Pollard: ಪೊಲಾರ್ಡ್​ ಪವರ್​ಫುಲ್ ಸಿಕ್ಸ್ ಸಿಕ್ಸಸ್ ಬಗ್ಗೆ ಯುವಿ-ಗಿಬ್ಸ್ ಪ್ರತಿಕ್ರಿಯೆ ಹೀಗಿದೆ..!

ಟಿ20 ಕ್ರಿಕೆಟ್​ನಲ್ಲಿ ಮತ್ತೊಮ್ಮೆ ಸಿಕ್ಸ್​ಗಳ ದಾಖಲೆ ನಿರ್ಮಾಣವಾಗಿದೆ. ಈ ಹಿಂದೆ ಚುಟುಕು ಕ್ರಿಕೆಟ್​ನಲ್ಲಿ ಯುವರಾಜ್ ಸಿಂಗ್ ನಿರ್ಮಿಸಿದ್ದ ದಾಖಲೆಯನ್ನು ವೆಸ್ಟ್ ಇಂಡೀಸ್ ದಾಂಡಿಗ ಕೀರನ್ ಪೊಲಾರ್ಡ್​ ಸರಿಗಟ್ಟಿದ್ದಾರೆ.

ಹೌದು, ವೆಸ್ಟ್ ಇಂಡೀಸ್ ತಂಡದ ನಾಯಕ ಕೀರನ್ ಪೊಲಾರ್ಡ್ ಶ್ರೀಲಂಕಾ ವಿರುದ್ಧದ ಟಿ20 ಪಂದ್ಯದಲ್ಲಿ ಒಂದೇ ಓವರ್​ನಲ್ಲಿ ದಾಖಲೆಯ ಆರು ಸಿಕ್ಸರ್​ಗಳನ್ನು ಸಿಡಿಸಿದ್ದಾರೆ.

ಶ್ರೀಲಂಕಾ ವೆಸ್ಟ್ ಇಂಡೀಸ್ ಟಿ20 ಸರಣಿಯ ಮೊದಲ ಪಂದ್ಯದಲ್ಲಿ ಈ ದಾಖಲೆ ಸೃಷ್ಟಿಯಾಗಿದೆ. ಗೆಲ್ಲಲು ಶ್ರೀಲಂಕಾ ನೀಡಿದ 132 ರನ್ ಗುರಿಯನ್ನ ಬೆನ್ನತ್ತುವ ವೇಳೆ ಪೊಲಾರ್ಡ್ ಸಿಡಿಲಬ್ಬರದ ಬ್ಯಾಟಿಂಗ್ ನಡೆಸಿದರು.

ಅಕಿಲಾ ಧನಂಜಯ ಅವರ ಕೊನೆಯ ಓವರ್​ನಲ್ಲಿ ಆರೂ ಎಸೆತವನ್ನು ಬೌಂಡರಿ ಆಚೆ ಕಳುಹಿಸಿದರು. ಕುತೂಹಲದ ವಿಷಯ ಎಂದರೆ, ಅಕಿಲಾ ಧನಂಜಯ ಅವರು ತಮ್ಮ ಹಿಂದಿನ ಓವರ್​ನಲ್ಲಿ, ಅಂದರೆ ಅವರ ಮೂರನೇ ಓವರ್​ನಲ್ಲಿ ಕ್ರಿಸ್ ಗೇಲ್ ವಿಕೆಟ್ ಸೇರಿದಂತೆ ಹ್ಯಾಟ್ರಿಕ್ ವಿಕೆಟ್ ಪಡೆದು ತಂಡದ ಗೆಲುವಿನ ಆಸೆ ಚಿಗುರಿಸಿದ್ದರು.

ಆದರೆ, ಕೀರನ್ ಪೊಲಾರ್ಡ್ ಧನಂಜಯ ಅವರನ್ನೇ ಟಾರ್ಗೆಟ್ ಮಾಡಿ ಆರಕ್ಕೆ ಆರು ಸಿಕ್ಸರ್ ಸಿಡಿಸಿದರು. ಇದರೊಂದಿಗೆ ಅಂತರರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಆರು ಬಾಲ್​ಗೆ ಆರು ಸಿಕ್ಸರ್ ಸಿಡಿಸಿದ ಮೊದಲ ವೆಸ್ಟ್ ಇಂಡೀಸ್ ಕ್ರಿಕೆಟಿಗ ಎಂಬ ದಾಖಲೆ ಪೊಲಾರ್ಡ್ ಪಾಲಾಗಿದೆ. ಹಾಗೆಯೇ ಈ ಸಾಧನೆ ಮಾಡಿದ ಮೂರನೇ ಕ್ರಿಕೆಟಿಗ ಎನಿಸಿಕೊಂಡಿದ್ದಾರೆ.

ಈ ಹಿಂದೆ ದಕ್ಷಿಣ ಆಫ್ರಿಕಾದ ಹರ್ಷೆಲ್ ಗಿಬ್ಸ್ ಮತ್ತು ಭಾರತದ ಯುವರಾಜ್ ಸಿಂಗ್ ಅವರು ಈ ಸಾಧನೆ ಮಾಡಿದ್ದರು. ಇನ್ನು ಟಿ20 ಕ್ರಿಕೆಟ್​ನಲ್ಲಿ ಯುವರಾಜ್ ಸಿಂಗ್ ನಂತರ ಪೊಲಾರ್ಡ್ ಈ ದಾಖಲೆ ಮಾಡಿರುವುದು ವಿಶೇಷ. ಈ ಹಿಂದೆ 2007 ರಲ್ಲಿ ಯುವರಾಜ್ ಸಿಂಗ್ ಟಿ20 ಕ್ರಿಕೆಟ್​ನಲ್ಲಿ 6 ಎಸೆತಕ್ಕೆ 6 ಸಿಕ್ಸರ್​ ಸಿಡಿಸಿ ಇತಿಹಾಸ ನಿರ್ಮಿಸಿದ್ದರು. ಇದರ ಬಳಿಕ ದಕ್ಷಿಣ ಆಫ್ರಿಕಾದ ಹರ್ಷಲ್ ಗಿಬ್ಸ್ ಏಕದಿನ ಕ್ರಿಕೆಟ್​ನಲ್ಲಿ 6 ಬಾಲ್​ಗೆ 6 ಸಿಕ್ಸರ್ ಬಾರಿಸಿದ್ದರು.

ಇದೀಗ ಕೀರನ್ ಪೊಲಾರ್ಡ್ 6 ಎಸೆತಗಳಲ್ಲಿ 6 ಸಿಕ್ಸರ್​ ಸಿಡಿಸಿ ಸಿಕ್ಸ್ ಸರದಾರರ ಪಟ್ಟಿಗೆ ಎಂಟ್ರಿ ಕೊಟ್ಟಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಯುವರಾಜ್ ಸಿಂಗ್ ನಮ್ಮ ಕ್ಲಬ್​ಗೆ ಸ್ವಾಗತ..ನಿಮ್ಮ ಸಿಕ್ಸ್​ಗಳು ಸಖತ್ತಾಗಿತ್ತು ಎಂಬಾರ್ಥದಲ್ಲಿ ಟ್ವೀಟ್ ಮಾಡಿದ್ದಾರೆ.

ಇನ್ನು ಮತ್ತೋರ್ವ ಸಿಕ್ಸರ್​ ಸರದಾರ ಹರ್ಷಲ್ ಗಿಬ್ಸ್ ಕೂಡ ಪ್ರತಿಕ್ರಿಯಿಸಿದ್ದು, ಸಿಕ್ಸ್​ ಸಿಡಿಸಲು ಮಾರ್ಚ್​ ಅತ್ಯಂತ ಜನಪ್ರಿಯ ತಿಂಗಳು. ಅಭಿನಂದನೆಗಳು ಪೊಲಾರ್ಡ್ ಎಂದಿದ್ದಾರೆ. ಗಿಬ್ಸ್ ಈ ರೀತಿಯಲ್ಲಿ ಟ್ವೀಟ್ ಮಾಡಲು ಕಾರಣ, ಈ ಹಿಂದೆ ನೆದರ್ಲ್ಯಾಂಡ್ಸ್ ವಿರುದ್ದ 6/3/2007 ರಂದು ಗಿಬ್ಸ್ ಆರು ಎಸೆತಗಳಿಗೆ ಸಿಕ್ಸರ್ ಬಾರಿಸಿದ್ದರು. ಇದೀಗ ಮಾರ್ಚ್​ನಲ್ಲೇ ಪೊಲಾರ್ಡ್ ಕೂಡ ಈ ದಾಖಲೆ ಬರೆದಿರುವುದು ವಿಶೇಷ.