WPL 2023: ವುಮೆನ್ಸ್ ಪ್ರೀಮಿಯರ್ ಲೀಗ್​ಗೆ ಅದ್ಧೂರಿ ಚಾಲನೆ, ಮೊದಲ ಪಂದ್ಯದಲ್ಲೇ ಅಬ್ಬರಿಸಿದ ಮುಂಬೈ ಇಂಡಿಯನ್ಸ್

ಚೊಚ್ಚಲ ಮಹಿಳಾ ಪ್ರೀಮಿಯರ್ ಲೀಗ್​ಗೆ (Women's Premier League) ಭರ್ಜರಿ ಆರಂಭ ಸಿಕ್ಕಿದೆ. ಶನಿವಾರ ಉದ್ಘಾಟನಾ ಪಂದ್ಯದಲ್ಲಿ ಗುಜರಾತ್ ಜೈಂಟ್ಸ್​  (Gujarat Giants) ಮತ್ತು ಮುಂಬೈ ಇಂಡಿಯನ್ಸ್ (Mumbai Indians) ಮುಖಾಮುಖಿಯಾಗಿವೆ. ಡಿವೈ ಪಾಟೀಲ್ ಸ್ಟೇಡಿಯಂನಲ್ಲಿ ನಡೆದ ವರ್ಣರಂಜಿತ ಕಾರ್ಯಕ್ರಮದಲ್ಲಿ ಬಾಲಿವುಡ್​ ನಟಿಯರು, ಪಂಜಾಬಿ ಗಾಯಕ ಎಪಿ ಧಿಲ್ಲೋನ್ ಸೇರಿದಂತೆ ಹಲವರು ಸೆಲೆಬ್ರೆಟಿಗಳು ಭಾಗವಹಿಸಿದ್ದರು.

ವರ್ಣರಂಜಿತ ಕಾರ್ಯಕ್ರಮಕ್ಕಾಗಿ ಬೃಹತ್ ವೇದಿಕೆ ನಿರ್ಮಾಣ ಮಾಡಲಾಗಿದ್ದು, ಈ ವೇದಿಕೆಯಲ್ಲಿ ಬಾಲಿವುಡ್​ ನಟಿಯರಾದ ಕಿಯಾರ ಅಡ್ವಾಣಿ ಕೃತಿ ಸನನ್​ ಮಹಿಳಾ ಪ್ರೀಮಿಯರ್ ಲೀಗ್​ ಅಭಿಮಾನಿಗಳನ್ನು ರಂಜಿಸಿದರು. ಮೊದಲು ಕಿಯಾರ ಡ್ಯಾನ್ಸ್ ಮಾಡಿದರೆ, ಬಳಿಕ ಕೃತಿ ಸನನ್ ಹಾಗೂ ಬಳಗ ಮತ್ತೊಂದು ಹೈ ಎನರ್ಜಿಟಿಕ್ ಪರ್ಫಾಮೆನ್ಸ್ ನೀಡಿತು

ಮನರಂಜನೆ ಕಾರ್ಯಕ್ರಮದ ಬಳಿಕ ಚೊಚ್ಚಲ ಮಹಿಳಾ ಪ್ರೀಮಿಯರ್ ಲೀಗ್​ ಟೂರ್ನಿಯ ಟ್ರೋಫಿಯನ್ನು ಅನಾವರಣಗೊಳಿಸಲಾಯಿತು. ಈ ವೇಳೆ ಡಬ್ಲ್ಯೂಪಿಎಲ್​ನ ಐದೂ ತಂಡದ ನಾಯಕಿಯರು ಭಾಗವಹಿಸಿದ್ದರು.

ಗುಜರಾತ್ ಜೈಂಟ್ಸ್ ತಂಡದ ನಾಯಕಿ ಬೆತ್ ಮೂನಿ, ಮುಂಬೈ ಇಂಡಿಯನ್ಸ್ ತಂಡದ ನಾಯಕಿ ಹರ್ಮಮನ್‌ಪ್ರೀತ್ ಕೌರ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕಿ ಸ್ಮೃತಿ ಮಂಧನಾ, ಡೆಲ್ಲಿ ಕ್ಯಾಪಿಟಲ್ಸ್ ನಾಯಕಿ ಮೆಗ್ ಲ್ಯಾನಿಂಗ್ ಹಾಗೂ ಯುಪಿ ವಾರಿಯರ್ಸ್ ನಾಯಕಿ ಅಲಿಸಾ ಹೀಲಿ ಮಹಿಳಾ ಟ್ರೋಫಿ ಅನಾವರಣಗೊಳಿಸಿದರು.

ಇಂದು ಆರಂಭ ಕಂಡಿರುವ ಮಹಿಳಾ ಟೂರ್ನಿ ಮಾರ್ಚ್ 26ರ ಫೈನಲ್ ಪಂದ್ಯದ ಮೂಲಕ ಅಂತ್ಯಗೊಳ್ಳಲಿದೆ. ಒಟ್ಟು ಲೀಗ್​ನಲ್ಲಿ 20 ಪಂದ್ಯಗಳು ನಡೆಯಲಿದೆ. ಎಲ್ಲಾ ಪಂದ್ಯಗಳು ಮುಂಬೈನ ಡಿವೈ ಪಾಟೀಲ್ ಹಾಗೂ ಬ್ರೇಬೋರ್ನ್ ಸ್ಟೇಡಿಯಂನಲ್ಲಿ ನಡೆಯಲಿವೆ.

ಉದ್ಘಾಟನಾ ಪಂದ್ಯದಲ್ಲಿ ಟಾಸ್​ ಸೋತು ಬ್ಯಾಟಿಂಗ್ ಇಳಿದಿದ್ದ ಮುಂಬೈ ಇಂಡಿಯನ್ಸ್ ತಂಡ 20 ಓವರ್​ಗಳಲ್ಲಿ 5 ವಿಕೆಟ್​ ಕಳೆದುಕೊಂಡು 207 ರನ್​ಗಳ ಬೃಹತ್​ ಮೊತ್ತ ದಾಖಲಿಸಿದೆ.

ನಾಯಕಿ ಹರ್ಮನ್ ಪ್ರೀತ್​ ಕೌರ್ 30 ಎಸೆತಗಳಲ್ಲಿ 65 ಅಮೆಲಿಯಾ ಕೆರ್ 24 ಎಸೆತಗಳಲ್ಲಿ 45, ಹೇಲಿ ಮ್ಯಾಥ್ಯೂಸ್​  31 ಎಸೆತಗಳಲ್ಲಿ 47 ರನ್​, ಸೀವರ್ ​ 18 ಎಸೆತಗಳಲ್ಲಿ 23 ರನ್​ಗಳಿಸಿ ಮೊದಲ ಪಂದ್ಯದಲ್ಲೇ ತಂಡ ದ್ವಿಶತಕ ದಾಖಲಿಸಲು ನೆರವಾಗಿದ್ದಾರೆ. ಗುಜರಾತ್ ಪರ ಸ್ನೇಹ್ ರಾಣಾ 2, ಜಾರ್ಜಿಯಾ ವೇರ್ಹ್ಯಾಮ್, ತನ್ವರ್​ ಹಾಗೂ ಗಾರ್ಡ್ನರ್​ ತಲಾ ಒಂದು ವಿಕೆಟ್ ಪಡೆದರು.