Virat Kohli: ಹೊಸ ವಿಶ್ವ ದಾಖಲೆ ಬರೆಯಲು ಕ್ಯಾಪ್ಟನ್ ಕೊಹ್ಲಿ ಸಜ್ಜು..!

ಭಾರತ-ಇಂಗ್ಲೆಂಡ್ ನಡುವಣ ಮೊದಲ ಟೆಸ್ಟ್​ ಪಂದ್ಯಕ್ಕೆ ಚೆನ್ನೈನ ಎಂಎ ಚಿದಂಬರಂ ಮೈದಾನ ಸಜ್ಜಾಗಿದೆ. ಫೆಬ್ರವರಿ 5 ರಿಂದ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಗೆ ಚಾಲನೆ ದೊರೆಯಲಿದ್ದು, ಒಟ್ಟು 4 ಟೆಸ್ಟ್ ಪಂದ್ಯಗಳು ನಡೆಯಲಿದೆ.

ಈ ಪಂದ್ಯದ ಮೂಲಕ ನಾಯಕನಾಗಿ ಮತ್ತೆ ವಿರಾಟ್ ಕೊಹ್ಲಿ ತಂಡದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್​ ಸರಣಿಯ ಮೊದಲ ಪಂದ್ಯದ ಬಳಿಕ ಕೊಹ್ಲಿ ಪಿತೃತ್ವ ರಜೆ ತೆಗೆದುಕೊಂಡಿದ್ದರು. ಇದೀಗ ತಂಡದ ಸಾರಥ್ಯದೊಂದಿಗೆ ವಿಶ್ವ ದಾಖಲೆ ಬರೆಯುವ ಸುವರ್ಣಾವಕಾಶ ಕೊಹ್ಲಿ ಮುಂದಿದೆ.

ಇಂಗ್ಲೆಂಡ್​ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಶತಕ ಮೂಡಿಬಂದರೆ ನಾಯಕನಾಗಿ ಅತೀ ಹೆಚ್ಚು ಶತಕ ಬಾರಿಸಿದ ವಿಶ್ವ ದಾಖಲೆ ಕೊಹ್ಲಿ ಪಾಲಾಗಲಿದೆ. ಈ ಪಟ್ಟಿಯಲ್ಲಿ ಆಸ್ಟ್ರೇಲಿಯಾ ಮಾಜಿ ನಾಯಕ ರಿಕಿ ಪಾಂಟಿಂಗ್ ಅಗ್ರಸ್ಥಾನದಲ್ಲಿದ್ದಾರೆ. ಪಂಟರ್ ಪಾಂಟಿಂಗ್ ಅಂತರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ನಾಯಕನಾಗಿ 41 ಶತಕಗಳನ್ನು ಬಾರಿಸಿದ್ರೆ, ವಿರಾಟ್ ಕೊಹ್ಲಿ ಸಹ 41 ಶತಕಗಳನ್ನು ಸಿಡಿಸಿದ್ದಾರೆ.

ಹೀಗಾಗಿ ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ನಲ್ಲಿ ಕೊಹ್ಲಿ ಸೆಂಚುರಿ ಬಾರಿಸಿದ್ರೆ ಅಂತರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ನಾಯಕನಾಗಿ ಅತೀ ಹೆಚ್ಚು ಶತಕ ಬಾರಿಸಿದ ವಿಶ್ವ ದಾಖಲೆ ವಿರಾಟ್ ಕೊಹ್ಲಿ ಪಾಲಾಗಲಿದೆ.

ಇನ್ನು ರಿಕಿ ಪಾಂಟಿಂಗ್ 41 ಶತಕ ಬಾರಿಸಲು 376 ಇನಿಂಗ್ಸ್​ ಆಡಿದ್ದರೆ, ವಿರಾಟ್ ಕೊಹ್ಲಿ ನಾಯಕನಾಗಿ ಕೇವಲ 191 ಇನಿಂಗ್ಸ್​ಗಳಲ್ಲಿ 41 ಸೆಂಚುರಿಗಳ ಸಾಧನೆ ಮಾಡಿದ್ದಾರೆ. ಇದರಲ್ಲಿ 20 ಶತಕಗಳು ಟೆಸ್ಟ್​ನಲ್ಲಿ ಮೂಡಿಬಂದರೆ, ಏಕದಿನ ಪಂದ್ಯಗಳಿಂದ 21 ಶತಕಗಳನ್ನು ಬಾರಿಸಿದ್ದರು.

ಕಳೆದ 11 ವರ್ಷಗಳಿಂದ ಕೊಹ್ಲಿ ಶತಕದ ಸಾಧನೆಯೊಂದನ್ನು ಮಾಡುತ್ತಾ ಬಂದಿದ್ದರು. ಅಂದರೆ ಪ್ರತಿ ಕ್ಯಾಲೆಂಡರ್ ವರ್ಷದಲ್ಲೂ ಕೊಹ್ಲಿ ಬ್ಯಾಟ್​ನಿಂದ ಕನಿಷ್ಠ ಒಂದು ಏಕದಿನ ಶತಕವಾದರೂ ಮೂಡಿಬಂದಿತ್ತು. ಆದರೆ 2020ರ ಇಸವಿಯಲ್ಲಿ ಯಾವುದೇ ಶತಕ ಬಾರಿಸಿಲ್ಲ.

ಇದೀಗ ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಪಂದ್ಯದ ಮೂಲಕ ಮತ್ತೆ ಶತಕದ ಟ್ರ್ಯಾಕ್​ಗೆ ಬರಲು ಕೊಹ್ಲಿ ಸಜ್ಜಾಗಿ ನಿಂತಿದ್ದಾರೆ. ಹೀಗಾಗಿ ಚೆನ್ನೈನಲ್ಲಿ ನಡೆಯಲಿರುವ ಮೊದಲ ಟೆಸ್ಟ್ ಎಲ್ಲರ ಕುತೂಹಲದ ಕೇಂದ್ರವಾಗಿದೆ.