Interesting Facts- 25ನೇ ವಯಸ್ಸಲ್ಲಿ ವೇಗದ ಬೌಲಿಂಗ್ ಬಿಟ್ಟು ಸ್ಪಿನ್ನರ್ ಆಗಿದ್ದ ಎಜಾಜ್ ಪಟೇಲ್

ಎಜಾಜ್ ಪಟೇಲ್ ಮುಂಬೈನಲ್ಲಿ ಹುಟ್ಟಿದವರಾದರೂ ಅವರು ಮೂಲ ಗುಜರಾತಿಗರು. ಗುಜರಾತ್ನ ಭರೂಚ್ ಜಿಲ್ಲೆಯ ತಣಕಾರಿಯಾ ಎಂಬ ಗ್ರಾಮದವರು. ಎಂಟನೇ ವಯಸ್ಸಿನಲ್ಲಿ ಅವರು ನ್ಯೂಜಿಲೆಂಡ್ ಗೆ ಹೋಗುತ್ತಾರೆ. ಆಕ್ಲೆಂಡ್ ನಗರದ ನ್ಯೂ ಲಿನ್ ಕ್ರಿಕೆಟ್ ಕ್ಲಬ್ ನಲ್ಲಿ ಕ್ರಿಕೆಟ್ ಅಭ್ಯಾಸ ಮಾಡುತ್ತಾರೆ.

ನ್ಯೂಜಿಲೆಂಡ್ ರಾಷ್ಟ್ರೀಯ ತಂಡದಲ್ಲಿ ಆಡಿದ ಭಾರತೀಯ ಮೂಲದ ಐದನೇ ಆಟಗಾರ ಎಜಾಜ್ ಪಟೇಲ್. ಇವರಿಗಿಂತ ಮುಂಚೆ ಭಾರತೀಯ ಮೂಲದ ಟೆಡ್ ಬ್ಯಾಡ್ ಕಾಕ್, ಟಾಮ್ ಪುನಾ, ಈಶ್ ಸೋಧಿ ಮತ್ತು ಜೀತ್ ರಾವಲ್ ಅವರು ಕಿವೀಸ್ ತಂಡದಲ್ಲಿ ಆಡಿದ್ದಾರೆ. ಈಶ್ ಸೋಧಿ ಮತ್ತು ಜೀತ್ ರಾವಲ್ ಈಗಲೂ ಕಿವೀಸ್ ತಂಡದಲ್ಲಿದ್ದಾರೆ. ದಶಕಗಳ ಹಿಂದೆ ಆಡಿದ್ದ ದೀಪಕ್ ಪಟೇಲ್ ಅವರು ಕೀನ್ಯಾದಲ್ಲಿ ಹುಟ್ಟಿದವರು. ಹಾಗೆಯೇ, ರಚಿನ್ ರವೀಂದ್ರ ಅವರು ನ್ಯೂಜಿಲೆಂಡ್ ನಲ್ಲೇ ಹುಟ್ಟಿದವರು.

ಎಜಾಜ್ ಪಟೇಲ್ ಅವರು ಚಿಕ್ಕ ವಯಸ್ಸಿನಲ್ಲೇ ನ್ಯೂಜಿಲೆಂಡ್ ಗೆ ತೆರಳಿ ಕ್ರಿಕೆಟ್ ಅಭ್ಯಾಸ ನಡೆಸಿಕೊಂಡು ಬೆಳೆದರಾದರೂ ನ್ಯೂಜಿಲೆಂಡ್ ಕಿರಿಯರ ತಂಡದಲ್ಲಿ ಸ್ಥಾನ ಗಳಿಸಲು ಸಾಧ್ಯವಾಗಲಿಲ್ಲ. ಆರಂಭದಲ್ಲಿ ಎಜಾಜ್ ಪಟೇಲ್ ಅವರು ವೇಗದ ಬೌಲಿಂಗ್ ಮಾಡುತ್ತಿದ್ದರು. ಆಗ ದೀಪಕ್ ಪಟೇಲ್ ಕೋಚ್ ಆಗಿದ್ದರು. ಅವರು ನೀಡಿದ ಸಲಹೆ ಮೇರೆಗೆ ಎಷ್ಟೋ ವರ್ಷಗಳ ಬಳಿಕ ಎಜಾಜ್ ಪಟೇಲ್ ಸ್ಪಿನ್ ಬೌಲಿಂಗ್ ಮಾಡಲು ಆರಂಭಿಸಿದರು.

2018ರಲ್ಲಿ ನ್ಯೂಜಿಲೆಂಡ್ನ ಪ್ಲಂಕೆಟ್ ಶೀಲ್ಡ್ ಕ್ರಿಕೆಟ್ ಟೂರ್ನಿಯಲ್ಲಿ ತಮ್ಮ ಸ್ಪಿನ್ ಕರಾಮತ್ತು ತೋರಿದ ಎಜಾಜ್ ಪಟೇಲ್, ಕೇವಲ 9 ಪಂದ್ಯಗಳಲ್ಲಿ 48 ವಿಕೆಟ್ ಕಿತ್ತರು. ಆ ಟೂರ್ನಿಯಲ್ಲಿ ಅತ್ಯಧಿಕ ವಿಕೆಟ್ ಪಡೆದ ದಾಖಲೆ ಬರೆದರು. ಹಾಗೆಯೇ, ಅತ್ಯುತ್ತಮ ದೇಶೀಯ ಆಟಗಾರ ಎಂಬ ಪ್ರಶಸ್ತಿಯೂ ಅವರಿಗೆ ಲಭಿಸಿತು. ನ್ಯೂಜಿಲೆಂಡ್ ನ ದೇಶೀಯ ಕ್ರಿಕೆಟ್ ನಲ್ಲಿ ನಿರಂತರವಾಗಿ ಸ್ಥಿರ ಪ್ರದರ್ಶನ ನೀಡುತ್ತಾ ಬಂದ ಫಲವಾಗಿ ಎಜಾಜ್ ಅವರಿಗೆ ನ್ಯೂಜಿಲೆಂಡ್ ರಾಷ್ಟ್ರೀಯ ತಂಡದ ಬಾಗಿಲು ತೆರೆದಿದೆ.

2018ರಲ್ಲಿ 30ರ ಹರೆಯದಲ್ಲಿ ಎಜಾಜ್ ಪಟೇಲ್ ಅವರು ಅಂತರರಾಷ್ಟ್ರೀಯ ಕ್ರಿಕೆಟ್ ಗೆ ಪದಾರ್ಪಣೆ ಮಾಡಿದರು. ಪಾಕಿಸ್ತಾನ ವಿರುದ್ಧದ ಟಿ20 ಪಂದ್ಯದಲ್ಲಿ ಅವರು ಆಡಿದರು. ಅದಕ್ಕೆ ಮುನ್ನ ಸತತ ಮೂರು ವರ್ಷಗಳ ಕಾಲ ಅವರು ನ್ಯೂಜಿಲೆಂಡಿನ ಪ್ರಥಮ ದರ್ಜೆ ಕ್ರಿಕೆಟ್ ನಲ್ಲಿ ಅತ್ಯಧಿಕ ವಿಕೆಟ್ ಪಡೆದ ಬೌಲರ್ ಎನಿಸಿದ್ದರು.

ಈಗ ಭಾರತ ವಿರುದ್ಧದ ಟೆಸ್ಟ್ ಪಂದ್ಯದಲ್ಲಿ ಒಂದೇ ಇನ್ನಿಂಗ್ಸಲ್ಲಿ ಅವರು 10 ವಿಕೆಟ್ ಕಬಳಿಸಿದ್ದಾರೆ. ಈ ಸಾಧನೆ ಮಾಡಿದ ವಿಶ್ವದ ಮೂರನೇ ಆಟಗಾರ ಎನಿಸಿದ್ದಾರೆ. ನ್ಯೂಜಿಲೆಂಡ್ ನ ಸಾರ್ವಕಾಲಿಕ ಶ್ರೇಷ್ಠ ವೇಗದ ಬೌಲರ್ ಎನಿಸಿದ ರಿಚರ್ಡ್ ಹ್ಯಾಡ್ಲಿ ಅವರು ಒಂದೇ ಇನ್ನಿಂಗ್ಸಲ್ಲಿ 9 ವಿಕೆಟ್ ಪಡೆದು ದಾಖಲೆ ಬರೆದಿದ್ದರು. ಎಜಾಜ್ ಪಟೇಲ್ ಆ ದಾಖಲೆಯನ್ನ ಮುರಿದಿದ್ದಾರೆ.