ಟೀಂ ಇಂಡಿಯಾಕ್ಕೆ ಸ್ಯಾಮ್ಸನ್​ಗಿಂತ ರಿಷಭ್ ಪಂತ್ ಅಗತ್ಯವೇ ಹೆಚ್ಚು; ಯಾಕೆ?, ಈ ಸ್ಟೋರಿ ಓದಿ!

ಭಾರತೀಯ ಕ್ರಿಕೆಟ್​ನಲ್ಲಿ ಸದ್ಯ ತಲೆಯೆತ್ತಿರುವ ದೊಡ್ದ ಸಮಸ್ಯೆ ಎಂದರೆ ವಿಕೆಟ್ ಜವಾಬ್ದಾರಿ. ಧೋನಿ ತಂಡದಿಂದ ಹೊರಗುಳಿದ ಬಳಿಕ ರಿಷಭ್ ಪಂತ್ ಈ ಸ್ಥಾನಕ್ಕೆ ಬಂದರಾದರೂ ಸಮರ್ಪಕವಾಗಿ ಈ ಜಾಗವನ್ನು ತುಂಬುತ್ತಿಲ್ಲ ಎಂದು ಹೇಳಲಾಗುತ್ತಿದೆ.

ಹೀಗಾಗಿ ಸಂಜು ಸ್ಯಾಮ್ಸನ್​ಗೆ ಅವಕಾಶ ನೀಡಿ ಎಂಬ ಕೂಗು ಬಹುದಿನಗಳಿಂದ ಕೇಳಿಬರುತ್ತಿದೆ. ಆದರೆ, ಈ ವರ್ಷ ನಡೆಯಲಿರುವ ಟಿ-20 ವಿಶ್ವಕಪ್ ಮಹಾಟೂರ್ನಿ ಗಮನದಲ್ಲಿಟ್ಟುಕೊಂಡರೆ ಸ್ಯಾಮ್ಸನ್​ಗಿಂತ ಪಂತ್​ಗೆ ಅವಕಾಶ ನೀಡಿದರೆ ಉತ್ತಮ ಎಂದು ಅಂಕಿಅಂಶಗಳು ಹೇಳುತ್ತಿವೆ.

ಟೀಂ ಇಂಡಿಯಾ ಬ್ಯಾಟಿಂಗ್ ವಿಭಾಗದಲ್ಲಿ ಹೆಚ್ಚು ಬಲಗೈ ಬ್ಯಾಟ್ಸ್​ಮನ್​ಗಳೇ ಇದ್ದಾರೆ. ಶಿಖರ್ ಧವನ್ ಹೊರತು ಪಡಿಸಿ ರೋಹಿತ್ ಶರ್ಮಾ, ಕೆ ಎಲ್ ರಾಹುಲ್, ವಿರಾಟ್ ಕೊಹ್ಲಿ, ಶ್ರೇಯಸ್ ಐಯರ್ ಹೀಗೆ ಟಾಪ್ ಆರ್ಡರ್​​ನಲ್ಲಿ ರೈಟ್ ಹ್ಯಾಂಡ್ ಬ್ಯಾಟ್ಸ್​ಮನ್​ಗಳ ದಂಡೇ ಇದೆ.

ಅಲ್ಲದೆ ಶಿವಂ ದುಬೆ ಸ್ಥಾನದಲ್ಲಿ ಹಾರ್ದಿಕ್ ಪಾಂಡ್ಯ ಬಂದರೆ, ಅವರೂಕೂಡ ಬಲಗೈ ಬ್ಯಾಟ್ಸ್​ಮನ್​ ಆಗಿದ್ದಾರೆ.

ಎಲ್ಲಾದರು ಸ್ಯಾಮ್ಸನ್​ರನ್ನು ವಿಶ್ವಕಪ್ ಟಿ-20ಗೆ ಆಯ್ಕೆ ಮಾಡಿದರೆ ತಂಡಕ್ಕೆ ಮತ್ತೊಬ್ಬ ಬಲಗೈ ಬ್ಯಾಟ್ಸ್​ಮನ್​​ ಕಾಲಿಟ್ಟಂತಾಗುತ್ತದೆ. ಇವರು ಕಣಕ್ಕಿಳಿದರೆ 6ನೇ ಬಲಗೈ ಬ್ಯಾಟ್ಸ್​ಮನ್​​ ಆಗಲಿದ್ದಾರೆ.

ಟೀಂ ಇಂಡಿಯಾ ಈರೀತಿ ಇದ್ದರೆ ಎದುರಾಳಿಗೆ ಇದು ದೊಡ್ಡ ಸವಲಾಗಿ ಪರಿಗಣಿಸುವುದಿಲ್ಲ. ಹೀಗಾಗಿ ಎಡಗೈ ಬ್ಯಾಟ್ಸ್​ಮನ್​ ಆಗಿರುವ ಪಂತ್ ತಂಡದಲ್ಲಿದ್ದರೆ ಉತ್ತಮ.

ಇನ್ನು ರಿಷಭ್ ಪಂತ್ ಯಾವುದೇ ಕ್ರಮಾಂಕದಲ್ಲಿ ಕಣಕ್ಕಿಳಿದರೆ ಬ್ಯಾಟ್ ಬೀಸುವ ಸಾಮರ್ಥ್ಯ ಹೊಂದಿದ್ದಾರೆ. ಆದರೆ, ಸಂಜು ಸ್ಯಾಮ್ಸನ್​ಗೆ ಇದು ಕಷ್ಟಸಾಧ್ಯ.

ಪಂತ್ ಈಗಾಗಲೇ ಓಪನರ್ ಆಗಿಯೂ ಬ್ಯಾಟ್ ಬೀಸಿ ಯಶಸ್ಸು ಕಂಡಿದ್ದಾರೆ. ಅಲ್ಲದೆ 3, 4, 5 ಹಾಗೂ 6ನೇ ಕ್ರಮಾಂಕದಲ್ಲೂ ಆಡಿದ್ದಾರೆ.

ಅದೇ ಸ್ಯಾಮ್ಸನ್​ಗೆ ಪಂತ್ ರೀತಿ ಯಾವುದೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವುದು ಕಷ್ಟಸಾಧ್ಯ. ಅಲ್ಲದೆ ಅಂತಿಮ ಹಂತದಲ್ಲಿ ಪಂತ್ ಸ್ಪೋಟಕ ಬ್ಯಾಟಿಂಗ್ ಮಾಡುವ ಶಕ್ತಿ ಹೊಂದಿದ್ದಾರೆ. ಸ್ಯಾಮ್ಸನ್ ಫಿನಿಶಿಂಗ್ ಜವಾಬ್ದಾರಿ ನಿಭಾಹಿಸುವುದು ಕಷ್ಟ.

ಈ ಬಾರಿಯ ವಿಶ್ವಕಪ್ ಟಿ-20 ಟೂರ್ನಿ ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿದೆ. ಹೀಗಾಗಿ ಕಾಂಗರೂಗಳ ನಾಡಿನಲ್ಲಿ ಆಡಿದ ಅನುಭವ ಇರುವ ಆಟಗಾರ ತಂಡದಲ್ಲಿದ್ದರೆ ಉಪಯುಕ್ತವಾಗಲಿದೆ.

ಆಸ್ಟ್ರೇಲಿಯಾ ಕಂಡೀಷನ್​ನಲ್ಲಿ ರಿಷಭ್ ಪಂತ್​ಗೆ ಈಗಾಗಲೇ ಆಡಿದ ಅನುಭವವಿದೆ. ಅಲ್ಲದೆ ಕಾಂಗರೂಗಳ ನೆಲದಲ್ಲಿ ಶತಕ ಸಿಡಿಸಿ ಪಂತ್ ಅಬ್ಬರಿಸಿದ್ದರು.

ಸಂಜು ಸ್ಯಾಮ್ಸನ್​ಗೆ ಅಂತರಾಷ್ಟ್ರೀಯ ಕ್ರಿಕೆಟ್ ಆಡಿದ ಅನುಭವ ಕಡಿಮೆ ಇರುವ ಜೊತೆಗೆ ವಿದೇಶದಲ್ಲೂ ಹೆಚ್ಚು ಕ್ರಿಕೆಟ್ ಆಡಿಲ್ಲ.

ಇದನ್ನೆಲ್ಲ ಗಮನಿಸಿದರೆ ಟಿ-20 ವಿಶ್ವಕಪ್ ಮಹಾಟೂರ್ನಿಗೆ ಸಂಜು ಸ್ಯಾಮ್ಸನ್ ಬದಲು ರಿಷಭ್ ಪಂತ್ ಅವರನ್ನೇ ಆಯ್ಕೆ ಮಾಡಿದರೆ ಉತ್ತಮ ಎಂದು ಹೇಳಲಾಗುತ್ತಿದೆ.

ಈ ವರ್ಷದ ಅಕ್ಟೋಬರ್​ನಲ್ಲಿ ಟಿ-20 ವಿಶ್ವಕಪ್ ಟೂರ್ನಿ ಆಸ್ಟ್ರೇಲಿಯಾದಲ್ಲಿ ಆರಂಭವಾಗಲಿದೆ. ಮಾಹಿತಿಯ ಪ್ರಕಾರ ಅಕ್ಟೋಬರ್ 18ಕ್ಕೆ ಶ್ರೀಲಂಕಾ ಹಾಗೂ ಐರ್ಲೆಂಡ್ ನಡುವೆ ಮೊದಲ ಪಂದ್ಯ ನಡೆಯಲಿದೆ.