ಸಚಿನ್-ಸೆಹ್ವಾಗ್ ಸ್ಫೋಟಕ ಬ್ಯಾಟಿಂಗ್ ನೋಡಲು ವಾಂಖೆಡೆಯಲ್ಲಿ ಸೇರಿದ್ದ ಪ್ರೇಕ್ಷಕರೆಷ್ಟು ಗೊತ್ತಾ?

ದೇಶದಲ್ಲಿ ರಸ್ತೆ ಸುರಕ್ಷತೆ ಬಗ್ಗೆ ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ನಡೆದ ರೋಡ್ ಸೇಫ್ಟಿ ಟಿ-20 ಸರಣಿಯ ಮೊದಲ ಪಂದ್ಯದಲ್ಲೇ ಭಾರತ ಲೆಜೆಂಡ್ಸ್ ತಂಡ ಭರ್ಜರಿ ಗೆಲುವು ಸಾಧಿಸಿದೆ.

ವೆಸ್ಟ್ ಇಂಡೀಸ್ ಲೆಜೆಂಡ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಸಚಿನ್ ತೆಂಡೂಲ್ಕರ್- ವಿರೇಂದ್ರ ಸೆಹ್ವಾಗ್ ಜೋಡಿ ತಮ್ಮ ಹಳೆದ ಖದರ್ ತೋರಿಸಿ ಭಾರತಕ್ಕೆ 7 ವಿಕೆಟ್​ಗಳ ಭರ್ಜರಿ ಜಯ ತಂದುಕೊಟ್ಟರು.

ಮೊದಲು ಬ್ಯಾಟ್ ಮಾಡಿದ ಬ್ರಿಯಾನ್ ಲಾರ ನಾಯಕತ್ವದ ವೆಸ್ಟ್ ಇಂಡೀಸ್ ಲೆಜೆಂಡ್ ತಂಡ 20 ಓವರ್​ನಲ್ಲಿ 8 ವಿಕೆಟ್ ನಷ್ಟಕ್ಕೆ 150 ರನ್ ಬಾರಿಸಿತು.

ವಿಂಡೀಸ್ ಪರ ಶಿವನಾರಯಣ್ ಚಂದ್ರಪಾಲ್ 41 ಎಸೆತಗಳಲ್ಲಿ 61 ರನ್ ಸಿಡಿಸಿದರೆ, ಡ್ಯಾರೆನ್ ಗಂಗಾ 24 ಎಸೆತಗಳಲ್ಲಿ 32 ರನ್ ಗಳಿಸಿದರು.

ಭಾರತ ಲೆಜೆಂಡ್ ಪರ ಜಹೀರ್ ಖಾನ್, ಮುನಾಫ್ ಪಟೇಲ್ ಹಾಗೂ ಪ್ರಗ್ಯಾನ್ ಓಜಾ ತಲಾ 2 ವಿಕೆಟ್ ಕಿತ್ತರು.

151 ರನ್​ಗಳ ಸವಾಲಿನ ಗುರಿ ಬೆನ್ನಟ್ಟಿದ ಭಾರತ ತಂಡಕ್ಕೆ ಓಪನರ್​ಗಳಾದ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಹಾಗೂ ವಿರೇಂದ್ರ ಸೆಹ್ವಾಗ್ ಭರ್ಜರಿ ಆರಂಭ ಒದಗಿಸಿದರು.

ಅದರಲ್ಲು ಸೆಹ್ವಾಗ್, ಇನ್ನಿಂಗ್ಸ್​ನ ಮೊದಲೆರಡು ಎಸೆತವನ್ನು ಬೌಂಡರಿಗೆ ಅಟ್ಟಿ ಹಳೆಯ ಡ್ಯಾಶಿಂಗ್ ಶೈಲಿಯ ಬ್ಯಾಟಿಂಗ್ ಕಣ್ಣೆದುರು ತಂದರು.

ಭಾರತ ಕ್ರಿಕೆಟ್ ಕಂಡ ಸರ್ವಶ್ರೇಷ್ಠ ಆರಂಭಿಕ ಜೋಡಿ ಸಚಿನ್-ಸೆಹ್ವಾಗ್ ಮೊದಲ ವಿಕೆಟ್​ಗೆ 83 ರನ್​ಗಳ ಜೊತೆಯಾಟ ಆಡಿ ತಂಡಕ್ಕೆ ಗೆಲುವನ್ನು ಹತ್ತಿರ ಮಾಡಿದರು. 10.2 ಓವರ್​​ನಲ್ಲಿ 83 ರನ್​ಗಳು ಹರಿದುಬಂತು.

ನಾಯಕ ಸಚಿನ್ ತೆಂಡೂಲ್ಕರ್ 29 ಎಸೆತಗಳಲ್ಲಿ 36 ರನ್ ಗಳಿಸಿ ಔಟ್ ಆದರೆ, ಮೊಹಮ್ಮದ್ ಕೈಫ್ 16 ಎಸೆತಗಳಲ್ಲಿ 14 ಹಾಗೂ ಮನ್​ಪ್ರೀತ್​ ಗೋನಿ ಸೊನ್ನೆ ಸುತ್ತಿದರು.

ಆದರೆ, ಇತ್ತ ಸೆಹ್ವಾಗ್ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಮನರಂಚಿಸಿದರು. ಅಂತಿಮ ಹಂತದಲ್ಲಿ ಯುವರಾಜ್ ಸಿಂಗ್ ಜೊತೆಯಾಗಿ ವಿನ್ನಿಂಗ್ ಶಾಟ್ ಕೂಡ ಹೊಡೆದರು.

ಅದರಲ್ಲು ಯುವರಾಜ್ ತಮ್ಮ ಸಿಗ್ನೇಚರ್ ಶೈಲಿಯಲ್ಲಿ ಚೆಂಡನ್ನು ಸಿಕ್ಸ್​ಗೆ ಅಟ್ಟಿದ್ದು ಅಮೋಘವಾಗಿತ್ತು.

ಅಂತಿಮವಾಗಿ ಭಾರತ 18.2 ಓವರ್​ನಲ್ಲಿ 3 ವಿಕೆಟ್ ಕಳೆದುಕೊಂಡು 151 ರನ್ ಬಾರಿಸಿ 7 ವಿಕೆಟ್​ಗಳ ಭರ್ಜರಿ ಗೆಲುವು ಸಾಧಿಸಿತು.

ಸೆಹ್ವಾಗ್ 57 ಎಸೆತಗಳಲ್ಲಿ 11 ಬೌಂಡರಿಯೊಂದಿಗೆ ಅಜೇಯ 74 ರನ್ ಚಚ್ಚಿದರೆ, ಯುವಿ 7 ಎಸೆತಗಳಲ್ಲಿ 1 ಸಿಕ್ಸರ್​ನೊಂದಿಗೆ 10 ರನ್ ಗಳಿಸಿ ಅಜೇಯರಾಗಿ ಉಳಿದರು.

ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿದ ಆರು ವರ್ಷಗಳ ಬಳಿಕ ಆಡಿದ ಮೊದಲ ಪಂದ್ಯದಲ್ಲೇ ಅಬ್ಬರಿಸಿದ ವಿರೇಂದ್ರ ಸೆಹ್ವಾಗ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಬಾಜಿಕೊಂಡರು.

ವಿಶೇಷ ಎಂದರೆ, ಈ ದಿಗ್ಗಜರ ಆಟವನ್ನು ಕಣ್ತುಂಬಿಕೊಳ್ಳಲು ಮುಂಬೈನ ವಾಂಖೆಡೆ ಮೈದಾನಕ್ಕೆ ಅಭಿಮಾನಿಗಳ ಜನಸಾಗರವೇ ಹರಿದುಬಂದಿತ್ತು.

ಭಾರತ ಹಾಗೂ ವೆಸ್ಟ್ಇಂಡೀಸ್ ದಿಗ್ಗಜರ ನಡುವಣ ರೋಚಕ ಕದನಕ್ಕೆ ಸುಮಾರು 50,000ಕ್ಕೂ ಹೆಚ್ಚು ಪ್ರೇಕ್ಷಕರು ಸಾಕ್ಷಿಯಾದರು.