Suresh Raina: ಸುರೇಶ್ ರೈನಾ ಜೀವನಾಧಾರಿತ ಚಿತ್ರ: ಯಾರಾಗಲಿದ್ದಾರೆ ನಾಯಕ..?

ಕ್ರಿಕೆಟ್ ಅಂಗಳದ ಜಂಟಲ್​ಮ್ಯಾನ್ ಎನಿಸಿಕೊಂಡಿರುವ ಟೀಮ್ ಇಂಡಿಯಾದ ಮಾಜಿ ಆಲ್​ರೌಂಡರ್ ಸುರೇಶ್ ರೈನಾ ಅವರ ಜೀವನಾಧಾರಿತ ಸಿನಿಮಾ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ.

ಈಗಾಗಲೇ ಎಂಎಸ್ ಧೋನಿ, ಕಪಿಲ್ ದೇವ್ (83 ಸಿನಿಮಾ), ಮೊಹಮ್ಮದ್ ಅಜರುದ್ದೀನ್ (ಅಜರ್ ಸಿನಿಮಾ) ಜೀವನಾಧಾರಿತ ಚಿತ್ರಗಳು ಮೂಡಿ ಬಂದಿವೆ. ಇದೀಗ ಈ ಪಟ್ಟಿಗೆ ರೈನಾ ಅವರು ಕೂಡ ಸೇರ್ಪಡೆಯಾಗಲಿದ್ದಾರೆ.

ಈ ಬಗ್ಗೆ ಖುದ್ದು ಸುರೇಶ್ ರೈನಾ ಮಾಹಿತಿ ತಿಳಿಸಿದ್ದು, ತಮ್ಮ ಜೀವನಾಧರಿತ ಚಿತ್ರ ನಿರ್ಮಿಸಿದರೆ ಯಾರು ನಾಯಕನಾಗಬೇಕೆಂಬುದನ್ನು ಕೂಡ ಬಹಿರಂಗಪಡಿಸಿದ್ದಾರೆ.

ಹೌದು, ರೈನಾ ತಮ್ಮ ಬಯೋಪಿಕ್​ನಲ್ಲಿ ತಮಿಳಿನ ಖ್ಯಾತ ನಟ ಸೂರ್ಯ ಅಥವಾ ಮಲಯಾಳಂ ನಟ ದುಲ್ಭರ್ ಸಲ್ಮಾನ್ ನಾಯಕನಾಗಬೇಕು ಎಂಬ ಇಂಗಿತ ಹೊರಹಾಕಿದ್ದಾರೆ.

ಸೂರ್ಯ ಅವರು ನನ್ನ ಆಪ್ತರಲ್ಲಿ ಒಬ್ಬರು. ಅವರು ಕೂಡ ಕ್ರಿಕೆಟ್ ಪ್ರೇಮಿ. ಹೀಗಾಗಿ ನನ್ನ ಕಥೆಗೆ ಅವರು ಜೀವತುಂಬುತ್ತಾರೆ ಎಂಬ ವಿಶ್ವಾಸವಿದೆ. ಅದೇ ರೀತಿ ದುಲ್ಖರ್ ಕೂಡ ಉತ್ತಮ ಕಲಾವಿದ. ಅವರು ಕೂಡ ನನ್ನ ಬಯೋಪಿಕ್​ನಲ್ಲಿ ಕಾಣಿಸಿಕೊಂಡರೆ ಉತ್ತಮ ಎಂದಿದ್ದಾರೆ ರೈನಾ.

ರೈನಾ ಅವರ ಈ ಹೇಳಿಕೆ ಬೆನ್ನಲ್ಲೇ ಕಾಲಿವುಡ್​ನಲ್ಲಿ ಎಡಗೈ ದಾಂಡಿಗನ ಕಥೆಗೆ ಚಿತ್ರಕಥೆ ಸಿದ್ಧತೆಗಳು ನಡೆಯುತ್ತಿವೆ ಎಂಬ ಮಾಹಿತಿಯೊಂದು ಹೊರಬಿದ್ದಿದೆ. ಅಲ್ಲದೆ ಹೀಗಾಗಿಯೇ ಚೆನ್ನೈ ಸೂಪರ್ ಕಿಂಗ್ಸ್ ಆಟಗಾರ ತಮ್ಮ ಬಯೋಪಿಕ್ ಬಗ್ಗೆ ಹೇಳಿಕೆ ನೀಡಿದ್ದಾರೆ ಎನ್ನಲಾಗಿದೆ.

ಒಟ್ಟಿನಲ್ಲಿ ಧೋನಿ, ಅಜರ್ ಅವರ ತೆರೆಮರೆಯ ಕಹಾನಿ ನೋಡಿದ್ದ ಕ್ರಿಕೆಟ್ ಅಭಿಮಾನಿಗಳಿಗೆ ಸುರೇಶ್ ರೈನಾ ಅವರ ಜೀವನಚರಿತ್ರೆಯನ್ನು ಬೆಳ್ಳಿಪರದೆಯಲ್ಲಿ ವೀಕ್ಷಿಸುವ ಅವಕಾಶ ಶೀಘ್ರದಲ್ಲೇ ದೊರೆಯಲಿದೆಯಾ ಕಾದು ನೋಡಬೇಕಿದೆ.