ಅಂದು ವಿಲನ್...ಇಂದು ಹೀರೋ: ಲೆಜೆಂಡ್ ಆಟಗಾರರ ಪಟ್ಟಿಗೆ ಹೊಸ ಸೇರ್ಪಡೆ..!

ಅದು 2007, ದಕ್ಷಿಣ ಆಫ್ರಿಕಾದಲ್ಲಿ ಚೊಚ್ಚಲ ಟಿ20 ಕ್ರಿಕೆಟ್ ಟೂರ್ನಿಯಲ್ಲಿ ಇಂಗ್ಲೆಂಡ್ ಮತ್ತು ಭಾರತ ಮುಖಾಮುಖಿಯಾಗಿತ್ತು. ಮೊದಲು ಬ್ಯಾಟ್ ಮಾಡಿದ ಟೀಮ್ ಇಂಡಿಯಾ ಭರ್ಜರಿಯಾಗಿ ಇನಿಂಗ್ಸ್ ಆರಂಭಿಸಿತ್ತು.

ಪಂದ್ಯದ 19ನೇ ಓವರ್ ಎಸೆಯಲು ಬಂದ ಸ್ಟುವರ್ಟ್​ ಬ್ರಾಡ್ ಕನಸು ಮನಸಲ್ಲೂ ಊಹಿಸದ ಘಟನೆಯೊಂದು ನಡೆದೇ ಹೋಯಿತು. ಹೌದು, ಬ್ರಾಡ್ 6 ಎಸೆತಗಳಲ್ಲೂ ಸಿಕ್ಸರ್​ ಸಿಡಿಸಿ ಯುವರಾಜ್ ಸಿಂಗ್ ಅಪರೂಪದ ದಾಖಲೆ ನಿರ್ಮಿಸಿದರು.

ಎಲ್ಲರೂ ಸ್ಟುವರ್ಟ್ ಬ್ರಾಡ್ ಎಂಬ ಬೌಲರ್​ನ ಕೆರಿಯರ್ ಮುಗೀತು ಎಂದೇ ಅಂದುಕೊಂಡಿದ್ದರು. ಖುದ್ದು ಸ್ಟುವರ್ಟ್ ತಂದೆ ಕ್ರಿಸ್ ಬ್ರಾಡ್ ಕೂಡ ಯುವಿ ಬಳಿ ಬಂದು ನನ್ನ ಮಗನ ಕೆರಿಯರ್ ಮುಗಿಸಿಬಿಟ್ಟೆಯಲ್ಲಾ ಎಂದಿದ್ದರು.

ಆದರೆ ಆ ಕಹಿ ಘಟನೆಯನ್ನು ಮೆಟ್ಟಿ ನಿಂತು ಇಂದು ವಿಶ್ವ ದಾಖಲೆ ನಿರ್ಮಿಸಿದ್ದಾರೆ ಅದೇ ಸ್ಟುವರ್ಟ್ ಬ್ರಾಡ್. 13 ವರ್ಷಗಳ ಹಿಂದೆ ವಿಲನ್ ಆಗಿದ್ದ ಅದೇ ಬ್ರಾಡ್ ಇಂದು ಟೆಸ್ಟ್ ಕ್ರಿಕೆಟ್​ನಲ್ಲಿ 500 ವಿಕೆಟ್ ಉರುಳಿಸಿ ವಿಶ್ವ ದಾಖಲೆ ಬರೆದಿದ್ದಾರೆ.

ಇಂತಹದೊಂದು ಸಾಧನೆ ಮಾಡಿದ ವಿಶ್ವದ 4ನೇ ವೇಗಿ ಹಾಗೂ 7ನೇ ಬೌಲರ್​ ಎನಿಸಿಕೊಂಡಿದ್ದಾರೆ. ಹಾಗೆಯೇ ಇಂಗ್ಲೆಂಡ್​ನ 2ನೇ ಬೌಲರ್ ಎಂಬ ಹೆಗ್ಗಳಿಕೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.

ಇಂಗ್ಲೆಂಡ್​ನ ಮ್ಯಾನ್ಚೆಸ್ಟರ್‌ನ ಎಮಿರೇಟ್ಸ್ ಓಲ್ಡ್ ಟ್ರಾಫರ್ಡ್ ಮೈದಾನದಲ್ಲಿ ನಡೆದ ವೆಸ್ಟ್ ಇಂಡೀಸ್ ವಿರುದ್ಧದ 3ನೇ ಮತ್ತು ಕೊನೆಯ ಟೆಸ್ಟ್ ಪಂದ್ಯದಲ್ಲಿ ಬ್ರಾಡ್ ಈ ಸಾಧನೆ ಮೆರೆದರು. 140ನೇ ಟೆಸ್ಟ್ ಪಂದ್ಯವಾಡಿದ ಬ್ರಾಡ್ ಕ್ರೇಗ್ ಬ್ರಾಥ್ ವೇಟ್ ವಿಕೆಟ್ ಪಡೆಯುವುದರೊಂದಿಗೆ 500 ವಿಕೆಟ್ ಉರುಳಿಸಿದ ಕೀರ್ತಿಗೆ ಪಾತ್ರರಾದರು.

ಟೆಸ್ಟ್ ಕ್ರಿಕೆಟ್ ನಲ್ಲಿ ಅತೀ ಹೆಚ್ಚು ವಿಕೆಟ್ ಪಡೆದ ಬೌಲರ್​ಗಳ ಪಟ್ಟಿ ಹೀಗಿದೆ:

1- ಮುತ್ತಯ್ಯ ಮುರಳೀಧರನ್ (800).

2- ಶೇನ್ ವಾರ್ನ್ (708)

3- ಅನಿಲ್ ಕುಂಬ್ಳೆ ( 619)

4- ಅ್ಯಂಡರ್ಸನ್ (619)

5- ಗ್ಲೆನ್ ಮೆಕ್ ಗ್ರಾಥ್ ( 563)

6- ಕಟ್ನಿ ವಾಲ್ಶ್ (519)

7- ಸ್ಟುವರ್ಟ್ ಬ್ರಾಡ್- (500)