Sri Lanka: ಏಕದಿನ ಕ್ರಿಕೆಟ್​ನಲ್ಲಿ ಅತ್ಯಂತ ಕೆಟ್ಟ ದಾಖಲೆ ಬರೆದ ಶ್ರೀಲಂಕಾ

ಏಕದಿನ ಕ್ರಿಕೆಟ್​ ಇತಿಹಾಸದ ಅತ್ಯಂತ ಕೆಟ್ಟ ದಾಖಲೆ ಇದೀಗ ಶ್ರೀಲಂಕಾ ಪಾಲಾಗಿದೆ. ಇಂಗ್ಲೆಂಡ್​ ವಿರುದ್ದದ 2ನೇ ಏಕದಿನ ಪಂದ್ಯದಲ್ಲಿ ಸೋಲುವ ಮೂಲಕ ಶ್ರೀಲಂಕಾ ಏಕದಿನ ಕ್ರಿಕೆಟ್​ನಲ್ಲಿ ಅತೀ ಹೆಚ್ಚು ಸೋಲುಂಡ ತಂಡ ಎನಿಸಿಕೊಂಡಿದೆ.

ಶ್ರೀಲಂಕಾ ತಂಡ ಏಕದಿನ ಕ್ರಿಕೆಟ್​ನಲ್ಲಿ 428 ಪಂದ್ಯಗಳಲ್ಲಿ ಸೋಲು ಕಂಡಿದೆ. ಲಂಕಾ ಹೀನಾಯ ದಾಖಲೆ ಬರೆಯುವುದರೊಂದಿಗೆ ಟೀಮ್ ಇಂಡಿಯಾ ತನ್ನ ಹೆಸರಿನಲ್ಲಿದ್ದ ಕೆಟ್ಟ ದಾಖಲೆಯನ್ನು ಕಳಚಿಕೊಂಡಿದೆ.

ಶ್ರೀಲಂಕಾ ಇದುವರೆಗೆ 858 ಏಕದಿನ ಪಂದ್ಯಗಳನ್ನು ಆಡಿದ್ದು, ಅದರಲ್ಲಿ 390 ಗೆಲುವು ಸಾಧಿಸಿದರೆ 428 ಸೋಲು ಅನುಭವಿಸಿದೆ. ಹಾಗೆಯೇ ಭಾರತ 993 ಏಕದಿನ ಪಂದ್ಯಗಳನ್ನು ಆಡಿದ್ದು ಅದರಲ್ಲಿ 427 ಸೋಲನುಭವಿಸಿದೆ. ಇಲ್ಲಿ ಶ್ರೀಲಂಕಾಗೆ ಹೋಲಿಸಿದರೆ ಭಾರತ 137 ಹೆಚ್ಚು ಪಂದ್ಯಗಳನ್ನು ಆಡಿದೆ. ಇದೀಗ ಭಾರತಕ್ಕಿಂತ ಶ್ರೀಲಂಕಾ ತಂಡ ಹೆಚ್ಚು ಸೋಲು ಕಾಣುವ ಮೂಲಕ ಕಳೆದ ಕೆಲ ವರ್ಷಗಳಿಂದ ಭಾರತದ ಹೆಸರಿನಲ್ಲಿದ್ದ ಕೆಟ್ಟ ದಾಖಲೆ ಲಂಕಾ ಪಾಲಾಗಿದೆ.

ಇನ್ನು ಏಕದಿನ ಕ್ರಿಕೆಟ್​ನಲ್ಲಿ ಅತೀ ಹೆಚ್ಚು ಸೋಲು ಕಂಡಿರುವ ತಂಡಗಳ ಪಟ್ಟಿಯಲ್ಲಿ ಪಾಕಿಸ್ತಾನ ಮೂರನೇ ಸ್ಥಾನದಲ್ಲಿದ್ದು, ಪಾಕ್ ತಂಡ ಇದುವರೆಗೆ 414 ಪಂದ್ಯಗಳಲ್ಲಿ ಪರಾಜಯಗೊಂಡಿದೆ. ಹಾಗೆಯೇ ವೆಸ್ಟ್ ಇಂಡೀಸ್ 384 ಪಂದ್ಯಗಳನ್ನು ಸೋತು 4ನೇ ಸ್ಥಾನ ಅಲಂಕರಿಸಿದೆ, 375 ಮ್ಯಾಚ್​ಗಳನ್ನು ಸೋತಿರುವ ಜಿಂಬಾಬ್ವೆ 5ನೇ ಸ್ಥಾನದಲ್ಲಿದೆ.

ಇಲ್ಲಿ ಮತ್ತೊಂದು ವಿಶೇಷವೆಂದರೆ ಟಿ20 ಕ್ರಿಕೆಟ್​ನಲ್ಲೂ ಶ್ರೀಲಂಕಾ ಅತಿ ಹೆಚ್ಚು ಸೋಲು ಕಂಡ ತಂಡವಾಗಿ ಮೊದಲ ಸ್ಥಾನದಲ್ಲಿದೆ. ಶ್ರೀಲಂಕಾ ಟಿ20 ಕ್ರಿಕೆಟ್​ನಲ್ಲಿ 70 ಸೋಲು ಕಂಡಿದೆ. ಇನ್ನು ಈ ಪಟ್ಟಿಯಲ್ಲಿ ವೆಸ್ಟ್ ಇಂಡೀಸ್ 67 ಸೋಲಿನೊಂದಿಗೆ 2ನೇ ಸ್ಥಾನದಲ್ಲಿದ್ದರೆ, 65 ಸೋಲು ಕಂಡಿರುವ ಪಾಕಿಸ್ತಾನ ಮೂರನೇ ಸ್ಥಾನದಲ್ಲಿದೆ.

ಇನ್ನು ಭಾರತ-ಶ್ರೀಲಂಕಾ ಸರಣಿ ಜುಲೈ 13 ರಿಂದ ಶುರುವಾಗಲಿದ್ದು, ಈ ಸರಣಿಯಲ್ಲಿ ಟೀಮ್ ಇಂಡಿಯಾ ಸೋತರೆ ಮತ್ತೆ ಏಕದಿನ ಕ್ರಿಕೆಟ್​ನಲ್ಲಿ ಅತೀ ಹೆಚ್ಚು ಸೋಲುಂಡ ತಂಡ ಎಂಬ ಅಪಖ್ಯಾತಿ ಭಾರತ ತಂಡದ ಪಾಲಾಗಲಿದೆ. ಹೀಗಾಗಿ ಮುಂದಿನ ಭಾರತ-ಶ್ರೀಲಂಕಾ ಸರಣಿ ಮಹತ್ವದ ಸರಣಿ ಎನಿಸಿಕೊಂಡಿದೆ.