ಈ ಕ್ರಿಕೆಟಿಗನನ್ನು ಭಯೋತ್ಪಾದಕ ಎಂದರು..ಕೊಹ್ಲಿಯ ದಾಖಲೆ ಮುರಿದರು..15 ವರ್ಷ ದಂಡ ಪಾವತಿಸಿದರು..!

ಮಾರ್ಚ್ 31 ಕ್ರಿಕೆಟ್ ಪ್ರೇಮಿಗಳಿಗೆ ವಿಶೇಷ ದಿನ. ಏಕೆಂದರೆ ಕಲಾತ್ಮಕತೆ, ಕೌಶಲ್ಯತೆ ಮತ್ತು ತಾಳ್ಮೆ. ಈ ಮೂರನ್ನು ಅಳವಡಿಸಿಕೊಂಡಿದ್ದ ಆಟಗಾರರೊಬ್ಬರು ಅಂದು ಜನಿಸಿದ್ದರು.

ಅವರು ಬೇರೆ ಯಾರೂ ಅಲ್ಲ. ಭಾರತೀಯ ಮೂಲದ ದಕ್ಷಿಣ ಆಫ್ರಿಕಾ ಆಟಗಾರ ಹಾಶಿಂ ಆಮ್ಲಾ. ಹೌದು, ವಿಶ್ವ ಕ್ರಿಕೆಟ್​ಗೆ ದಿ ಗ್ರೇಟ್ ವಾಲ್ ರಾಹುಲ್ ದ್ರಾವಿಡ್​ ಆಗಿದ್ದರೆ ಅತ್ತ ದಕ್ಷಿಣ ಆಫ್ರಿಕಾ ತಂಡದ ಪಾಲಿಗೆ ಆಮ್ಲಾ ಗೋಡೆ ಆಗಿದ್ದರು.

ಇಂದು ಆಮ್ಲಾ ಅವರಿಗೆ 37ನೇ ವರ್ಷ ಹುಟ್ಟುಹಬ್ಬದ ಸಂಭ್ರಮ. ಹಾಶಿಂ ಆಮ್ಲಾ ಅವರ ಪೋಷಕರು ಗುಜರಾತ್ ಮೂಲದವರಾಗಿದ್ದರೂ, ಇವರು ಜನಿಸಿದ್ದು ಡರ್ಬನ್​ನಲ್ಲಿ.

ಭಾರತೀಯರ ಕ್ರಿಕೆಟ್ ಕ್ರೇಜ್ ಏನೋ, ಬಾಲ್ಯದಿಂದಲೇ ಆಮ್ಲಾ ಅವರು ಬ್ಯಾಟ್ ಮೇಲೆ ಕಣ್ಣಿಟಿದ್ದರು. ಅದರಂತೆ ತಮ್ಮ ಕನಸನ್ನು ಸಕಾರಗೊಳಿಸಿದ ಆಮ್ಲಾ ದಕ್ಷಿಣ ಆಫ್ರಿಕಾ ಪರ ಕಣಕ್ಕಿಳಿದರು.

ಅದರಲ್ಲೂ ಸೌತ್ ಆಫ್ರಿಕಾ ಟೆಸ್ಟ್​ ತಂಡದ ಬೆನ್ನೆಲುಬಾಗಿ ನಿಂತರು. ದಕ್ಷಿಣ ಆಫ್ರಿಕಾ ಪರವಾಗಿ 124 ಟೆಸ್ಟ್‌ಗಳನ್ನು ಆಡಿರುವ ಇವರು 46.64 ಸರಾಸರಿಯಲ್ಲಿ 9282 ರನ್ ಗಳಿಸಿದ್ದಾರೆ. ಇದರಲ್ಲಿ 28 ಶತಕಗಳು ಮತ್ತು 41 ಅರ್ಧಶತಕಗಳು ಮೂಡಿ ಬಂದಿವೆ.

ಇದಲ್ಲದೆ, 181 ಏಕದಿನ ಪಂದ್ಯಗಳಲ್ಲಿ 27 ಶತಕಗಳನ್ನು ಒಳಗೊಂಡಂತೆ ಸುಮಾರು 50 ಸರಾಸರಿಯಲ್ಲಿ 8113 ರನ್ ಗಳಿಸಿದ್ದಾರೆ. ಹಾಗೆಯೇ ಟಿ20 ಯಲ್ಲಿ ಕಮಾಲ್ ಮಾಡಿರುವ ಆಮ್ಲಾ 1277 ರನ್ ಬಾರಿಸಿದ್ದಾರೆ. ಇನ್ನು ಐಪಿಎಲ್‌ನಲ್ಲಿ ಶತಕ ಸಿಡಿಸಿ ಆಟಗಾರರಲ್ಲಿ ಆಮ್ಲಾ ಕೂಡ ಒಬ್ಬರು.

2004 ರಲ್ಲಿ ಕೋಲ್ಕತ್ತಾದ ಈಡನ್ ಗಾರ್ಡನ್‌ ಮೈದಾನದಲ್ಲಿ ಭಾರತ ವಿರುದ್ಧ ಟೆಸ್ಟ್ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ ಹಾಶಿಂ ಆಮ್ಲಾ ಎರಡು ಇನ್ನಿಂಗ್ಸ್‌ಗಳಲ್ಲಿ ಗಳಿಸಿದ್ದು ಕೇವಲ 26 ರನ್. ಹಾಗೆಯೇ ಆರಂಭಿಕ 6 ಟೆಸ್ಟ್ ಇನ್ನಿಂಗ್ಸ್‌ನಲ್ಲಿಆಮ್ಲಾ ಅವರು 30ರ ಗಡಿದಾಟಲು ಸಾಧ್ಯವಾಗಿರಲಿಲ್ಲ.

ಇನ್ನೇನು ತಂಡದಿಂದ ಕೈ ಬಿಡಲಿದ್ದಾರೆ ಎನ್ನುವಾಗಲೇ ನ್ಯೂಜಿಲೆಂಡ್ ವಿರುದ್ಧ ಭರ್ಜರಿ ಶತಕ ಸಿಡಿಸಿ ಮಿಂಚಿದರು. ಅಲ್ಲದೆ 2012 ರಲ್ಲಿ ಓವಲ್ ಮೈದಾನದಲ್ಲಿ ಇಂಗ್ಲೆಂಡ್ ವಿರುದ್ಧ ತ್ರಿಶತಕ ಬಾರಿಸಿ ಹೊಸ ಇತಿಹಾಸ ನಿರ್ಮಿಸಿದರು. ಈ ಮೂಲಕ ದಕ್ಷಿಣ ಆಫ್ರಿಕಾ ಪರ ಟೆಸ್ಟ್​ ಕ್ರಿಕೆಟ್​ನಲ್ಲಿ ತ್ರಿಶತಕ ಬಾರಿಸಿದ ಮೊದಲ ಕ್ರಿಕೆಟಿಗ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಟೆಸ್ಟ್ ಮಾತ್ರವಲ್ಲ, ಏಕದಿನ ಕ್ರಿಕೆಟ್‌ನಲ್ಲೂ ಹಾಶಿಂ ಆಮ್ಲಾ ತಮ್ಮದೆಯಾದ ಛಾಪು ಮೂಡಿಸಿದ್ದಾರೆ. ಟೆಸ್ಟ್​ ಕ್ರಿಕೆಟ್​ಗೆ ಸೀಮಿತವಾಗಿದ್ದ ಆಮ್ಲಾ ಆ ಬಳಿಕ ಏಕದಿನ ಕ್ರಿಕೆಟ್‌ನಲ್ಲಿ 2000, 3000, 4000, 5000 ಮತ್ತು 6000 ರನ್‌ಗಳನ್ನು ವೇಗವಾಗಿ ಪೂರೈಸಿದ ದಾಖಲೆ ಬರೆದಿರುವುದು ವಿಶೇಷ.

ಅಷ್ಟೇ ಅಲ್ಲದೆ ಅತಿ ವೇಗವಾಗಿ 20 ಏಕದಿನ ಶತಕಗಳ ದಾಖಲೆಯನ್ನು ನಿರ್ಮಿಸಿದರು. ಕೇವಲ 108 ಇನ್ನಿಂಗ್ಸ್‌ಗಳಲ್ಲಿ 20 ಶತಕಗಳನ್ನು ಬಾರಿಸುವ ಮೂಲಕ ವಿರಾಟ್ ಕೊಹ್ಲಿಯ ದಾಖಲೆಯನ್ನು ಮುರಿದರು. ಕೊಹ್ಲಿ ಈ ಸಾಧನೆ ಮಾಡಲು 133 ಇನ್ನಿಂಗ್ಸ್‌ ಆಡಿದ್ದರು.

2014 ರಲ್ಲಿ ಗ್ರೇಮ್ ಸ್ಮಿತ್ ನಿವೃತ್ತರಾದ ಬಳಿಕ ಹಾಶಿಂ ಆಮ್ಲಾ ದಕ್ಷಿಣ ಆಫ್ರಿಕಾ ಟೆಸ್ಟ್ ತಂಡದ ನಾಯಕತ್ವದ ಉಸ್ತುವಾರಿ ವಹಿಸಿಕೊಂಡರು. ಹೀಗೆ ಬ್ಲ್ಯಾಕ್ ಪೀಪಲ್ ಕೆಟಗರಿಯಲ್ಲಿ ಅವರು ದಕ್ಷಿಣ ಆಫ್ರಿಕಾ ಟೆಸ್ಟ್​ ತಂಡವನ್ನು ಮುನ್ನೆಡೆಸಿದ ಮೊದಲ ನಾಯಕ ಎನಿಸಿಕೊಂಡರು.

ನಾಯಕತ್ವದ ಬೆನ್ನಲ್ಲೇ ಫಾರ್ಮ್​ ಹಾಶಿಂ ಆಮ್ಲಾ ಫಾರ್ಮ್​ ಕಳೆದುಕೊಂಡರು. ಅದರಲ್ಲೂ ಭಾರತದ ವಿರುದ್ಧ 0–3 ಟೆಸ್ಟ್ ಸರಣಿಯಲ್ಲಿ ಸೋತ ಬಳಿಕ 2016 ರ ಜನವರಿಯಲ್ಲಿ ನಾಯಕತ್ವವನ್ನು ತ್ಯಜಿಸಿದರು.

ಹಾಶಿಂ ಆಮ್ಲಾ ಅವರು ತಮ್ಮ ವೃತ್ತಿಜೀವನದುದ್ದಕ್ಕೂ ಪ್ರತಿ ತಿಂಗಳು ದಂಡ ಪಾವತಿಸುತ್ತಿದ್ದರು ಎಂಬುದೇ ಅಚ್ಚರಿ. ಏಕೆಂದರೆ ದಕ್ಷಿಣ ಆಫ್ರಿಕಾ ತಂಡದ ಪ್ರಾಯೋಜಕರಲ್ಲಿ ಬಿಯರ್ ಕಂಪೆನಿ ಇತ್ತು. ಇದರ ಲೊಗೋ ಜೆರ್ಸಿ ಮೇಲೆ ಪ್ರಿಂಟ್ ಮಾಡಲಾಗಿತ್ತು. ಆದರೆ ಲೊಗೋ ಇರುವ ಜೆರ್ಸಿಯನ್ನು ಧರಿಸಲು ಆಮ್ಲಾ ಹಿಂದೇಟು ಹಾಕಿದ್ದರು.

ಮದ್ಯಪಾನ ವಿರೋಧಿಯಾಗಿದ್ದ ಆಮ್ಲಾ ಅವರು ಲೊಗೋ ಇಲ್ಲದ ಜೆರ್ಸಿ ಧರಿಸಲು ದಕ್ಷಿಣ ಆಫ್ರಿಕಾ ಕ್ರಿಕೆಟ್​ ಮಂಡಳಿಗೆ ಪ್ರತಿ ತಿಂಗಳು ಇಂತಿಷ್ಟು ಶುಲ್ಕ ಪಾವತಿಸಬೇಕಾಗಿತ್ತು. ಅದರಂತೆ 15 ವರ್ಷಗಳ ಕಾಲ ದಂಡ ಪಾವತಿಸಿ ಕ್ರಿಕೆಟ್ ಆಡಿದ್ದರು ಆಮ್ಲಾ.

ಇಷ್ಟೇ ಅಲ್ಲ, ಆಮ್ಲಾ ಅವರ ತಾಳ್ಮೆಗೆ ಮತ್ತೊಂದು ಉದಾಹರಣೆ ಅಂದರೆ 2006ರ ಘಟನೆ. ಅದು ಶ್ರೀಲಂಕಾ ಮತ್ತು ದಕ್ಷಿಣ ಆಫ್ರಿಕಾ ನಡುವಣ ಪಂದ್ಯ. ಕುಮಾರ ಸಂಗಾಕ್ಕರ ಬಾರಿಸಿದ ಚೆಂಡನ್ನು ಹಾಶಿಂ ಆಮ್ಲಾ ಅದ್ಭುತವಾಗಿ ಕ್ಯಾಚ್ ಹಿಡಿದಿದ್ದರು.

ಇತ್ತ ಆಸ್ಟ್ರೇಲಿಯಾ ಮಾಜಿ ಕ್ರಿಕೆಟಿಗ/ ವೀಕ್ಷಕ ವಿವರಣೆಗಾರ ಡೀನ್ ಜೋನ್ಸ್ ಈ ಕ್ಯಾಚ್ ನೋಡಿ ಭಯೋತ್ಪಾದಕನಿಗೆ ಮತ್ತೊಂದು ವಿಕೆಟ್ ಸಿಕ್ತು ಎಂದು ಕಮೆಂಟರಿಯಲ್ಲಿ ಹೇಳಿದ್ದರು. ಈ ಬಗ್ಗೆ ವ್ಯಾಪಕ ಆಕ್ರೋಶಗಳು ವ್ಯಕ್ತವಾಗುತ್ತಿದ್ದಂತೆ ಡೀನ್​ ಜೋನ್ಸ್ ಅವರನ್ನು ಕಮೆಂಟರಿ ಬಾಕ್ಸ್​ನಿಂದ ನಿಷೇಧಿಸಲಾಯಿತು.

ಕೆಲ ದಿನಗಳ ಬಳಿಕ ಡೀನ್ ಜೋನ್ಸ್ ಅವರ ಹೇಳಿಕೆ ಬಗ್ಗೆ ಹಾಶಿಂ ಆಮ್ಲಾರನ್ನು ಕೇಳಲಾಯಿತು. ನಾನು ಸದಾ ಶಾಂತಿಯನ್ನು ಬಯಸುವವನು. ನನಗೆ ಯಾರ ಮೇಲೂ ದ್ವೇಷವಿಲ್ಲ. ಇದು ಡೀನ್ ಜೋನ್ಸ್ ವಿಷಯದಲ್ಲೂ ಕೂಡ. ಆತನನ್ನು ಅಂದೇ ನಾನು ಕ್ಷಮಿಸಿದ್ದೇನೆ ಎಂದು ತಿಳಿಸಿದ್ದರು. ಅಲ್ಲಿಗೆ ಮತ್ತೊಮ್ಮೆ ಶಾಂತ ಸ್ವರೂಪದ ಹಾಶಿಂ ಆಮ್ಲಾ ಕ್ರಿಕೆಟ್ ಇಸ್ ಜೆಂಟಲ್​ಮ್ಯಾನ್​ ಗೇಮ್​ಗೆ ಎಂಬುದಕ್ಕೆ ಉದಾಹರಣೆಯಾಗಿ ನಿಂತಿದ್ದರು.

ಹಾಶಿಂ ಆಮ್ಲಾ ಅವರ ಅಪರೂಪದ ಫೋಟೋ