IPL 2021: ರೋಹಿತ್, ವಾರ್ನರ್​ ಹಿಂದಿಕ್ಕಿ ನಾಗಾಲೋಟ ಮುಂದುವರೆಸಿದ ಶಿಖರ್ ಧವನ್

ಇಂಡಿಯನ್ ಪ್ರೀಮಿಯರ್​ ಲೀಗ್​ ಸೀಸನ್ 14ರ 2ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ಚೆನ್ನೈ ಸೂಪರ್ ಕಿಂಗ್ಸ್​ ವಿರುದ್ಧ 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ. ಈ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದು, ಆರಂಭಿಕರಾದ ಪೃಥ್ವಿ ಶಾ ಹಾಗೂ ಶಿಖರ್ ಧವನ್.

ಟಾಸ್ ಗೆದ್ದ ಡೆಲ್ಲಿ ತಂಡದ ಯುವ ನಾಯಕ ಪಂತ್ ಬೌಲಿಂಗ್ ಆಯ್ದುಕೊಂಡರು. ಅದರಂತೆ ಬ್ಯಾಟಿಂಗ್ ಮಾಡಿದ ಸಿಎಸ್​ಕೆ ತಂಡವು ಸುರೇಶ್ ರೈನಾ ಅವರ ಅರ್ಧಶತಕದ ನೆರವಿನಿಂದ 20 ಓವರ್‌ಗಳಲ್ಲಿ 188 ರನ್ ಕಲೆಹಾಕಿತು. ಈ ಬೃಹತ್ ಮೊತ್ತವನ್ನು ಬೆನ್ನತ್ತಿದ ಡೆಲ್ಲಿ ಕ್ಯಾಪಿಟಲ್ಸ್​ ತಂಡಕ್ಕೆ ಆರಂಭಿಕರಾದ ಪೃಥ್ವಿ ಶಾ ಹಾಗೂ ಶಿಖರ್ ಧವನ್ ಸ್ಪೋಟಕ ಆರಂಭ ಒದಗಿಸಿದ್ದರು.

ಮೊದಲ ವಿಕೆಟ್​ಗೆ 13.3 ಓವರ್​ನಲ್ಲಿ ಈ ಜೋಡಿ 138 ರನ್​ ಬಾರಿಸಿತ್ತು. ಇನ್ನೇನು ಗೆಲುವಿನ ಅಂಚಿನಲ್ಲಿ ಪೃಥ್ವಿ ಶಾ 72 ರನ್​ಗಳಿಸಿ ಔಟಾದರೆ, ಧವನ್ 85 ರನ್ ಬಾರಿಸಿ ನಿರ್ಗಮಿಸಿದರು. ಅಂತಿಮವಾಗಿ ಡೆಲ್ಲಿ ತಂಡವು 8 ಎಸೆತಗಳು ಬಾಕಿ ಇರುವಂತೆ ಗುರಿ ಮುಟ್ಟುವ ಮೂಲಕ 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿತು.

ಈ ಪಂದ್ಯದಲ್ಲಿ 54 ಎಸೆತಗಳಲ್ಲಿ 10 ಬೌಂಡರಿ ಹಾಗೂ 2 ಸಿಕ್ಸರ್​ ಜೊತೆಗೆ 85 ರನ್ ಗಳಿಸಿದ ಧವನ್ ಐಪಿಎಲ್ ರನ್​ ಸರದಾರರ ಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೇರಿದರು. ಈ ಮೂಲಕ ಅತಿ ಹೆಚ್ಚು ರನ್​ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ಡೇವಿಡ್ ವಾರ್ನರ್ ಮತ್ತು ರೋಹಿತ್ ಶರ್ಮಾ ಅವರನ್ನು ಹಿಂದಿಕ್ಕಿದರು.

ಈ ಬಾರಿಯ ಟೂರ್ನಿ ಆರಂಭಕ್ಕೂ ಮುನ್ನ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ಧವನ್ ಐದನೇ ಸ್ಥಾನದಲ್ಲಿದ್ದರು. ಮೊದಲ ಪಂದ್ಯದಲ್ಲೇ 85 ರನ್​ ಬಾರಿಸುವ ಮೂಲಕ ಇದೀಗ ಶಿಖರ್ ಧವನ್ 176 ಐಪಿಎಲ್ ಇನ್ನಿಂಗ್ಸ್‌ಗಳಿಂದ ಒಟ್ಟು 5282 ರನ್ ಕಲೆಹಾಕಿದ್ದಾರೆ. ಅಲ್ಲದೆ ಟಾಪ್ ರನ್​ ಸರದಾರರ ಪಟ್ಟಿಯಲ್ಲಿ ವಿರಾಟ್ ಕೊಹ್ಲಿ ಹಾಗೂ ಸುರೇಶ್ ರೈನಾ ಬಳಿಕದ ಸ್ಥಾನವನ್ನು ತಮ್ಮದಾಗಿಸಿಕೊಂಡಿದ್ದಾರೆ.

IPL 2021: ಐಪಿಎಲ್​ ಟಾಪ್-5 ರನ್​ ಸರದಾರರು ಯಾರು ಗೊತ್ತಾ?

5- ರೋಹಿತ್ ಶರ್ಮಾ

201 ಪಂದ್ಯಗಳನ್ನಾಡಿರುವ ರೋಹಿತ್ ಶರ್ಮಾ ಐಪಿಎಲ್​ನಲ್ಲಿ ಒಂದು ಶತಕ ಹಾಗೂ  39 ಅರ್ಧಶತಕ ಬಾರಿಸಿದ್ದಾರೆ. ಇದರೊಂದಿಗೆ ಹಿಟ್​ಮ್ಯಾನ್ ಬ್ಯಾಟ್​​ನಿಂದ ಒಟ್ಟಾರೆ ಮೂಡಿಬಂದಿರುವುದು  5249 ರನ್​ಗಳು.

4- ಡೇವಿಡ್ ವಾರ್ನರ್:

ಆಸ್ಟ್ರೇಲಿಯಾ ಕ್ರಿಕೆಟಿಗ ಡೇವಿಡ್ ವಾರ್ನರ್ ಐಪಿಎಲ್​ನಲ್ಲಿ ಇದುವರೆಗೂ  142 ಪಂದ್ಯಗಳನ್ನಾಡಿದ್ದಾರೆ. ಇದರಲ್ಲಿ 4 ಶತಕ ಮತ್ತು 48 ಅರ್ಧಶತಕಗಳೊಂದಿಗೆ  5254 ರನ್​ ಕಲೆಹಾಕಿದ್ದಾರೆ. ಈ ಮೂಲಕ ರನ್​ ಸರದಾರರ ಪಟ್ಟಿಯಲ್ಲಿ 3ನೇ ಸ್ಥಾನವನ್ನು ಪಡೆದುಕೊಂಡಿದ್ದಾರೆ.

3- ಶಿಖರ್ ಧವನ್

ಐಪಿಎಲ್​ನಲ್ಲಿ ಶಿಖರ್ ಧವನ್ ಇದುವರೆಗೂ 177 ಪಂದ್ಯಗಳನ್ನು ಆಡಿದ್ದಾರೆ. ಸಾಕಷ್ಟು ರನ್ ಪೇರಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದಾರೆ. ಇದುವರೆಗೆ 2 ಶತಕ ಹಾಗೂ 42 ಅರ್ಧಶತಕದೊಂದಿಗೆ 5282 ರನ್ ಪೇರಿಸಿ ಟಾಪ್ 5 ರನ್​ ಸರದಾರರ ಪಟ್ಟಿಯಲ್ಲಿ 3ನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದ್ದಾರೆ.

2- ಸುರೇಶ್ ರೈನಾ:

ಐಪಿಎಲ್​ನಲ್ಲಿ  1 ಶತಕ ಮತ್ತು 39 ಅರ್ಧಶತಕ ಬಾರಿಸಿರುವ ಸುರೇಶ್ ​ ರೈನಾ  194 ಪಂದ್ಯಗಳಿಂದ ಪೇರಿಸಿರುವುದು ಬರೋಬ್ಬರಿ  5422 ರನ್​ಗಳು. ಈ ಮೂಲಕ ಐಪಿಎಲ್​ ರನ್​ ಸರದಾರರ ಪಟ್ಟಿಯಲ್ಲಿ  2ನೇ ಸ್ಥಾನ ಅಲಂಕರಿಸಿದ್ದಾರೆ.

1- ವಿರಾಟ್ ಕೊಹ್ಲಿ:

ಐಪಿಎಲ್​ನಲ್ಲಿ  193 ಪಂದ್ಯಗಳನ್ನಾಡಿರುವ ರನ್ ಮಿಷನ್, ಇಲ್ಲೂ ಕೂಡ ಅತೀ ಹೆಚ್ಚು ರನ್​ ಬಾರಿಸಿ ತಮ್ಮ ಬ್ಯಾಟಿಂಗ್ ಚಾಕಚಕ್ಯತೆ ಮೆರೆದಿದ್ದಾರೆ. 5 ಶತಕ ಮತ್ತು 39 ಅರ್ಧಶತಕಗಳೊಂದಿಗೆ ಕೊಹ್ಲಿ ಗಳಿಸಿರುವುದು ಒಟ್ಟು  5911 ರನ್​ಗಳು. ಹಾಗೆಯೇ ರನ್ ಸರದಾರರ ಪಟ್ಟಿಯಲ್ಲಿ ನಂಬರ್ 1 ಸ್ಥಾನದಲ್ಲಿದ್ದಾರೆ ಕೊಹ್ಲಿ.