ಸಾರ್ವಕಾಲಿಕ ಶ್ರೇಷ್ಠ ಟೀಂ ಇಂಡಿಯಾ ಪ್ರಕಟಿಸಿದ ಸ್ಪಿನ್ ಮಾಂತ್ರಿಕ: ಸ್ಟಾರ್ ಆಟಗಾರನಿಗಿಲ್ಲ ಸ್ಥಾನ..!

ಕ್ರಿಕೆಟ್ ಅಂಗಳ ಸ್ತಬ್ಧವಾಗುತ್ತಿದ್ದಂತೆ ಇತ್ತ ಆಟಗಾರರು ಸೋಷಿಯಲ್ ಮೀಡಿಯಾದಲ್ಲಿ ಚುರುಕಾಗಿದ್ದಾರೆ. ಒಂದೆಡೆ ಕೊರೋನಾ ವೈರಸ್ ಬಗ್ಗೆ ಜಾಗೃತಿ ಮೂಡಿಸಿದರೆ, ಮತ್ತೊಂದೆಡೆ ಅಭಿಮಾನಿಗಳ ಪಶ್ನೆಗೆ ಉತ್ತರಿಸುವಲ್ಲಿ ನಿರತರಾಗಿದ್ದಾರೆ.

ಈ ವಿಷಯದಲ್ಲಿ ಸ್ಪಿನ್ ಮಾಂತ್ರಿಕ ಆಸ್ಟ್ರೇಲಿಯಾದ ಮಾಜಿ ಆಟಗಾರ ಶೇನ್ ವಾರ್ನ್ ಕೂಡ ಹಿಂದೆ ಬಿದ್ದಿಲ್ಲ. ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್​ನಲ್ಲಿ  1001 ವಿಕೆಟ್​ ಕಿತ್ತಿರುವ ಲೆಜೆಂಡ್ ಬೌಲರ್ ಈ ಹಿಂದೆ ಐಪಿಎಲ್​ನಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಮುನ್ನಡೆಸಿದ್ದರು.

ಅಲ್ಲದೆ ಚೊಚ್ಚಲ ಬಾರಿಯ ಇಂಡಿಯನ್ ಪ್ರೀಮಿಯರ್ ಲೀಗ್​ ಟ್ರೋಫಿಯನ್ನು ಶೇನ್ ವಾರ್ನ್​ ನಾಯಕತ್ವದಲ್ಲಿ ರಾಜಸ್ಥಾನ ರಾಯಲ್ಸ್ ಮುಡಿಗೇರಿಸಿಕೊಂಡಿತ್ತು. ಇದೀಗ ಲಾಕ್​ಡೌನ್ ಹಿನ್ನೆಲೆಯಲ್ಲಿ ವಾರ್ನ್ ಫುಲ್ ಫ್ರಿಯಾಗಿದ್ದಾರೆ.

ಇದೇ ತಮ್ಮ ಅಭಿಮಾನಿಗಳೊಂದಿಗೆ ತಾವು ಕಂಡ ಸರ್ವ ಶ್ರೇಷ್ಠ ಭಾರತದ ಆಟಗಾರರನ್ನು ಹೆಸರಿಸಿ ಸಾರ್ವಕಾಲಿಕ ಶ್ರೇಷ್ಠ ಟೀಂ ಇಂಡಿಯಾವನ್ನು ಪ್ರಕಟಿಸಿದ್ದಾರೆ.

ಆದರೆ ವಾರ್ನ್​ ಅವರ ಶ್ರೇಷ್ಠ ಇಲೆವೆನ್​ನಲ್ಲಿ ಟೀಂ ಇಂಡಿಯಾದ ಕೆಲ ಆಟಗಾರರಿಗೆ ಸ್ಥಾನ ನೀಡದಿರುವುದು ಅಚ್ಚರಿ. ಅಂದಹಾಗೆ ಸ್ಪಿನ್ ದಂತಕಥೆ ಪ್ರಕಟಿಸಿರುವ ಸಾರ್ವಕಾಲಿಕ ಟೀಂ ಇಂಡಿಯಾ ಇಲೆವೆನ್ ಹೀಗಿದೆ.

1. ವೀರೇಂದ್ರ ಸೆಹ್ವಾಗ್‌ (ಆರಂಭಿಕ ಆಟಗಾರ)

2. ನವಜೋತ್‌ ಸಿಂಗ್‌ ಸಿಧು (ಆರಂಭಿಕ ಆಟಗಾರ)

3. ರಾಹುಲ್‌ ದ್ರಾವಿಡ್‌ (3ನೇ ಕ್ರಮಾಂಕ)

4. ಸಚಿನ್‌ ತೆಂಡೂಲ್ಕರ್‌ (4ನೇ ಕ್ರಮಾಂಕ)

5. ಮೊಹಮ್ಮದ್‌ ಅಜರುದ್ದೀನ್‌ (ಮಧ್ಯಮ ಕ್ರಮಾಂಕ)

6. ಸೌರವ್‌ ಗಂಗೂಲಿ (ನಾಯಕ/ ಆಲ್‌ರೌಂಡರ್‌)

7. ಕಪಿಲ್‌ ದೇವ್‌ (ಆಲ್‌ರೌಂಡರ್‌)

8. ಹರ್ಭಜನ್ ಸಿಂಗ್‌ (ಆಫ್‌ ಸ್ಪಿನ್ನರ್‌)

9. ನಯನ್‌ ಮೊಂಗಿಯಾ (ವಿಕೆಟ್‌ಕೀಪರ್‌)

10. ಅನಿಲ್‌ ಕುಂಬ್ಳೆ (ಲೆಗ್‌ ಸ್ಪಿನ್ನರ್)

11. ಜಾವಗಲ್‌ ಶ್ರೀನಾಥ್‌ (ಬಲಗೈ ವೇಗಿ)

ಆದರೆ ಈ ಪಟ್ಟಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಅದ್ಭುತ ಫಾರ್ಮ್​ನಲ್ಲಿ ಮಿಂಚುತ್ತಿದ್ದ  ವಿವಿಎಸ್ ಲಕ್ಷ್ಮಣ್ ಅವರಿಗೆ ಸ್ಥಾನ ನೀಡಲಾಗಿಲ್ಲ. ಅತ್ಯುತ್ತಮ ಟೀಂ ಇಂಡಿಯಾ ಇಲೆವೆನ್​ನಿಂದ ವೆರಿ ವೆರಿ ಸ್ಪೆಷಲ್ ಬ್ಯಾಟ್ಸ್​ಮನ್​ರನ್ನು ಕೈ ಬಿಟ್ಟಿರುವ ಬಗ್ಗೆ ವಾರ್ನ್ ಉತ್ತರಿಸಿದ್ದು, ನಾನು ಹನ್ನೊಂದು ಆಟಗಾರರನ್ನು ಮಾತ್ರ ಆಯ್ಕೆ ಮಾಡಿಕೊಂಡಿದ್ದೇನೆ. ಇಲ್ಲಿ ಗಂಗೂಲಿಗೆ ನಾಯಕನ ಸ್ಥಾನ ನೀಡಬೇಕಿದ್ದರಿಂದ ಒಬ್ಬರನ್ನು ಹೊರಗಿಡಬೇಕಾಗಿತ್ತು. ಹೀಗಾಗಿ ಲಕ್ಷ್ಮಣ್ ಅವರನ್ನು ಕೈ ಬಿಟ್ಟಿರುವುದಾಗಿ ತಿಳಿಸಿದ್ದಾರೆ.

ಇನ್ನು ನಿಮ್ಮ ತಂಡದಲ್ಲಿ ಏಕೆ ವಿರಾಟ್ ಕೊಹ್ಲಿ, ಧೋನಿಗೆ ಸ್ಥಾನ ನೀಡಲಾಗಿಲ್ಲ ಎಂಬ ಅಭಿಮಾನಿಯೊಬ್ಬರ ಪ್ರಶ್ನೆಗೆ, ತಮ್ಮ ವೃತ್ತಿ ಜೀವನದಲ್ಲಿ ಎದುರಿಸಿದ ಭಾರತೀಯ ಆಟಗಾರರನ್ನು ಮಾತ್ರವೇ ನಾನು ಸಾರ್ವಕಾಲಿಕ ಶ್ರೇಷ್ಠ ಇಲೆವೆನ್​ಗೆ ಆಯ್ಕೆ ಮಾಡಿಕೊಂಡಿದ್ದೇನೆ ಎಂದು ಶೇನ್ ವಾರ್ನ್ ತಿಳಿಸಿದ್ದಾರೆ.