41 ಬೌಂಡರಿ 11 ಸಿಕ್ಸರ್: ಒಂದೇ ಪಂದ್ಯದಲ್ಲಿ ಎರಡು ವೇಗದ ಡಬಲ್ ಸೆಂಚುರಿ

ಕೊಲ್ಕತ್ತಾದಲ್ಲಿ ನಡೆದ ರಣಜಿ ಟ್ರೋಫಿ ಪ್ಲೇಟ್ ಗ್ರೂಪ್‌ನ ಮೇಘಾಲಯ ಮತ್ತು ಮಿಜೋರಾಂ ನಡುವಣ ಪಂದ್ಯದಲ್ಲಿ ರನ್​ ಸುರಿಮಳೆಯಾಯಿತು.

ಈ ಪಂದ್ಯದಲ್ಲಿ ಒಂದಲ್ಲ, ಮೂರು ಶತಕಗಳು ಮೂಡಿಬಂದಿದ್ದವು. ಅದರಲ್ಲಿ ಎರಡು ಡಬಲ್ ಸೆಂಚುರಿ ಎಂಬುದೇ ವಿಶೇಷ. ಈ ಮೂಲಕ ರಣಜಿ ಟ್ರೋಫಿಯಲ್ಲಿ ಮೇಘಾಲಯ ಮತ್ತು ಮಿಜೋರಾಂ ಪಂದ್ಯ ಹೊಸ ಇತಿಹಾಸ ಬರೆಯಿತು.

ಟಾಸ್ ಗೆದ್ದ ಮೇಘಾಲಯ ತಂಡವು ಮೊದಲು ಬ್ಯಾಟಿಂಗ್ ಆಯ್ದುಕೊಂಡಿತು. ಆದರೆ ಆರಂಭಿಕ ಆಘಾತಕ್ಕೆ ಒಳಗಾಗಿತ್ತು. ತಂಡದ ಮೊತ್ತ 5 ರನ್ ಆಗಿದ್ದಾಗ, ಆರಂಭಿಕ ಆಟಗಾರ ನಾಂಗ್ಖ್ಲಾ 3 ರನ್ ಗಳಿಸಿ ಹೊರ ನಡೆದರು.

ಆ ಬಳಿಕ ಕ್ರೀಸ್​ಗಿಳಿದ ಟೆಂಗ್ಚನ್ ಸಂಗ್ಮಾ, ದೀಪು ಸಂಗ್ಮಾ ಅವರೊಂದಿಗೆ ಇನ್ನಿಂಗ್ಸ್ ಕಟ್ಟಿದರು. ವೈಯಕ್ತಿಕ 38 ರನ್‌ಗಳಿಸಿ ಟೆಂಗ್ಚನ್ ವಿಕೆಟ್ ಒಪ್ಪಿಸಿದರು. ಆ ವೇಳೆ ತಂಡದ ಸ್ಕೋರ್ 105 ರನ್.

ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​​ಗೆ ಇಳಿದ ನಾಯಕ ಪುನೀತ್ ಬಿಶ್ತ್‌ 18 ರನ್‌ ಗಳಿಸಲಷ್ಟೇ ಶಕ್ತರಾದರು. ನಾಯಕನ ನಂತರ ಕ್ರೀಸ್​ಗೆ ಇಳಿದ ರವಿ ತೇಜ- ದೀಪು ಸಂಗ್ಮಾ ಅವರೊಂದಿಗೆ ಇನಿಂಗ್ಸ್ ಕಟ್ಟಲು ಆರಂಭಿಸಿದರು.

ಈ ಜೋಡಿ 87 ರನ್‌ಗಳ ಜೊತೆಯಾಟ ಮೂಲಕ ರನ್​ ಗತಿ ಏರಿಸಿದರು. ಈ ವೇಳೆ 160 ಎಸೆತಗಳಲ್ಲಿ 114 ರನ್ ಗಳಿಸಿದ ದೀಪು ಸಂಗ್ಮಾ ಔಟಾದರು.

ಇದೇ ವೇಳೆ ಜೊತೆಯಾದ ರವಿ ತೇಜ ಮತ್ತು ಸಂಜಯ್ ಯಾದವ್ ಮಿಜೋರಾಂ  ಬೌಲರ್‌ಗಳನ್ನು ಮನಸೋ ಇಚ್ಛೆ ದಂಡಿಸಿದರು.

ರವಿ ತೇಜ ಮತ್ತು ಸಂಜಯ್ ಯಾದವ್ ದ್ವಿಶತಕ ಸಿಡಿಸಿ  ಬ್ಯಾಟ್ ಮೇಲೆತ್ತಿದ್ದರು. 260 ಎಸೆತಗಳಲ್ಲಿ 18 ಬೌಂಡರಿ ಮತ್ತು 1 ಸಿಕ್ಸರ್‌ಗಳೊಂದಿಗೆ ಅಜೇಯ ರವಿ ತೇಜ 204 ರನ್ ಗಳಿಸಿದರೆ, ಸಂಜಯ್ ಕೇವಲ 228 ಎಸೆತಗಳಲ್ಲಿ ಅಜೇಯ 254 ರನ್ ಗಳಿಸಿದ್ದರು.

ಇದರಲ್ಲಿ 23 ಬೌಂಡರಿ ಮತ್ತು 13 ಸಿಕ್ಸರ್‌ಗಳ ಸಿಡಿಸಿದ್ದರು. ಇವರಿಬ್ಬರ ಮನಮೋಹಕ ಆಟದ ಪರಿಣಾಮ ಮೇಘಾಲಯ ತಂಡ ನಾಲ್ಕು ವಿಕೆಟ್‌ಗೆ 662 ರನ್ ಗಳಿಸಿ ಇನ್ನಿಂಗ್ಸ್ ಡಿಕ್ಲೇರ್ ಘೋಷಿಸಿತು.

ಬ್ಯಾಟಿಂಗ್​ನಲ್ಲಿ ಮಿಂಚಿದ್ದ ಮೇಘಾಲಯ ಬೌಲಿಂಗ್ ನಲ್ಲೂ ಉತ್ತಮ ಪ್ರದರ್ಶನ ನೀಡಿದರು.

ಮಿಜೋರಾಂ ತಂಡದ ಮೊದಲ ಇನ್ನಿಂಗ್ಸ್‌ನ್ನು 114 ರನ್‌ಗಳಿಗೆ ಕಟ್ಟಿಹಾಕಿದ ಮೇಘಾಲಯದ ಆದಿತ್ಯ ಸಿಂಘಾನಿಯಾ ನಾಲ್ಕು ವಿಕೆಟ್ ಪಡೆದರೆ, ದ್ವಿಶತಕ ಬಾರಿಸಿದ ಸಂಜಯ್ ಯಾದವ್ ಮತ್ತು ಅಭಯ್ ನೇಗಿ ತಲಾ ಎರಡು ವಿಕೆಟ್ ಪಡೆದರು.

ಎರಡನೇ ಇನಿಂಗ್ಸ್​ನಲ್ಲೂ ಮಿಜೋರಾಂ ತಂಡವನ್ನು 123 ರನ್​ಗಳಿಗೆ ಆಲೌಟ್ ಮಾಡುವ ಮೂಲಕ ಮೇಘಾಲಯ ತಂಡ ಈ ಪಂದ್ಯವನ್ನು ಇನಿಂಗ್ಸ್ ಮತ್ತು 425 ರನ್‌ಗಳ ಭಾರಿ ಅಂತರದಿಂದ ಗೆದ್ದುಬೀಗಿತು.