'ನಿನಗೆ ಅತ್ಯುತ್ತಮ ವಿದಾಯ ಸಿಗಬೇಕಿತ್ತು': ನಿನಗಾದರೂ ನನ್ನ ನೋವು ಅರ್ಥವಾಯ್ತಲ್ಲ..!

ಕೊರೋನಾ ಲಾಕ್​ಡೌನ್ ಹಿನ್ನೆಲೆಯಲ್ಲಿ ಟೀಂ ಇಂಡಿಯಾ ಆಟಗಾರರು ಫುಲ್ ಫ್ರಿಯಲ್ಲಿದ್ದಾರೆ. ಅದರಲ್ಲೂ ಭಾರತ ತಂಡದ ಮಾಜಿ ಆಟಗಾರ ಯುವರಾಜ್ ಸಿಂಗ್ ಕಳೆದ ಕೆಲ ದಿನಗಳಿಂದ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಆ್ಯಕ್ಟೀವ್ ಆಗಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿರುವ ಯುವಿ ತಮ್ಮ ವೃತ್ತಿ ಜೀವನದ ಹಳೆಯ ನೆನಪುಗಳನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಳ್ಳುತ್ತಿದ್ದಾರೆ.

ಯುಟ್ಯೂಬ್​ ಸಂದರ್ಶನವೊಂದರಲ್ಲಿ ಮಾತನಾಡಿದ ಸಿಕ್ಸರ್ ಸಿಂಗ್ ಯುವರಾಜ್, ನನಗೆ ಮೊದಲು ರೋಹಿತ್ ಶರ್ಮಾ ಅವರನ್ನು ನೋಡಿದಾಗ ಪಾಕಿಸ್ತಾನದ ದಂತಕಥೆ ಇಂಜಮಾಮ್​ ಉಲ್ ಹಕ್ ಅವರನ್ನು ನೋಡಿದ ಅನುಭವವಾಗಿತ್ತು ಅಂದಿದ್ದಾರೆ.

2007 ರಲ್ಲೇ ಐರ್ಲೆಂಡ್​ ವಿರುದ್ಧದ ಪಂದ್ಯದಲ್ಲಿ ರೋಹಿತ್ ಕಣಕ್ಕಿಳಿದಿದ್ದರು. ಈ ವೇಳೆ ಆತನ ಬ್ಯಾಟಿಂಗ್ ನೋಡಿದಾಗ ನನಗೆ ಇಂಜಮಾಮ್ ಉಲ್ ಹಕ್ ಕಾಣಿಸುತ್ತಿದ್ದರು. ಹಕ್ ಅವರಲ್ಲಿದ್ದ ಅದ್ಭುತ ಟೈಮಿಂಗ್ ರೋಹಿತ್​ನಲ್ಲಿತ್ತು.

ಹೀಗಾಗಿ ನನಗೆ ಇಂಜಮಾಮ್​ ರೀತಿಯಲ್ಲೇ ರೋಹಿತ್ ಆಡುತ್ತಿರುವುದು ಕಾಣಿಸಿತ್ತು ಎಂದು ಯುವರಾಜ್ ಸಿಂಗ್ ಹೇಳಿದರು. ಇದನ್ನು ನೋಡಿದ ಹಿಟ್​ಮ್ಯಾನ್ ರೋಹಿತ್ ಕೂಡ ಪ್ರತಿಕ್ರಿಯಿಸಿದ್ದು, ನಿನಗೆ ಅತ್ಯುತ್ತಮ ವಿದಾಯ ನೀಡಬೇಕಿತ್ತು ಎಂದಿದ್ದಾರೆ.

ಈ ಟ್ವೀಟ್​ಗೆ ಮರು ಟ್ವೀಟ್ ಮಾಡಿರುವ ಯುವಿ, ನನಗೆ ಎಷ್ಟು ಬೇಜಾರಾಗಿತ್ತು ಎಂಬುದು ನಿನಗಾದರೂ ಅರ್ಥವಾಯಿತು. ಮುಂದೆ ನೀನು ಕ್ರಿಕೆಟ್ ದಿಗ್ಗಜನಾಗುತ್ತೀಯ ಎಂದಿದ್ದಾರೆ.

ವಿಶ್ವದ ಅತ್ಯುತ್ತಮ ಆರಂಭಿಕ ಆಟಗಾರನಾಗಿ ಗುರುತಿಸಿಕೊಂಡಿರುವ ರೋಹಿತ್ ಶರ್ಮಾ ಆರಂಭದಲ್ಲಿ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್ ಬೀಸುತ್ತಿದ್ದರು. ಅದರಲ್ಲೂ ಟೀಂ ಇಂಡಿಯಾದಲ್ಲಿ ಕಾಯಂ ಸ್ಥಾನ ಖಾತ್ರಿ ಪಡಿಸಿಕೊಳ್ಳಲು ವರ್ಷಗಳ ಕಾಲ ಒದ್ದಾಡಿದ್ದರು.

ಒಂದು ಬಾರಿ ಆರಂಭಿಕರಾಗಿ ಕಣಕ್ಕಿಳಿಯುತ್ತಿದ್ದಂತೆ ರೋಹಿತ್ ತಮ್ಮ ಬ್ಯಾಟಿಂಗ್ ವರಸೆ ಬದಲಿಸಿದ್ದರು. ಅಲ್ಲದೆ ಏಕದಿನ ಕ್ರಿಕೆಟ್​ನಲ್ಲಿ ಮೂರು ದ್ವಿಶತಕಗಳನ್ನು ಬಾರಿಸಿದ ವಿಶ್ವದ ಏಕಮಾತ್ರ ಬ್ಯಾಟ್ಸ್‌ಮನ್‌ ಎಂಬ ದಾಖಲೆ ಬರೆದಿದ್ದಾರೆ.

ರೋಹಿತ್ ಶರ್ಮಾ

ರೋಹಿತ್ ಶರ್ಮಾ