ಸಚಿನ್-ಸೆಹ್ವಾಗ್ ಜೋಡಿ ಆಟ ನೋಡಲು ವಿಶ್ವವೇ ಕಾತುರ; ನಿವೃತ್ತಿ ಬಳಿಕ ವಾಂಖೆಡೆಯಲ್ಲಿ ಮೊದಲ ಬಾರಿ ತೆಂಡೂಲ್ಕರ್ ಬ್ಯಾಟಿಂಗ್!

ರಸ್ತೆ ಸುರಕ್ಷತೆ ಜಾಗೃತಿಗಾಗಿ ಆಯೋಜಿಸಲಾಗುತ್ತಿರುವ ರಸ್ತೆ ಸುರಕ್ಷತೆ ವಿಶ್ವ ಟಿ-20 ಸರಣಿ ಇಂದಿನಿಂದ ಆರಂಭವಾಗಲಿದೆ.

ಕ್ರಿಕೆಟ್ ಲೋಕದ ದಿಗ್ಗಜರಾದ ಸಚಿನ್ ತೆಂಡೂಲ್ಕರ್, ವೆಸ್ಟ್ ಇಂಡೀಸ್​ನ ಮಾಜಿ ಆಟಗಾರ ಬ್ರಿಯಾನ್ ಲಾರಾ ಸೇರಿದಂತೆ ಮಾಜಿ ಕ್ರಿಕೆಟಿಗರು ಈ ವಿಶೇಷ ಟಿ-20 ಪಂದ್ಯದಲ್ಲಿ ಬ್ಯಾಟ್ ಬೀಸುತ್ತಿದ್ದಾರೆ.

ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ಇಂದು ನಡೆಯಲಿರುವ ಮೊದಲ ಪಂದ್ಯದಲ್ಲಿ ಸಚಿನ್ ತೆಂಡೂಲ್ಕರ್ ನಾಯಕತ್ವದ ಇಂಡಿಯಾ ಲೆಜೆಂಡ್ಸ್ ಹಾಗೂ ಬ್ರಿಯಾನ್ ಲಾರಾ ನಾಯಕನಾಗಿರುವ ವಿಂಡೀಸ್ ಲೆಜೆಂಡ್ಸ್ ಮುಖಾಮುಖಿ ಆಗುತ್ತಿದೆ.

ವಿಶೇಷ ಎಂದರೆ, ಈ ಪಂದ್ಯದಲ್ಲಿ ಸಚಿನ್ ತೆಂಡೂಲ್ಕರ್ ಜೊತೆ ಓಪನರ್ ಆಗಿ ವಿರೇಂದ್ರ ಸೆಹ್ವಾಗ್ ಕಣಕ್ಕಿಳಿಯುತ್ತಿದ್ದಾರೆ. ಹೀಗಾಗಿ ಸಚಿನ್-ಸೆಹ್ವಾಗ್ ಜೋಡಿಯ ಆಟ ನೋಡಲು ವಿಶ್ವವೇ ಕಾದು ಕುಳಿತಿದೆ.

ಭಾರತ ದಿಗ್ಗಜರ ತಂಡದ ಬ್ಯಾಟಿಂಗ್ ವಿಭಾಗದಲ್ಲಿ ಸಚಿನ್ ತೆಂಡೂಲ್ಕರ್ (ನಾಯಕ), ವಿರೇಂದ್ರ ಸೆಹ್ವಾಗ್, ಯುವರಾಜ್ ಸಿಂಗ್, ಮೊಹಮ್ಮದ್ ಕೈಫ್ ಇದ್ದಾರೆ.

ಬೌಲಿಂಗ್ ವಿಭಾಗದಲ್ಲಿ ಜಹೀರ್ ಖಾನ್, ಇರ್ಫಾನ್ ಪಠಾಣ್, ಅಜಿತ್ ಅಗರ್ಕರ್, ಸಂಜಯ್ ಬಂಗಾರ್, ಮುನಾಫ್ ಪಟೇಲ್, ಪ್ರಗ್ಯಾನ್ ಓಜಾ, ಸೈರಾಜ್ ಬಹುತುಲೆ ಇದ್ದು ಸಮೀರ್ ದಿಘ ವಿಕೆಟ್ ಕೀಪರ್ ಆಗಿ ಸ್ಥಾನ ಪಡೆದುಕೊಂಡಿದ್ದಾರೆ.

ಮತ್ತೊಂದು ವಿಶೇಷವೆಂದರೆ ನಿವೃತ್ತಿಯ ಬಳಿಕ ಇದೇ ಮೊದಲ ಬಾರಿಗೆ ಸಚಿನ್ ಅವರು ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಕಣಕ್ಕಿಳಿಯುತ್ತಿದ್ದಾರೆ. ಜಾಗತಿಕವಾಗಿ ರಸ್ತೆ ಸುರಕ್ಷತೆಯ ಬಗ್ಗೆ ಅರಿವು ಮೂಡಿಸಲು ಈ ಅನೌಪಚಾರಿಕ ಟಿ -20 ಸರಣಿಯನ್ನು ಆಯೋಜಿಸಲಾಗಿದ್ದು, ಒಟ್ಟೂ 5 ರಾಷ್ಟ್ರಗಳ ದಿಗ್ಗಜರ ತಂಡಗಳು ಈ ಸರಣಿಯಲ್ಲಿ ಪಾಲ್ಗೊಳ್ಳುತ್ತಿದೆ.

ಇನ್ನೂ ಮಾರ್ಚ್ 10 ರಂದು ಭಾರತ ಲೆಜೆಂಡ್ ತಂಡ ಮುತ್ತಯ್ಯ ಮುರಳೀಧರ್ ನಾಯಕತ್ವದ ಶ್ರೀಲಂಕಾ ತಂಡವನ್ನು ಎದುರಿಸಲಿದೆ.

ಮಾರ್ಚ್ 14 ರಂದು ದಕ್ಷಿಣ ಆಫ್ರಿಕಾ ಲೆಜೆಂಡ್ ವಿರುದ್ಧ ಹಾಗೂ ಮಾರ್ಚ್ 20 ರಂದು ಆಸ್ಟ್ರೇಲಿಯಾ ಲೆಜೆಂಡ್ ವಿರುದ್ಧ ಭಾರತ ಸೆಣೆಸಾಟ ನಡೆಸಲಿದೆ.

2013ರಲ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿದ್ದ ಸಚಿನ್, ಬಳಿಕ 2015ರಲ್ಲಿ ಯುಎಸ್ಎನಲ್ಲಿ ಕ್ರಿಕೆಟ್ ಪ್ರಚಾರಕ್ಕಾಗಿ ಟಿ-20 ಟೂರ್ನಮೆಂಟ್​ನಲ್ಲಿ ಕಾಣಿಸಿಕೊಂಡಿದ್ದರು. ಇದೇ ಮಾದರಿಯಲ್ಲಿ ಇರಲಿದೆ ಭಾರತದಲ್ಲಿ ಆಯೋಜಿಸಲಾಗುವ ರಸ್ತೆ ಸುರಕ್ಷತಾ ಜಾಗೃತಿ ಟೂರ್ನಿ.

ರಸ್ತೆ ಸುರಕ್ಷತಾ ವಿಶ್ವ ಸಿರೀಸ್​ನಲ್ಲಿ ಒಟ್ಟು 11 ಪಂದ್ಯಗಳು ನಡೆಯಲಿದೆ. 6 ತಂಡಗಳು ಪಾಲ್ಗೊಳ್ಳುತ್ತಿದೆ.

ಎರಡು ಪಂದ್ಯಗಳು ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದರೆ, ಪುಣೆಯ ಮಹಾರಾಷ್ಟ್ರ ಕ್ರಿಕೆಟ್ ಅಸೋಸಿಯೇಶನ್ ಕ್ರೀಡಾಂಗಣದಲ್ಲಿ ನಾಲ್ಕು ಹಾಗೂ ಮುಂಬೈನ ಬ್ರಬೋರ್ನ್ ಕ್ರೀಡಾಂಗಣದಲ್ಲಿ ನಾಲ್ಕು ಪಂದ್ಯಗಳು ಆಯೋಜಿಸಲಾಗಿದೆ.