IPLನಲ್ಲಿ ಆರ್​ಸಿಬಿ ಹೆಸರಿಗೆ ಮತ್ತೊಂದು ಕೆಟ್ಟ ದಾಖಲೆ ಸೇರ್ಪಡೆ! ಇದು ಬೆಂಗಳೂರು ತಂಡದ ಕಳಪೆ ಬೌಲಿಂಗ್​ಗೆ ಸಾಕ್ಷಿ

ಬುಧವಾರ ನಡೆದ ಇಂಡಿಯನ್ ಪ್ರೀಮಿಯರ್​ ಲೀಗ್​ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಕೆಕೆಆಅರ್ ವಿರುದ್ಧ 21 ರನ್​ಗಳ ಸೋಲು ಕಂಡು ನಿರಾಶೆ ಅನುಭವಿಸಿದೆ.

ಈ ಪಂದ್ಯದಲ್ಲಿ ಆರ್​ಸಿಬಿ ತಂಡ ಟಾಸ್​ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿಕೊಂಡಿತ್ತು. ಬ್ಯಾಟಿಂಗ್ ಮಾಡಿದ್ದ ಕೆಕೆಆರ್ ತಂಡ ಬರೋಬ್ಬರಿ 200 ರನ್​ಗಳಿಸಿತ್ತು. ಈ ಮೂಲಕ ಆರ್​ಸಿಬಿ ಇಂಡಿಯನ್ ಪ್ರೀಮಿಯರ್ ಲೀಗ್ ಇತಿಹಾಸದಲ್ಲಿ ಅತಿ ಹೆಚ್ಚು ಬಾರಿ 200 ರನ್​ ಬಿಟ್ಟುಕೊಟ್ಟ ತಂಡ ಎಂಬ ಬೇಡದ ದಾಖಲೆಗೆ ಪಾತ್ರವಾಯಿತು.

ಐಪಿಎಲ್​ ಇತಿಹಾಸದಲ್ಲಿ ರಾಯಲ್​ ಚಾಲೆಂಜರ್ಸ್ ಬೆಂಗಳೂರು ತಂಡ 24 ಬಾರಿ ಎದುರಾಳಿ ತಂಡಕ್ಕೆ 200 ಕ್ಕೂ ಹೆಚ್ಚು ರನ್​ ಬಿಟ್ಟುಕೊಟ್ಟಿದ್ದು, ಈ ಅನಗತ್ಯ ದಾಖಲೆಯಲ್ಲಿ ಅಗ್ರಸ್ಥಾನ ಪಡೆದುಕೊಂಡಿದೆ.

ಆರ್​ಸಿಬಿ ನಂತರ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಇದ್ದು, ಅದು 23 ಬಾರಿ 200ಕ್ಕೂ ಹೆಚ್ಚು ರನ್​ ಬಿಟ್ಟುಕೊಟ್ಟಿದೆ. 3ನೇ ಸ್ಥಾನದಲ್ಲಿ ಕೆಕೆಆರ್​ ಇದ್ದು, 18 ಬಾರಿ 200 ಪ್ಲಸ್​ ರನ್​ ಬಿಟ್ಟುಕೊಟ್ಟಿದೆ.

ಸಿಎಸ್​ಕೆ 17, ಡೆಲ್ಲಿ ಕ್ಯಾಪಿಟಲ್ಸ್ 16, ರಾಜಸ್ಥಾನ್​ ರಾಯಲ್ಸ್ 14, ಸನ್​ರೈಸರ್ಸ್​ ಹೈದರಾಬಾದ್​  14 ಹಾಗೂ  ಮುಂಬೈ ಇಂಡಿಯನ್ಸ್​ 11 ಬಾರಿ ಎದುರಾಳಿಗೆ  200+ ರನ್​ ಬಿಟ್ಟುಕೊಟ್ಟಿದೆ.

ಇನ್ನು ಐಪಿಎಲ್​ನಲ್ಲಿ ಅತಿ ಹೆಚ್ಚು ಬಾರಿ  200 ಸ್ಕೋರ್ ಮಾಡಿರುವ ಪಟ್ಟಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್​ ಅಗ್ರಸ್ಥಾನದಲ್ಲಿದೆ. ಸಿಎಸ್​ಕೆ 26 ಬಾರಿ ಈ ಸಾಧನೆ ಮಾಡಿದೆ.

ಅತಿ ಹೆಚ್ಚು ಬಾರಿ 200 ರನ್​​ ಬಿಟ್ಟುಕೊಟ್ಟಿರುವ ಆರ್​ಸಿಬಿ, ಅತಿ ಹೆಚ್ಚು ಬಾರಿ 200 ರನ್​ ದಾಖಲಿಸಿರುವ ಪಟ್ಟಿಯಲ್ಲಿ 2ನೇ ಸ್ಥಾನ ಪಡೆದುಕೊಂಡಿದೆ. ಬೆಂಗಳೂರು ಪ್ರಾಂಚೈಸಿ ಒಟ್ಟು 24 ಬಾರಿ 200+ ಸ್ಕೋರ್​ಗಳಿಸಿದೆ. 263 ಆರ್​ಸಿಬಿ ತಂಡದ ಗರಿಷ್ಠ ಸ್ಕೋರ್​ ಆಗಿದೆ.