R Ashwin: 100 ವರ್ಷಗಳ ಹಿಂದಿನ ದಾಖಲೆ ಮುರಿದು ಹೊಸ ಇತಿಹಾಸ ಬರೆದ ಅಶ್ವಿನ್..!

ಚೆನ್ನೈನಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್ ವಿರುದ್ದದ ಟೆಸ್ಟ್ ಪಂದ್ಯದ 2ನೇ ಇನಿಂಗ್ಸ್​ನಲ್ಲಿ ಟೀಮ್ ಇಂಡಿಯಾ ಸ್ಪಿನ್ನರ್ ಆರ್. ಅಶ್ವಿನ್ 6 ವಿಕೆಟ್ ಉರುಳಿಸಿ ಆಂಗ್ಲ ಪಡೆಗೆ ಆಘಾತ ನೀಡಿದ್ದಾರೆ. ಅದರಲ್ಲೂ ದ್ವಿತೀಯ ಇನಿಂಗ್ಸ್​ನ ಮೊದಲ ಎಸೆತದಲ್ಲೇ ವಿಕೆಟ್ ಕಬಳಿಸುವ ಮೂಲಕ ಅಶ್ವಿನ್ ಶತಮಾನದ ದಾಖಲೆ ಮುರಿದರು.

ಇಂಗ್ಲೆಂಡ್ ತಂಡದ 2ನೇ ಇನಿಂಗ್ಸ್​ ಆರಂಭಕ್ಕೂ ಮುನ್ನ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಚೆಂಡನ್ನು ಅಶ್ವಿನ್​ ಕೈಗೆ ನೀಡಿದರು. ನಾಯಕನ ನಂಬಿಕೆಯನ್ನು ಸಮರ್ಥಿಸುವಂತೆ ಮೊದಲ ಎಸೆತದಲ್ಲೇ ಆರಂಭಿಕ ಬ್ಯಾಟ್ಸ್‌ಮನ್‌ ರೋರಿ ಬರ್ನ್ಸ್ ಅವರನ್ನು ಔಟ್‌ ಮಾಡುವ ಮೂಲಕ ಇತಿಹಾಸ ರಚಿಸಿದರು.

ಕಮಿಂಗ್‌ ಅರೌಂಡ್‌ ದ ವಿಕೆಟ್‌ ಬೌಲಿಂಗ್ ಮಾಡಿದ‌ ಅಶ್ವಿನ್‌ ಎಸೆತವನ್ನು ರಕ್ಷಣಾತ್ಮಕವಾಗಿ ಆಡಲು ರೋರಿ ಬರ್ನ್ಸ್ ಮುಂದಾಗಿದ್ದರು. ಆದರೆ ಚೆಂಡು ಹೆಚ್ಚುವರಿ ಬೌನ್ಸ್ ಆಗಿ ಬ್ಯಾಟ್‌ ಸವರಿ ಸ್ಲಿಪ್‌ನಲ್ಲಿದ್ದ ಅಜಿಂಕ್ಯ ರಹಾನೆಯತ್ತ ಸಾಗಿತು. ಚೆಂಡನ್ನು ರಹಾನೆ ಕೈಯಲ್ಲಿ ಭದ್ರಪಡಿಸುವುದರೊಂದಿಗೆ 100 ವರ್ಷಗಳ ಬಳಿಕ ಟೆಸ್ಟ್​ನಲ್ಲಿ ಮೊದಲ ಎಸೆತದಲ್ಲೇ ವಿಕೆಟ್ ಪಡೆದ ದಾಖಲೆ ಅಶ್ವಿನ್ ಪಾಲಾಯಿತು.

1907ರಲ್ಲಿ ದಕ್ಷಿಣ ಆಫ್ರಿಕಾದ ಸ್ಪಿನ್ನರ್‌ ಬರ್ಟ್‌ ವೊಗ್ಲರ್‌ ಇನಿಂಗ್ಸ್​ನ ಮೊದಲ ಎಸೆತದಲ್ಲೇ ವಿಕೆಟ್ ಪಡೆಯುವ ಮೂಲಕ ಈ ಸಾಧನೆ ಮಾಡಿದ್ದರು. ಅಲ್ಲದೆ ಇಂಗ್ಲೆಂಡ್​ನ ಮಾಜಿ ಆಟಗಾರ ಬಾಬಿ ಪೀಲ್ 1888ರಲ್ಲಿ ಇನಿಂಗ್ಸ್​ನ ಮೊದಲ ಎಸೆತದಲ್ಲೇ ವಿಕೆಟ್ ಪಡೆದ ಮೊದಲ ಸ್ಪಿನ್ನರ್ ಎನಿಸಿಕೊಂಡಿದ್ದರು.

ಇದೀಗ 114 ವರ್ಷಗಳ ಬಳಿಕ ರವಿಚಂದ್ರನ್ ಅಶ್ವಿನ್ ಟೆಸ್ಟ್ ಕ್ರಿಕೆಟ್​ನಲ್ಲಿ ಇನಿಂಗ್ಸ್​ನ ಮೊದಲ ಎಸೆತದಲ್ಲೇ ವಿಕೆಟ್ ಸ್ಪಿನ್ನರ್ ಎಂಬ ದಾಖಲೆಯನ್ನು ಬರೆದಿದ್ದಾರೆ. ಅಲ್ಲದೆ ಇದೇ ವೇಳೆ ಟೆಸ್ಟ್​ ವೃತ್ತಿಜೀವನದಲ್ಲಿ ಅಶ್ವಿನ್ ಮೊದಲ ನೋ ಬಾಲ್ ಕೂಡ ಎಸೆದರು.

75 ಟೆಸ್ಟ್ ಪಂದ್ಯಗಳನ್ನಾಡಿರುವ ಅಶ್ವಿನ್ 20,600 ಎಸೆತಗಳನ್ನು ಎಸೆದಿದ್ದಾರೆ. ಇದರಲ್ಲಿ ಒಂದೇ ಒಂದು ನೋ ಬಾಲ್ ಹಾಕಿರಲಿಲ್ಲ ಎಂಬುದು ವಿಶೇಷ. ಆದರೆ ಈ ಇದೇ ಸ್ಪೆಲ್​ನಲ್ಲಿ ಟೆಸ್ಟ್ ವೃತ್ತಿಜೀವನದ ಮೊದಲ ನೋ ಬಾಲ್ ಹಾಕುವ ಮೂಲಕ ಅಶ್ವಿನ್ ತಮ್ಮ ಸುದೀರ್ಘ ನೋ-ನೋ ಬಾಲ್ ಸ್ಪೆಲ್​ಗೆ ಫುಲ್​ ಸ್ಟಾಪ್ ಹಾಕಿದರು.

Ravichandran Ashwin