Rashid Khan: ಯುವ ಸ್ಪಿನ್ನರ್ ರಶೀದ್ ಖಾನ್ ಮತ್ತೊಂದು ಮುಖ ಅನಾವರಣ

ಅಫ್ಘಾನಿಸ್ತಾನದ ಯುವ ಸ್ಪಿನ್ನರ್ ರಶೀದ್ ಖಾನ್ ಅವರ ಅದ್ಭುತ ಬೌಲಿಂಗ್ ಬಗ್ಗೆ ಎಲ್ಲರಿಗೂ ಗೊತ್ತಿರುವುದೇ. ತಮ್ಮ ಗೂಗ್ಲಿ, ಲೆಗ್ ಬ್ರೇಕ್ ಬೌಲಿಂಗ್ ಮೂಲಕ ಹಲವು ಪಂದ್ಯಗಳ ಫಲಿತಾಂಶವನ್ನೇ ಬದಲಿಸಿದ್ದಾರೆ.

ಅದು ಅಫ್ಘಾನಿಸ್ತಾನ್ ತಂಡದ ಪರವಿರಲಿ, ಇಲ್ಲ ಸನ್​​ರೈಸರ್ಸ್​ ಹೈದರಾಬಾದ್ ಟೀಮ್​ ಇರಲಿ, ಅಥವಾ ಬಿಗ್ ಬ್ಯಾಷ್ ಲೀಗ್ ಆಗಿರಲಿ...ಅಲ್ಲಿ ರಶೀದ್ ಖಾನ್ ಹೀರೋ ಆಗಿ ಮೆರೆಯುತ್ತಿದ್ದಾರೆ. ಇದು ಆನ್ ​ಫೀಲ್ಡ್ ವಿಷಯವಾದ್ರೆ, ಆಫ್​ ಫೀಲ್ಡ್​ನಲ್ಲೂ ನಾನು ಹೀರೋನೇ ಎಂದು ರಶೀದ್ ಖಾನ್ ನಿರೂಪಿಸಿದ್ದಾರೆ.​

ಹೌದು, ಅಫ್ಘಾನಿಸ್ತಾನದ ಪರ್ವಾನ್ ಪ್ರಾಂತ್ಯದಲ್ಲಿ ಉಂಟಾದ ಭೀಕರ ಪ್ರವಾಹದಿಂದ 100 ಕ್ಕೂ ಅಧಿಕ ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ನೂರಾರು ಮಂದಿ ನಿರಾಶ್ರಿತರಾಗಿದ್ದಾರೆ.

ವ್ಯಾಪಕ ಮಳೆಯಿಂದಾಗಿ ಮೂಲಸೌಕರ್ಯಗಳೂ ಇಲ್ಲದೆ ಪರಿತಪಿಸುತ್ತಿದ್ದಾರೆ. ಅನೇಕ ಸಣ್ಣ ಹಳ್ಳಿಗಳಲ್ಲಿ ಅಸ್ಥಿರ ವಿದ್ಯುತ್ ಮತ್ತು ದೂರಸಂಪರ್ಕ ಸೇವೆಗಳು ಬಂದ್ ಆಗಿವೆ. ಇಂತಹ ಸಮಯದಲ್ಲಿ ರಶೀದ್ ಖಾನ್ ಫೌಂಡೇಷನ್ ಜನರ ನೆರವಿಗೆ ಧಾವಿಸಿದೆ.

ಸಂತ್ರಸ್ತರಿಗೆ ಆಶ್ರಯ, ಆಹಾರ, ಮೂಲ ವೈದ್ಯಕೀಯ ನೆರವು ಮತ್ತು ಸಾರಿಗೆ ವ್ಯವಸ್ಥೆ ಒದಗಿಸುವ ಮೂಲಕ ರಶೀದ್ ಖಾನ್ ಫೌಂಡೇಷನ್ ಬಡವರ ಕಣ್ಣೀರು ಒರೆಸುವ ಕೆಲಸ ಮಾಡುತ್ತಿದೆ.

ಈ ಬಗ್ಗೆ ತಮ್ಮ ಟ್ವಿಟರ್ ಖಾತೆಯಲ್ಲಿ ತಿಳಿಸಿರುವ ಲೆಗ್ ಸ್ಪಿನ್ನರ್, ಸಂತ್ರಸ್ತರಿಗೆ ಮತ್ತು ಬಡವರಿಗೆ ಸಹಾಯ ಮಾಡಲು ಎಲ್ಲರೂ ಕೈ ಜೋಡಿಸಬೇಕೆಂದು ಕೇಳಿಕೊಂಡಿದ್ದಾರೆ. ಅಲ್ಲದೆ ಇದಕ್ಕಾಗಿ ಫಂಡ್ ಕೂಡ ಕಲೆಕ್ಟ್ ಮಾಡುತ್ತಿದೆ. ಹೀಗಾಗಿ ನೀವೆಲ್ಲರ ನೆರವಿನ ಅಗತ್ಯವಿದೆ ಎಂದು ತಿಳಿಸಿದ್ದಾರೆ.

ಸದ್ಯ ರಶೀದ್ ಖಾನ್ ಫೌಂಡೇಷನ್ ಮೂಲಕ 4 ಲಕ್ಷ ರೂ. ಸಂಗ್ರಹಿಸಲಾಗಿದ್ದು, ಮತ್ತಷ್ಟು ನೆರವಿನ ಅಗತ್ಯವಿದೆ. ವಿಪತ್ತಿನ ಸಮಯದಲ್ಲಿ ಸಂಕಷ್ಟಕ್ಕೆ ಸಿಲುಕಿರುವವರನ್ನ ಮೇಲೆತ್ತುವ ಮೂಲಕ ನಾವು ಕೂಡ ಎತ್ತರಕ್ಕೆ ಏರುತ್ತೇವೆ ಎಂದು ನಂಬಿದ್ದೇನೆ. ಸಣ್ಣ ಮಕ್ಕಳು, ಸಂಕಷ್ಟಕ್ಕೆ ಸಿಲುಕಿರುವ ಕುಟುಂಬಗಳ ಜೊತೆ ರಶೀದ್ ಖಾನ್ ಫೌಂಡೇಶನ್ ಸದಾ ಇರಲಿದೆ ಎಂದು ರಶೀದ್ ಖಾನ್ ಭರವಸೆ ನೀಡಿದ್ದಾರೆ.

ಸದ್ಯ ಕೆರಿಬಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಭಾಗವಹಿಸುತ್ತಿರುವ ರಶೀದ್ ಖಾನ್, ಕ್ರಿಕೆಟ್​ನೊಂದಿಗೆ ಅತ್ತ ತನ್ನೂರಿನ ಬಡ ಜನರ ಕಣ್ಣೀರು ಒರೆಸುವ ಕೆಲಸವನ್ನೂ ಮುಂದುವರೆಸಿ ಮಾದರಿಯಾಗಿ ನಿಂತಿದ್ದಾರೆ.