ಚೊಚ್ಚಲ ಪಂದ್ಯವಾಡುವ ಆಟಗಾರರು ಮೈದಾನಕ್ಕೆ ಇಳಿದಾಗ ವಿಚಲಿತರಾಗುತ್ತಾರೆ. ಅದರಲ್ಲೂ ಅನುಭವಿ ವೇಗಿಗಳನ್ನು ಎದುರಿಸಲು ತಡಕಾಡುತ್ತಾರೆ. ಆದರೆ ಚಾಂಪಿಯನ್ ಆಗಬೇಕೆಂದೇ ಬ್ಯಾಟ್ ಬೀಸುವವರು ಮಾತ್ರ ತಮ್ಮ ಕೌಶಲ್ಯವನ್ನು ಜಗತ್ತಿನ ಮುಂದೆ ತೆರೆದಿಡುತ್ತಾರೆ.
ಅಂತಹದೊಂದು ಪಂದ್ಯಕ್ಕೆ ಈ ಬಾರಿಯ ರಣಜಿ ಕ್ರಿಕೆಟ್ ಸಾಕ್ಷಿಯಾಗಿದೆ. ಮೊದಲ ಪಂದ್ಯದಲ್ಲೇ ಅನುಭವಿ ಬೌಲರುಗಳನ್ನು ಹಿಗ್ಗಾ ಮುಗ್ಗಾ ಚೆಂಡಾಡುವ ಮೂಲಕ ಅರ್ಸ್ಲನ್ ಖಾನ್ ಎಂಬ ಯುವ ಆಟಗಾರನೊಬ್ಬನ ಎಂಟ್ರಿಯಾಗಿದೆ.
ಅದರಲ್ಲೂ ಈತನ ಸ್ಪೋಟಕ ಬ್ಯಾಟಿಂಗ್ ವಿರೇಂದ್ರ ಸೆಹ್ವಾಗ್ ಅವರನ್ನು ನೆನಪಿಸುವಂತಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಏಕೆಂದರೆ ಚೊಚ್ಚಲ ಪಂದ್ಯದಲ್ಲೇ ಅಜೇಯ ದ್ವಿಶತಕ ಸಿಡಿಸುವುದು ಸಣ್ಣ ಸಾಧನೆ ಏನಲ್ಲ.
ಅರುಣಾಚಲ ವಿರುದ್ಧದ ಪಂದ್ಯದ ಮೂಲಕ ಅರ್ಸ್ಲನ್ ಖಾನ್ ಚಂಡೀಗಢ ಪರ ರಣಜಿ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದಾರೆ. ಅದರಲ್ಲೂ ಮೊದಲ ಪಂದ್ಯದಲ್ಲೇ ಅಜೇಯ 233 ರನ್ ಗಳಿಸಿ ಸಂಚಲನ ಸೃಷ್ಟಿಸಿದ್ದಾರೆ.
236 ಎಸೆತಗಳನ್ನು ಎದುರಿಸಿದ 20 ರ ಹರೆಯದ ಯುವ ಎಡಗೈ ಬ್ಯಾಟ್ಸ್ಮನ್ ಹೊಡಿಬಡಿ ಆಟದ ಮೂಲಕ 233 ರನ್ ಚಚ್ಚಿದ್ದಾರೆ. 98.73 ಸ್ಟ್ರೈಕ್ ರೇಟ್ನಲ್ಲಿ ಬ್ಯಾಟ್ ಬೀಸಿದ ಅರ್ಸ್ಲನ್ ಖಾನ್ 33 ಬೌಂಡರಿ ಮತ್ತು 4 ಸಿಕ್ಸರ್‌ಗಳನ್ನು ಸಿಡಿಸಿದ್ದರು. ಈ ಮೂಲಕ ಆಯ್ಕೆದಾರರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಯಾರೀತ?
ಆಕ್ರಮಣಕಾರಿಯಾಗಿ ಬ್ಯಾಟ್ ಬೀಸುವ ಅರ್ಸ್ಲನ್ ಖಾನ್ 23 ವರ್ಷದೊಳಗಿನ ಏಕದಿನ ಪಂದ್ಯಾವಳಿಯಲ್ಲಿ ಈ ಹಿಂದೆ ಚಂಡೀಗಢ ಪರ ಕಣಕ್ಕಿಳಿದಿದ್ದರು. ಕೇವಲ 11 ಪಂದ್ಯಗಳಲ್ಲಿ 699 ರನ್ ಕಲೆ ಹಾಕುವ ಮೂಲಕ ಹಿರಿಯ ಆಟಗಾರರೇ ನಿಬ್ಬೆರಗಾಗುವಂತೆ ಮಾಡಿದ್ದರು.
