ನಮಗೂ ಅವಕಾಶ ನೀಡಬೇಕೆಂದು ನೋವು ತೋಡಿಕೊಂಡ ಇರ್ಫಾನ್-ರೈನಾ..!

ಎಲ್ಲರೂ ಕೆರಿಯರ್ ಆರಂಭಿಸುವ ಹೊತ್ತಲ್ಲಿ ಈ ಕ್ರಿಕೆಟಿಗನ ವೃತ್ತಿಜೀವನ ಅಂತ್ಯಗೊಂಡಿತು. ಹೌದು, 19ನೇ ವಯಸ್ಸಿಗೆ ಟೀಮ್ ಇಂಡಿಯಾದಲ್ಲಿ ಸ್ಥಾನ ಪಡೆದಿದ್ದ ಇರ್ಫಾನ್ ಪಠಾಣ್ ಅವರ ವೃತ್ತಿಜೀವನ 30 ವರ್ಷ ಆಗುವಷ್ಟರಲ್ಲಿ ಅಂತ್ಯವಾಗಿತ್ತು.

ಅದ್ಭುತ ಸ್ವಿಂಗ್​ ಬೌಲಿಂಗ್ ಮೂಲಕ ಭಾರತ ತಂಡದಲ್ಲಿ ಸ್ಥಾನ ಪಡೆದಿದ್ದ ಇರ್ಫಾನ್ ಅತ್ಯುತ್ತಮ ಪ್ರದರ್ಶನದ ಮೂಲಕ ಟೀಮ್ ಇಂಡಿಯಾದಲ್ಲಿ ಖಾಯಂ ಆಗಿದ್ದರು. ಆದರೆ ಬಳಿಕ ಫಾರ್ಮ್​ ಕಳೆದುಕೊಂಡ ಇರ್ಫಿ ಮತ್ತೆ ತಂಡಕ್ಕೆ ಮರಳಲು ಸಾಕಷ್ಟು ಸರ್ಕಸ್ ಮಾಡುವಂತಾಯಿತು.

ಒಂದು ಕಾಲದಲ್ಲಿ ಟೀಮ್​ ಇಂಡಿಯಾಗೆ ಕಪಿಲ್ ದೇವ್ ಅವರ ಉತ್ತರಾಧಿಕಾರಿ ಎಂದು ಕರೆಸಿಕೊಂಡ ಆಲ್​ರೌಂಡರ್ ಗಂಗೂಲಿ ನಾಯಕತ್ವದ ಯುಗದ ಅಂತ್ಯದೊಂದಿಗೆ ತೆರೆ ಮರೆ ಸರಿಯಲಾರಂಭಿಸಿದರು.

ಅದರಲ್ಲೂ ಯಾವಾಗ ಗ್ರೆಗ್ ಚಾಪೆಲ್ ಇರ್ಫಾನ್ ಪಠಾಣ್​ರನ್ನು ಬೌಲಿಂಗ್​​ಗಿಂತ ಬ್ಯಾಟ್ಸ್​ಮನ್ ಆಗಿ ಬಳಸಿಕೊಳ್ಳಲಾರಂಭಿಸಿದರೋ, ಇತ್ತ ಯುವ ವೇಗಿ ತಮ್ಮ ಟ್ರೇಡ್ ಮಾರ್ಕ್​ನಿಂತಿದ್ದ ಸ್ವಿಂಗ್ ಜಾದುವನ್ನು ಕಳೆದುಕೊಂಡಿದ್ದರು.

2003 ರಲ್ಲಿ ಭಾರತ ಪರ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಕಾಲಿಟ್ಟ ಇರ್ಫಾನ್ ಇದೀಗ ಆಯ್ಕೆಗಾರರ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸುರೇಶ್ ರೈನಾ ಜೊತೆಗಿನ ಲೈವ್​ ಚಾಟ್​ನಲ್ಲಿ ವೃತ್ತಿ ಜೀವನ ನೆನದು ನೋವು ತೋಡಿಕೊಂಡರು.

ಈ ವೇಳೆ ಇರ್ಫಾನ್ ಜೊತೆಗಿನ ಪಾರ್ಟನರ್ಶಿಪ್ ಸ್ಮರಿಸಿದ ರೈನಾ, ನೀವು 2012 ರಲ್ಲಿ ಶ್ರೀಲಂಕಾ ವಿರುದ್ಧ ಆಡಿದ ಇನ್ನಿಂಗ್ಸ್ ಇನ್ನೂ ನೆನಪಿಸಿಕೊಳ್ಳುತ್ತಾರೆ. ಏಕಾಂಗಿಯಾಗಿ ಅಂದು ನೀವು ಭಾರತಕ್ಕೆ ಜಯ ತಂದುಕೊಟ್ಟಿದ್ದೀರಿ ಎಂದರು.

ರೈನಾ ಅವರ ಮಾತುಗಳನ್ನು ಕೇಳಿ ಭಾವುಕರಾದ ಇರ್ಫಾನ್, ಅದು ನನ್ನ ವೃತ್ತಿಜೀವನದ ಕೊನೆಯ ಏಕದಿನ ಪಂದ್ಯವಾಗಿತ್ತು ಎಂದರು. ಇಂದು ಯಾರಾದರೂ ಆ ರೀತಿ ಆಡಿದರೆ, ಅವರು ಒಂದು ವರ್ಷ ತಂಡದಿಂದ ಹೊರಗುಳಿಯುವುದಿಲ್ಲ ಎಂದು ಮಾಜಿ ಆಲ್‌ರೌಂಡರ್ ನೋವು ತೋಡಿಕೊಂಡರು.

ಇದೇ ಮಾತು ಮುಂದುವರೆಸಿದ ರೈನಾ, ಐಸಿಸಿ ಅಥವಾ ವಿದೇಶಿ ಲೀಗ್​ ಫ್ರ್ಯಾಂಚೈಸಿಯೊಂದಿಗೆ ಮಾತನಾಡುವ ಮೂಲಕ ವಿದೇಶಿ ಲೀಗ್​ಗಳಲ್ಲಿ ಭಾರತೀಯ ಆಟಗಾರರಿಗೆ ಆಡಲು ಬಿಸಿಸಿಐಗೆ ಅವಕಾಶ ನೀಡಬೇಕು.

ಕನಿಷ್ಠ ನಮಗೆ ಎರಡು ವಿದೇಶಿ ಲೀಗ್‌ಗಳಲ್ಲಿ ಆಡಲು ಅವಕಾಶ ನೀಡುವಂತಾಗಬೇಕು. ಅಲ್ಲಿ ಉತ್ತಮ ಪ್ರದರ್ಶನ ನೀಡುವ ಮೂಲಕ ಮತ್ತೆ ರಾಷ್ಟ್ರೀಯ ತಂಡಕ್ಕೆ ಮರಳಬಹುದು ಎಂದು ರೈನಾ ಅಭಿಪ್ರಾಯಪಟ್ಟರು.

ಈ ವೇಳೆ, ನಮ್ಮ ದೇಶದ ಮತ್ತು ಆಸ್ಟ್ರೇಲಿಯಾ, ಇಂಗ್ಲೆಂಡ್‌ನ ಕ್ರಿಕೆಟ್​ ಚಿಂತನೆಯಲ್ಲಿ ವ್ಯತ್ಯಾಸವಿದೆ ಎಂದ ಇರ್ಫಾನ್ ಪಠಾಣ್, ಮೈಕೆಲ್ ಹಸ್ಸಿ 29-30 ನೇ ವಯಸ್ಸಿನಲ್ಲಿ ಪಾದಾರ್ಪಣೆ ಮಾಡಿದರು. ಅವರು ನಿವೃತ್ತರಾದಾಗ ಅವರು ಶ್ರೇಷ್ಠ ಕ್ರಿಕೆಟಿಗರ ಪಟ್ಟಿಯಲ್ಲಿದ್ದರು.

ಆದರೆ ಭಾರತದಲ್ಲಿ, 30ನೇ ವಯಸ್ಸಿನಲ್ಲಿ ಪಾದಾರ್ಪಣೆ ಮಾಡುವ ಬಗ್ಗೆ ಯಾರೂ ಯೋಚಿಸುವುದಿಲ್ಲ. ಇಲ್ಲಿ ನಾವು ನಿವೃತ್ತಿ ಬಗ್ಗೆ ಮಾತನಾಡಲು ಪ್ರಾರಂಭಿಸುತ್ತೇವೆ.

ಒಮ್ಮೆ ಬಿಸಿಸಿಐ ವ್ಯಕ್ತಿಯೊಬ್ಬರು ನಾನು ರಾಡರ್​ನಲ್ಲಿ ಇಲ್ಲ ಎಂದಿದ್ದರು. ಅಂದರೆ 30 ವರ್ಷವಾಗುವಷ್ಟರಲ್ಲಿ ಒಬ್ಬರನ್ನು ಸೈಡ್​ಗೆ ಸರಿಸುವುದರ ಬದಲು, ಅಂತಹ ಆಟಗಾರರಿಗೆ ಹೊರಗಿನ ಲೀಗ್‌ಗಳಲ್ಲಿ ಆಡಲು ಅವಕಾಶ ನೀಡಬೇಕು ಎಂದು ಇರ್ಫಾನ್ ತಿಳಿಸಿದರು.

ಅಂದಹಾಗೆ ಕೊನೆಯ ಬಾರಿ ಇರ್ಫಾನ್ ಪಠಾಣ್ ಏಕದಿನ ಪಂದ್ಯವಾಡಿದ್ದು ಶ್ರೀಲಂಕಾ ವಿರುದ್ಧ. ಲಂಕಾದಲ್ಲಿ ನಡೆದ ಈ ಪಂದ್ಯದಲ್ಲಿ ಪಠಾಣ್  29 ರನ್ ಸಿಡಿಸಿದಲ್ಲದೆ, 5 ವಿಕೆಟ್ ಉರುಳಿಸಿ ಟೀಮ್ ಇಂಡಿಯಾಗೆ ಜಯ ತಂದುಕೊಟ್ಟಿದ್ದರು.