Nasser Hussain: ಆ ಒಂದು ವಿಕೆಟ್ ಪಡೆಯಲು ನಾವು ಅದೆಷ್ಟು ಮೀಟಿಂಗ್ ನಡೆಸಿದ್ದೆವೋ..!

ವಿಶ್ವ ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ತಮ್ಮ ವೃತ್ತಿ ಜೀವನದಲ್ಲಿ ಕೇವಲ ಬೌಲರ್​ಗಳ ಮಾತ್ರ ನಿದ್ದೆಗೆಡಿಸಿರಲಿಲ್ಲ. ಅದರ ಜೊತೆಗೆ ಪ್ರತಿ ತಂಡಗಳ ನಾಯಕರ ನಿದ್ದೆಗೆಡಿಸಿದ್ದರು ಎಂಬುದಕ್ಕೆ ಇಂಗ್ಲೆಂಡ್ ಮಾಜಿ ನಾಯಕ ನಾಸಿರ್ ಹುಸೇನ್ ಹೇಳಿಕೆ ಸಾಕ್ಷಿ.

ಸಂದರ್ಶನವೊಂದರಲ್ಲಿ ಮಾತನಾಡಿದ ನಾಸಿರ್ ಹುಸೇನ್, ತಾನು ಕಂಡ ವಿಶ್ವದ ಅತ್ಯುತ್ತಮ ಬ್ಯಾಟ್ಸ್​ಮನ್ ಎಂದರೆ ಅದು ಸಚಿನ್ ತೆಂಡೂಲ್ಕರ್. ಇದಕ್ಕೆ ಸಾಕ್ಷಿಯೇ ಏಕದಿನ ಮತ್ತು ಟೆಸ್ಟ್ ಕ್ರಿಕೆಟ್​ನಲ್ಲಿ ಅವರು ಪೇರಿಸಿರುವ ರನ್​.

ಅವರು ತಂಡದಲ್ಲಿದ್ರೆ ಎದುರಾಳಿ ತಂಡದ ಚಿಂತೆಗೆ ಕಾರಣವಾಗುತ್ತಿತ್ತು. ನಾನು ಇಂಗ್ಲೆಂಡ್ ತಂಡವನ್ನು ಮುನ್ನಡೆಸುತ್ತಿದ್ದಾಗ ಅದೇ ಪರಿಸ್ಥಿತಿಯನ್ನು ಎದುರಿಸಿದ್ದೇನೆ ಎಂದು ನಾಸಿರ್ ಹುಸೇನ್ ಹೇಳಿದರು.

ಸಚಿನ್ ಅವರು ಎದುರಾಳಿ ತಂಡಕ್ಕೆ ಎಷ್ಟು ಭೀತಿ ಉಂಟು ಮಾಡುತಿದ್ರು ಅಂದರೆ, ನಾವು ಭಾರತದ ವಿರುದ್ಧ ಆಡುವಾಗ ನಮ್ಮ ಟಾರ್ಗೆಟ್ ಅವರೇ ಆಗಿದ್ದರು. ನಾನು ಕಪ್ತಾನನಾಗಿದ್ದಾಗ ಅವರ ವಿಕೆಟ್​ ಪಡೆಯುವುದು ಹೇಗೆ ಎಂದು ಚರ್ಚಿಸಲು ಅದೆಷ್ಟು ಮೀಟಿಂಗ್ ಕರೆದಿದ್ದೇನೆ ಎಂಬುದು ನೆನಪಿಲ್ಲ ಎಂದು ನಾಸಿರ್ ಹುಸೇನ್ ತಿಳಿಸಿದರು.

ಸಚಿನ್ ತೆಂಡೂಲ್ಕರ್ ಅದ್ಭುತ ಬ್ಯಾಟಿಂಗ್ ತಂತ್ರಗಾರಿಕೆಯನ್ನು ಹೊಂದಿದ್ದರು. ಹೀಗಾಗಿಯೇ ತಮ್ಮ ವೃತ್ತಿಜೀವನದುದ್ದಕ್ಕೂ ಬೌಲಿಂಗ್ ವಿರುದ್ಧ ಪ್ರಾಬಲ್ಯ ಸಾಧಿಸಿದರು ಎಂದು ನಾಸಿರ್ ಹುಸೇನ್ ಅಭಿಪ್ರಾಯಪಟ್ಟರು.

ಇಂಗ್ಲೆಂಡ್ ಪರ 96 ಟೆಸ್ಟ್ ಮತ್ತು 88 ಏಕದಿನ ಪಂದ್ಯಗಳನ್ನಾಡಿರುವ ನಾಸಿರ್ ಹುಸೇನ್ 90ರ ದಶಕದ ಅತ್ಯುತ್ತಮ ನಾಯಕರುಗಳಲ್ಲಿ ಗುರುತಿಸಿಕೊಂಡಿದ್ದಾರೆ.

ಟೆಸ್ಟ್​ನಲ್ಲಿ 5764 ರನ್ ಹಾಗೂ ಏಕದಿನ ಪಂದ್ಯಗಳಲ್ಲಿ 2332 ರನ್ ಕಲೆಹಾಕಿರುವ ಇಂಗ್ಲೆಂಡ್ ಮಾಜಿ ನಾಯಕ ಅಂತರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಒಟ್ಟಾರೆ 15 ಶತಕ ಸಿಡಿಸಿದ್ದಾರೆ.

463 ಏಕದಿನ ಪಂದ್ಯಗಳಿಂದ ಸರಾಸರಿ 44.83 ರ ಸರಾಸರಿಯಲ್ಲಿ ಸಚಿನ್ 18426 ರನ್ ಗಳಿಸಿದ್ದಾರೆ. ಹಾಗೆಯೇ 200 ಟೆಸ್ಟ್ ಪಂದ್ಯಗಳಿಂದ 15921 ರನ್ ಕಲೆ ಹಾಕಿದ್ದಾರೆ. ಎರಡು ಮಾದರಿ ಕ್ರಿಕೆಟ್​ನಲ್ಲಿ ಲಿಟಲ್ ಮಾಸ್ಟರ್ ಬ್ಯಾಟ್​ನಿಂದ ವಿಶ್ವ ದಾಖಲೆ ಬರೆದಿದ್ದಾರೆ.

ಸಚಿನ್ ತೆಂಡೂಲ್ಕರ್