ಅದೇ ದಿನ ಸೆಹ್ವಾಗ್ ಸಿಡಿಸಿದ್ದು 2 ತ್ರಿಶತಕ: ಅಂತ್ಯವಾಗಿದ್ದು ಬೌಲರೊಬ್ಬರ ಕೆರಿಯರ್..!

ಮಾರ್ಚ್​ 29 ರಂದು ಟೀಂ ಇಂಡಿಯಾದ ಮಾಜಿ ಸ್ಪೋಟಕ ಬ್ಯಾಟ್ಸ್​ಮನ್ ವಿರೇಂದ್ರ ಸೆಹ್ವಾಗ್ ಅವರಿಗೆ ವಿಶೇಷ ದಿನ. ಈ ದಿನವಂತು ವೀರು ಅಭಿಮಾನಿಗಳು ಮರೆಯಲು ಸಾಧ್ಯವಿಲ್ಲ.

ಏಕೆಂದರೆ ವಿರೇಂದ್ರ ಸೆಹ್ವಾಗ್ ಟೆಸ್ಟ್ ಕ್ರಿಕೆಟ್​ನ್ನು ಏಕದಿನ ಮಾದರಿಯಲ್ಲಿ ಆಡಿದ ದಿನವದು. ಹೌದು, ಟೀಂ ಇಂಡಿಯಾ ಪರ ಟೆಸ್ಟ್​ನಲ್ಲಿ ಮೊದಲ ತ್ರಿಶತಕ ಮೂಡಿಬಂದಿದ್ದು ಸೆಹ್ವಾಗ್ ಅವರ ಬ್ಯಾಟ್​ನಿಂದ.

ಅಲ್ಲಿಯವರೆಗೆ ಡಬಲ್ ಸೆಂಚುರಿ ಸಾಧನೆಯಲ್ಲೇ ಕಳೆದು ಹೋಗುತ್ತಿದ್ದ ಭಾರತದ ಬ್ಯಾಟ್ಸ್​ಮನ್​ಗಳ ಮಧ್ಯೆ ಮೊದಲ ಬಾರಿ ತ್ರಿಪಲ್ ಸೆಂಚುರಿ ಸಿಡಿಸಿ ಸೆಹ್ವಾಗ್ ಬ್ಯಾಟ್ ಮೇಲೆತ್ತಿ ನಿಂತಿದ್ದರು.

2004 ರಲ್ಲಿ ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲೇ ಮೊದಲ ಬಾರಿ ಸೆಹ್ವಾಗ್ ತ್ರಿಶತಕ ಸಿಡಿಸಿದ್ದರು. ಅಚ್ಚರಿಯ ವಿಷಯವೆಂದರೆ ಈ ಸಾಧನೆಗೈದು ಇದೇ ದಿನಾಂಕದಂದೇ ಮತ್ತೊಮ್ಮೆ ವೀರು ತ್ರಿಶತಕ ಬಾರಿಸಿ ತಮ್ಮ ದಾಖಲೆಯನ್ನು ಮುರಿದಿರುವುದು.

ನಜಾಫ್​ಘಡದ ನವಾಬ ಎಂದೇ ಖ್ಯಾತಿ ಪಡೆದಿದ್ದ ವಿರೇಂದ್ರ ಸೆಹ್ವಾಗ್ 2004, ಮಾರ್ಚ್​ 29 ರಂದು ಪಾಕಿಸ್ತಾನ ವಿರುದ್ಧ ಪಾಕ್​ನಲ್ಲಿ ಅಕ್ಷರಶಃ ಅಬ್ಬರಿಸಿದ್ದರು.

ಪಾಕಿಸ್ತಾನದ ವಿರುದ್ಧದ ಈ ಟೆಸ್ಟ್​ನಲ್ಲಿ ಟಾಸ್ ಗೆದ್ದ ಭಾರತ ಮೊದಲು ಬ್ಯಾಟಿಂಗ್ ಆಯ್ದುಕೊಂಡಿತು. ಆಕಾಶ್ ಚೋಪ್ರಾ ಅವರೊಂದಿಗೆ ಇನಿಂಗ್ಸ್ ಆರಂಭಿಸಿದ ವೀರು, ಏಕದಿನ ಮಾದರಿಯಲ್ಲಿ ಬ್ಯಾಟಿಂಗ್ ಪ್ರಾರಂಭಿಸಿದರು.

ಒಂದೆಡೆ ಆಕಾಶ್ ಚೋಪ್ರಾ (42 ರನ್) ಮತ್ತು ರಾಹುಲ್ ದ್ರಾವಿಡ್ ( 6 ) ಬೇಗನೆ ಔಟಾದರೂ ಸೆಹ್ವಾಗ್ ಮಾತ್ರ ಬಿರುಸಿನ ಆಟವನ್ನೇ ಮುಂದುವೆರೆಸಿದ್ದರು. ಮೊದಲ ದಿನದಾಟದ ಅಂತ್ಯದಲ್ಲಿ ಸೆಹ್ವಾಗ್ ಅಜೇಯ 228 ರನ್​ ಸಿಡಿಸಿದ್ದರು.

ಮರುದಿನ ಸಕ್ಲೇನ್ ಮುಷ್ತಾಕ್  ಎಸೆತದಲ್ಲಿ ಸಿಕ್ಸರ್ ಸಿಡಿಸಿ ಸೆಹ್ವಾಗ್ 300 ರನ್ ಪೂರೈಸಿದರು. ಕೇವಲ 364 ಎಸೆತಗಳನ್ನು ಎದುರಿಸಿದ ವೀರು ಭಾರತದ ಪರ ಮೊದಲ ತ್ರಿಶತಕ ಸಿಡಿಸಿದ ಆಟಗಾರ ಎನಿಸಿಕೊಂಡರು.

375 ಎಸೆತಗಳಲ್ಲಿ ಒಟ್ಟು 309 ರನ್ ಗಳಿಸಿದ ವೀರು ಕೊನೆಗೂ ವಿಕೆಟ್ ಒಪ್ಪಿಸಿದರು. ಈ ವೇಳೆ ತಮ್ಮ ಸಿಡಿಲಬ್ಬರದ ಬ್ಯಾಟಿಂಗ್ ಮೂಲಕ 39 ಬೌಂಡರಿ ಮತ್ತು 6 ಸಿಕ್ಸರ್​ಗಳು ಮೂಡಿಬಂದಿದ್ದವು. ಈ ಪಂದ್ಯವನ್ನು ಟೀಂ ಇಂಡಿಯಾ 52 ರನ್​ಗಳಿಂದ ಗೆದ್ದುಕೊಂಡಿತು.

ಈ ಸಾಧನೆ ಮಾಡಿ ಬರೋಬ್ಬರಿ ನಾಲ್ಕು ವರ್ಷಕ್ಕೆ ಸೆಹ್ವಾಗ್ ಮತ್ತೊಮ್ಮೆ ಆರ್ಭಟಿಸಿದ್ದರು. ಚೆನ್ನೈನಲ್ಲಿ ನಡೆದ ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್​ನಲ್ಲಿ ಮುಲ್ತಾನ್​ ಕಾ ಸುಲ್ತಾನ್ ತಮ್ಮ ಹಳೆಯ ಖದರ್ ತೋರಿಸಿದ್ದರು.

ಚೆನ್ನೈ ಪಿಚ್‌ನಲ್ಲಿ ಕೇವಲ 116 ಎಸೆತಗಳಲ್ಲಿ ಶತಕ ಪೂರೈಸಿದ ಸೆಹ್ವಾಗ್ ದ್ವಿಶತಕವನ್ನು 200 ಎಸೆತಗಳಲ್ಲಿ ಪೂರೈಸಿದರು. ಇನ್ನು 225 ಎಸೆತಗಳಲ್ಲಿ 250 ರನ್‌ ಬಾರಿಸಿದ ಸೆಹ್ವಾಗ್ ಮುಂದಿದ್ದು ವಿಶ್ವ ದಾಖಲೆ.

ದಕ್ಷಿಣ ಆಫ್ರಿಕಾ ಬೌಲರುಗಳ ಬೆಂಡೆತ್ತಿದ ವೀರು, ಕೇವಲ 278 ಎಸೆತಗಳಲ್ಲಿ ತ್ರಿಶತಕ ಪೂರೈಸಿ ಹೊಸ ದಾಖಲೆ ಬರೆದರು. ಇದು ಕ್ರಿಕೆಟ್ ಇತಿಹಾಸದಲ್ಲೇ ಅತೀ ವೇಗದ ತ್ರಿಪಲ್ ಸೆಂಚುರಿ ಎಂಬ ರೆಕಾರ್ಡ್ ಆಗಿ ಉಳಿಯಿತು.

ಈ ದಾಖಲೆಯ ಇನಿಂಗ್ಸ್​ನಲ್ಲಿ ಸೆಹ್ವಾಗ್ ಬ್ಯಾಟ್​ನಿಂದ ಮೂಡಿ ಬಂದಿದ್ದು 42 ಭರ್ಜರಿ ಬೌಂಡರಿ ಹಾಗೂ 5 ಸೂಪರ್ ಸಿಕ್ಸ್. ಕೊನೆಗೂ 304 ಎಸೆತಗಳಲ್ಲಿ 319 ರನ್ ಬಾರಿಸಿ ತಮ್ಮದೇ ಈ ಹಿಂದಿನ 309 ರನ್​ಗಳ ದಾಖಲೆಯನ್ನು ಅಳಿಸಿ ಹಾಕಿದರು.

ಇನ್ನು ಪಾಕ್ ವಿರುದ್ಧದ ಟೆಸ್ಟ್​ನಲ್ಲಿ ಸೆಹ್ವಾಗ್ ಅಮೋಘ ಬ್ಯಾಟಿಂಗ್ ಪರಿಣಾಮ, ಖ್ಯಾತ ಪಾಕ್ ಬೌಲರೊಬ್ಬರ ಹೀನಾಯ ಪ್ರದರ್ಶನಕ್ಕೆ ಸಾಕ್ಷಿಯಾಯಿತು.

ಈ ಪಂದ್ಯದಲ್ಲಿ ಸಕ್ಲೇನ್ ಮುಷ್ತಾಕ್  204 ರನ್‌ ನೀಡಿ ಕೇವಲ  1 ವಿಕೆಟ್ ಪಡೆದಿದ್ದರು. ಸೆಹ್ವಾಗ್ ಅವರ ಬ್ಯಾಟಿಂಗ್ ಆರ್ಭಟಕ್ಕೆ ಪಾಕ್ ಲೆಜೆಂಡ್ ಆಫ್-ಸ್ಪಿನ್ನರ್​ನ ಟೆಸ್ಟ್ ಕೆರಿಯರ್ ಅಂತ್ಯಕ್ಕೆ ಕಾರಣವಾಯಿತು. ಈ ಪಂದ್ಯದ ಬಳಿಕ ಸಕ್ಲೇನ್​ ಅವರನ್ನು ತಂಡವನ್ನು ಕೈ ಬಿಡಲಾಯಿತು.