LPL 2020: ಲಂಕಾ ಪ್ರೀಮಿಯರ್ ಲೀಗ್​ಗೆ ಕ್ಷಣಗಣನೆ: ಘರ್ಜಿಸಲು ತಯಾರಾದ ಭಾರತದ ಹಳೇ ಹುಲಿಗಳು: ಯಾರೆಲ್ಲಾ?

ಲಂಕಾ ಪ್ರೀಮಿಯರ್ ಲೀಗ್ 2020 ಆರಂಭಕ್ಕೆ ಕ್ಷಣಗಣನೆ ಶುರುವಾಗಿದೆ. ನವೆಂಬರ್ 26ಕ್ಕೆ ಈ ಟೂರ್ನಿಗೆ ಚಾಲನೆ ಸಿಗಲಿದ್ದು, ಉದ್ಘಾಟನಾ ಪಂದ್ಯದಲ್ಲಿ ಕೊಲಂಬೊ ಕಿಂಗ್ಸ್ ಹಾಗೂ ಕ್ಯಾಂಡಿ ಟಸ್ಕರ್ಸ್ ತಂಡಗಳು ಮುಖಾಮುಖಿ ಆಗುತ್ತಿವೆ.

ಇಂಡಿಯನ್ ಪ್ರೀಮಿಯರ್ ಲೀಗ್ ಮಾದರಿಯಲ್ಲೇ ಲಂಕಾನ್ನರ ನಾಡಿನಲ್ಲಿ ಲಂಕಾ ಪ್ರೀಮಿಯರ್ ಲೀಗ್ ಆಯೋಜಿಸಲಾಗಿದ್ದು ನ. 26 ರಿಂದ ಡಿಸೆಂಬರ್ 16ರ ವರೆಗೆ ಹಂಬನತೋಟದ ಮಹಿಂದಾ ರಾಜಪಕ್ಸೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯಲಿವೆ.

ಭಾರತೀಯ ಮೂಲದ ಮೈ 11 ಸರ್ಕಲ್ ಎಲ್​ಪಿಎಲ್​ 2020 ಟೂರ್ನಿಯ ಅಧಿಕೃತ ಪ್ರಾಯೋಜಕತ್ವ ಪಡೆದುಕೊಂಡಿದ್ದು, ಟೂರ್ನಿಯಲ್ಲಿ ಕೊಲಂಬೊ ಕಿಂಗ್ಸ್, ದಂಬುಲಾ ವೈಕಿಂಗ್ಸ್, ಗಾಲೆ ಗ್ಲಾಡಿಯೇಟರ್ಸ್, ಜಾಫ್ನಾ ಸ್ಟ್ಯಾಲಿಯನ್ಸ್ ಮತ್ತು ಕ್ಯಾಂಡಿ ಟಸ್ಕರ್ಸ್ ತಂಡಗಳು ಟ್ರೋಫಿಗಾಗಿ ಪೈಪೋಟಿ ನಡೆಸಲಿವೆ.

ಲಂಕಾ ಪ್ರೀಮಿಯರ್ ಲೀಗ್​ನಲ್ಲಿ ಭಾರತದ 4 ಪ್ರಮುಖ ಆಟಗಾರರು ಕಣಕ್ಕಿಳಿಯುತ್ತಿದ್ದಾರೆ ಎಂಬುವುದು ವಿಶೇಷ.

2006-2011ರವರೆಗೆ ಟೀಂ ಇಂಡಿಯಾದ ಖಾಯಂ ಸದಸ್ಯರಾಗಿದ್ದ ಮಾಜಿ ವೇಗದ ಬೌಲರ್ ಮುನಾಫ್ ಪಟೇಲ್ ಕ್ಯಾಂಡಿ ಟಸ್ಕರ್ಸ್ ತಂಡದ ಪರ ಆಡಲಿದ್ದಾರೆ.

ಇವರ ಜೊತೆಗೆ ಭಾರತದ ಮಾಜಿ ಆಲ್ರೌಂಡರ್ ಇರ್ಫಾನ್ ಪಠಾಣ್ ಕೂಡ ಕ್ಯಾಂಡಿ ಟಸ್ಕರ್ಸ್ ತಂಡದ ಪರ ಕಣಕ್ಕಿಳಿಯಲಿದ್ದಾರೆ.

ಇನ್ನೂ ಭಾರತೀಯ ಕ್ರಿಕೆಟಿಗರಾದ ಮನ್​ಪ್ರೀತ್ ಗೋನಿ ಕೊಲಂಬೊ ಕಿಂಗ್ಸ್ ಪರ ಹಾಗೂ ಸಂದೀಪ್ ತ್ಯಾಗಿ ದಂಬುಲಾ ವೈಕಿಂಗ್ಸ್ ಪರ ಅಬ್ಬರಿಸಲಿದ್ದಾರೆ.

ಮನ್ವಿಂದರ್ ಸಿಂಗ್ ಬಲಗೈ ಮಧ್ಯಮ ವೇಗಿಯಾಗಿದ್ದು ಭಾರತದ ಪರ 2 ಏಕದಿನ ಪಂದ್ಯವನ್ನಾಡಿದ್ದಾರೆ.

ಎಲ್​ಪಿಎಲ್​ 2020 ಟೂರ್ನಿಯು ಈ ಹಿಂದೆ ಆಗಸ್ಟ್ 28ಕ್ಕೆ ಆರಂಭವಾಗಬೇಕಿತ್ತು. ಆದರೆ, ವಿದೇಶಿ ಆಟಗಾರರಿಗೆ ದೀರ್ಘ ಕಾಲದ ಕ್ವಾರಂಟೈನ್ ಎದುರಿಸಬೇಕು ಎಂದು ವೈದ್ಯಾಧಿಕಾರಿಗಳು ಸಲಹೆ ನೀಡಿದ್ದ ಕಾರಣ ಟೂರ್ನಿಯನ್ನು ನವೆಂಬರ್ ಮತ್ತು ಡಿಸೆಂಬರ್ ಅವಧಿಯಲ್ಲಿ ಆಯೋಜಿಸಲು ನಿರ್ಧರಿಸಲಾಯಿತು.

ಬಾಲಿವುಡ್ ನಟ ಸಲ್ಮಾನ್ ಖಾನ್ ಅವರ ಕಿರಿಯ ಸಹೋದರ ಸೊಹೈಲ್ ಮತ್ತು ತಂದೆ, ಪ್ರಸಿದ್ಧ ಚಿತ್ರಕಥೆಗಾರ ಸಲೀಮ್ ಖಾನ್ ಒಡೆತನದಲ್ಲಿ ಲಂಕಾ ಪ್ರೀಮಿಯರ್ ಲೀಗ್ ತಂಡಕ್ಕೆ ಬಂಡವಾಳ ಹೂಡಿದ್ದಾರೆ.