ಕೊರೋನಾ ನಿಯಮ ಉಲ್ಲಂಘನೆ: ತಂಡದಿಂದ ಜೋಫ್ರಾ ಆರ್ಚರ್ ಔಟ್..!

ಕೊರೋನಾ ವೈರಸ್ ಭೀತಿ ನಡುವೆ ಇಂಗ್ಲೆಂಡ್ ಹಾಗೂ ವೆಸ್ಟ್ ಇಂಡೀಸ್ ನಡುವೆ ಟೆಸ್ಟ್ ಸರಣಿ ನಡೆಯುತ್ತಿದೆ. ಮೊದಲ ಟೆಸ್ಟ್​ ಸೋಲುಂಡಿದ್ದ ಆತಿಥೇಯ ಆಂಗ್ಲರ ತಂಡಕ್ಕೆ 2ನೇ ಪಂದ್ಯ ಆರಂಭಕ್ಕೂ ಮುನ್ನವೇ ಹಿನ್ನಡೆ ಅನುಭವಿಸಿದೆ.

ಹೌದು, ತಂಡದ ಪ್ರಮುಖ ವೇಗಿ ಜೋಫ್ರಾ ಆರ್ಚರ್​ನ್ನು ಎರಡನೇ ಟೆಸ್ಟ್​ನಿಂದ ಕೈ ಬಿಡಲಾಗಿದೆ. ಹೀಗಾಗಿ ಇಂದಿನಿಂದ ಶುರುವಾಗಲಿರುವ ಎರಡನೇ ಟೆಸ್ಟ್​ನಲ್ಲಿ ಆರ್ಚರ್ ಕಣಕ್ಕಿಳಿಯುತ್ತಿಲ್ಲ.

ಆಟಗಾರರಿಗೆ ಸೂಚಿಸಲಾದ ಕೊರೋನಾ ನಿಯಮವನ್ನು ಉಲ್ಲಂಘಿಸಿದ್ದರಿಂದ ಪ್ರಮುಖ ವೇಗಿ ಜೋಫ್ರಾ ಆರ್ಚರ್​ನ್ನು ತಂಡದಿಂದ ಕೈ ಬಿಡಲಾಗಿದೆ ಎಂದು ಇಂಗ್ಲೆಂಡ್ ಕ್ರಿಕೆಟ್ ಬೋರ್ಡ್ ತಿಳಿಸಿದೆ.

ಕೋವಿಡ್-19 ಭೀತಿ ನಡುವೆ ಸಂಪೂರ್ಣ ಸುರಕ್ಷತೆಯೊಂದಿಗೆ ಮತ್ತೆ ಕ್ರಿಕೆಟ್ ಆರಂಭಿಸಲಾಗಿತ್ತು. ​ ಸರಣಿಗೂ ಮುನ್ನ ಇಂಗ್ಲೆಂಡ್- ವೆಸ್ಟ್ ಇಂಡೀಸ್​ ತಂಡಗಳ ಆಟಗಾರರನ್ನು ಐಸೋಲೇಶನ್​ಗೆ ಒಳಪಡಿಸಲಾಗಿತ್ತು.

ಅಲ್ಲದೆ ಯಾವುದೇ ಆಟಗಾರರು ಸರಣಿ ಮುಗಿಯುವವರೆಗೂ ಇತರರನ್ನು ಭೇಟಿಯಾಗುವುದಾಗಲಿ, ಬೇರೆ ಕಡೆ ಹೋಗುವುದಾಗಲಿ ಮಾಡುವಂತಿಲ್ಲ. ಸಂಪೂರ್ಣ ಸುರಕ್ಷತೆಗಾಗಿ ಜೈವಿಕ ಸುರಕ್ಷತಾ ವಲಯವನ್ನು ರೂಪಿಸಲಾಗಿತ್ತು. ಹಾಗೆಯೇ ಈ ಬಗ್ಗೆ ಎಚ್ಚರವಹಿಸಲು ಆಟಗಾರರಿಗೆ ಜಿಪಿಎಸ್ ಟ್ರ್ಯಾಕಿಂಗ್ ಅಳವಡಿಸಲಾಗಿತ್ತು.

ಆದರೆ ಜೋಫ್ರಾ ಆರ್ಚರ್ ಮ್ಯಾಂಚೆಸ್ಟರ್​ಗೆ ಪ್ರಯಾಣಿಸುವ ಬ್ರಿಡ್ಜ್ ಟೌನ್​ನಲ್ಲಿರುವ ತಮ್ಮ ಫ್ಲಾಟ್​ಗೆ ಹೋಗಿ ಬಂದಿದ್ದರು. ಇದು ಜಿಪಿಎಸ್ ಟ್ರ್ಯಾಕಿಂಗ್ ಮೂಲಕ ಪತ್ತೆಯಾಗುತ್ತಿದ್ದಂತೆ ತಂಡದಿಂದ ಕೈ ಬಿಡಲಾಗಿದೆ.

ಕೊರೋನಾ ಸುರಕ್ಷತೆ ನಿಯಮ ಉಲ್ಲಂಘಿಸಿದಕ್ಕಾಗಿ ಮತ್ತೆ ಐದು ದಿನಗಳ ಕಾಲ ಐಸೋಲೇಶನ್​ಗೆ ಒಳಪಡಲು ಸೂಚಿಸಲಾಗಿದೆ. ಈ ಅವಧಿಯಲ್ಲಿ ಎರಡು ಬಾರಿ ಕೊರೋನಾ ಪರೀಕ್ಷೆ ನಡೆಯಲಿದ್ದು, 2 ಬಾರಿ ಕೂಡ ನೆಗೆಟಿವ್ ಬಂದರೆ ಮಾತ್ರ 13ರ ಬಳಗದಲ್ಲಿ ಸ್ಥಾನ ಪಡೆಯಬಹುದು.

ಇನ್ನು ತಾವು ಮಾಡಿರುವ ತಪ್ಪಿಗೆ ಕ್ಷಮೆಯಾಚಿಸಿರುವ ಜೋಫ್ರಾ, ನಾನು ಮಾಡಿದ ಒಂದು ಸಣ್ಣ ತಪ್ಪು ಇಡೀ ತಂಡ ಹಾಗೂ ಮ್ಯಾನೇಜ್​ಮೆಂಟ್​ನ್ನು ಅಪಾಯಕ್ಕೆ ಸಿಲುಕುವಂತೆ ಮಾಡಿದೆ. ಜೈವಿಕ ಸುರಕ್ಷತಾ ವಲಯದಲ್ಲಿರುವ ಪ್ರತಿಯೊಬ್ಬರಿಗೂ ನಾನು ಪ್ರಮಾಣಿಕವಾಗಿ ಕ್ಷಮೆ ಕೋರುತ್ತೇನೆ ಎಂದಿದ್ದಾರೆ.

ಟೆಸ್ಟ್ ಪಂದ್ಯದಿಂದ ಹೊರಗುಳಿದಿರುವುದು ನನಗೆ ತುಂಬಾ ನೋವುಂಟುಮಾಡಿದೆ. ವಿಶೇಷವಾಗಿ ಇಂತಹ ಸರಣಿ ವೇಳೆ. ನಾನು ಎರಡೂ ತಂಡಗಳನ್ನು ನಿರಾಸೆಯನ್ನುಂಟು ಮಾಡಿರುವೆ ಎಂದು ಭಾವಿಸುತ್ತೇನೆ, ಕ್ಷಮಿಸಬೇಕೆಂದು  ಸಹ ಆಟಗಾರರಲ್ಲಿ ಜೋಫ್ರಾ ಆರ್ಚರ್ ಮನವಿ ಮಾಡಿದ್ದಾರೆ.