ಗಂಗೂಲಿ ತಂಡಕ್ಕೆ ಮರಳಿ ಬಾ ಎಂದಾಗ ಆಗಲ್ಲ ಎಂದಿದ್ದರು ಶ್ರೀನಾಥ್..!

ಜಾವಗಲ್ ಶ್ರೀನಾಥ್. ಟೀಮ್ ಇಂಡಿಯಾ ಕಂಡ ಶ್ರೇಷ್ಠ ವೇಗಿಗಳಲ್ಲಿ ಒಬ್ಬರು. ಭಾರತದ ಪರ ಅತ್ಯಂತ ವೇಗದಲ್ಲಿ ಚೆಂಡೆಸೆದ ದಾಖಲೆಗಳ ಪಟ್ಟಿಯಲ್ಲಿ ಇಂದಿಗೂ ಕನ್ನಡಿಗನ ಹೆಸರಿದೆ. ಆದರೆ ಮೈಸೂರ್ ಎಕ್ಸ್​ಪ್ರೆಸ್ ಯುಗಾಂತ್ಯದ ವೇಳೆ ತಾನೂ ಕೂಡ ಅಸಮಾಧನಗೊಂಡಿದ್ದೆ ಎಂಬುದನ್ನು ಶ್ರೀನಾಥ್ ಬಹಿರಂಗಪಡಿಸಿದ್ದಾರೆ.

ಅದು 2002, ಟೀಮ್ ಇಂಡಿಯಾ ಇಂಗ್ಲೆಂಡ್ ಪ್ರವಾಸಕ್ಕೆ ರೆಡಿಯಾಗಿತ್ತು. ಆದರೆ ತಂಡದ ಆಯ್ಕೆ ವೇಳೆ ನನ್ನನ್ನು ಕೈ ಬಿಡಲಾಗಿತ್ತು. ಕಾರಣ ವಿಶ್ರಾಂತಿ ನೀಡುತ್ತಿರುವುದಾಗಿ ತಿಳಿಸಿದ್ದರು.

ಆದರೆ ಅದು ಅನಿರೀಕ್ಷಿತ ಬೆಳವಣಿಗೆಯಾಗಿತ್ತು. ಏಕೆಂದರೆ ವಿಶ್ರಾಂತಿಯನ್ನು ತೆಗೆದುಕೊಳ್ಳಬೇಕಾಗಿರುವುದು ನಾನು. ಆದರೆ ನನ್ನ ನಿರ್ಧಾರವನ್ನು ಬೇರೆಯವರು ಪ್ರಕಟಿಸಿದ್ದರು. ಇದು ನನಗೆ ಇಷ್ಟವಿರಲಿಲ್ಲ. ನನಗೆ ವಿಶ್ರಾಂತಿಯ ಅವಶ್ಯಕತೆ ಇಲ್ಲದಿದ್ದಾಗ ಅವರು ಒತ್ತಾಯಪೂರ್ವಕ ಬ್ರೇಕ್ ನೀಡಿದ್ದರು.

ನನಗೆ ಇಂಗ್ಲೆಂಡ್ ಸರಣಿಯಲ್ಲಿ ಅವಕಾಶ ಸಿಕ್ಕಿರಲಿಲ್ಲ. ಆದರೆ ನಾನು ಇದೇ ಅವಧಿಯಲ್ಲಿ ಕೌಂಟಿ ಕ್ರಿಕೆಟ್ ಆಡಲು ಇಂಗ್ಲೆಂಡ್​ನತ್ತ ತೆರಳಿದೆ. ನಾಯಕ ಸೌರವ್ ಗಂಗೂಲಿ ಕರೆ ಮಾಡಿ ನೀವು ಇಂಗ್ಲೆಂಡ್ ಸರಣಿಯಲ್ಲಿ ಭಾಗವಹಿಸುವಂತೆ ಕೇಳಿಕೊಂಡಿದ್ದರು.

ಆದರೆ ಅದಾಗಲೇ ಆಯ್ಕೆ ಬಗ್ಗೆ ಅಸಮಾಧಾನಗೊಂಡಿದ್ದ ನಾನು, 'ಇಲ್ಲ, ಆಗುವುದಿಲ್ಲ' ಎಂದು ಹೇಳಿದೆ. ಗಂಗೂಲಿ ಅವರ ಆಹ್ವಾನವನ್ನು ನಾನು ಒಪ್ಪಿರಲಿಲ್ಲ. ಆ ಬಳಿಕ ಪರಿಸ್ಥಿತಿ ತಿಳಿಯಾದ ನಂತರ ಟೀಮ್ ಇಂಡಿಯಾಗೆ ವಾಪಾಸ್ಸಾದೆ. ಅಲ್ಲದೆ 2003ರ ವಿಶ್ವಕಪ್​ನಲ್ಲೂ ಭಾಗವಹಿಸದೆ ಎಂದು ಶ್ರೀನಾಥ್‌ ತಮ್ಮ ಹಳೆಯ ದಿನಗಳನ್ನು ಸ್ಮರಿಸಿಕೊಂಡರು.

ಭಾರತದ ಪರ ಅನಿಲ್ ಕುಂಬ್ಳೆ (334) ನಂತರ ಅತಿ ಹೆಚ್ಚು ವಿಕೆಟ್ ಪಡೆದ ಆಟಗಾರರಲ್ಲಿ ಶ್ರೀನಾಥ್ ಅವರು ಎರಡನೇ ಸ್ಥಾನವನ್ನು ಹೊಂದಿದ್ದಾರೆ. ಅವರು 315 ಏಕದಿನ ಮತ್ತು ಟೆಸ್ಟ್‌ನಲ್ಲಿ 236 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಆದರೆ ಅತ್ಯುತ್ತಮ ಪಂದ್ಯಗಳ ಬಗ್ಗೆ ಚರ್ಚಿಸುವಾಗ ಶ್ರೀನಾಥ್ ಹೆಸರು ಕೇಳಿ ಬರುವುದು ವಿರಳ ಎಂದು  ಕೆಲ ದಿನಗಳ ಹಿಂದೆಯಷ್ಟೇ ದಕ್ಷಿಣ ಆಫ್ರಿಕಾದ ಮಾಜಿ ಆಲ್​ರೌಂಡರ್  ಶಾನ್ ಪೊಲಾಕ್  ಬೇಸರ ವ್ಯಕ್ತಪಡಿಸಿದ್ದರು.

ಕ್ರಿಕೆಟ್ ಕೆರಿಯರ್​ನಲ್ಲಿ  500 ಕ್ಕೂ ಅಧಿಕ ವಿಕೆಟ್ ಪಡೆದಿರುವ ಬೌಲರ್​ಗೆ ಸಿಗಬೇಕಾದ ಅರ್ಹ ಮನ್ನಣೆ ಶ್ರೀನಾಥ್ ಅವರಿಗೆ ಸಿಕ್ಕಿರಲಿಲ್ಲ ಎಂಬುದು ನನ್ನ ಅನಿಸಿಕೆ ಎಂದು ಸೌತ್ ಆಫ್ರಿಕಾ ಮಾಜಿ ಆಟಗಾರ ಹೇಳಿದ್ದರು.

ಹಾಗೆಯೇ  ಕೆಲ ದಿನಗಳ ಹಿಂದೆ ಜಾವಗಲ್ ಶ್ರೀನಾಥ್ ಅವರನ್ನು ಟೀಮ್ ಇಂಡಿಯಾದ ಟೆಸ್ಟ್​ ಸ್ಪೆಷಲಿಸ್ಟ್ ವಿವಿಎಸ್ ಲಕ್ಷ್ಮಣ್ ಕೂಡ ಹಾಡಿ ಹೊಗಳಿದ್ದರು. ಮೈಸೂರಿನಿಂದ ಬಂದ ವೇಗದ ಬೌಲರ್ ಶ್ರೀನಾಥ್ ಟೀಮ್ ಇಂಡಿಯಾದಲ್ಲಿ ವೇಗದ ಬೌಲಿಂಗ್‍ನಲ್ಲಿ ಕ್ರಾಂತಿಯ ಕಿಡಿ ಹಚ್ಚಿದ್ದರು ಎಂದು ಲಕ್ಷ್ಮಣ್ ಅಭಿಪ್ರಾಯಪಟ್ಟಿದ್ದರು.

ವೇಗದ ಬೌಲಿಂಗ್‍ಗೆ ಸಹಕಾರಿಯಲ್ಲದ ಪಿಚ್‍ಗಳಲ್ಲೂ ಅವರು ಅದ್ಭುತ ಸ್ಪೆಲ್ ಮಾಡುತ್ತಿದ್ದರು. ಎಂತಹ ಕಠಿಣ ಸಂದರ್ಭದಲ್ಲೂ ಅತ್ಯುತ್ತಮ ಬೌಲಿಂಗ್ ಮಾಡುವ ತುಡಿತವೇ ಶ್ರೀ ಯಶಸ್ವಿಗೆ ಕಾರಣ ಎಂದು ಲಕ್ಷ್ಮಣ್ ಮೈಸೂರ್ ಎಕ್ಸ್​ಪ್ರೆಸ್​ರನ್ನು ಹಾಡಿ ಹೊಗಳಿದ್ದರು.

ಟೀಮ್ ಇಂಡಿಯಾ ಪರ  67 ಟೆಸ್ಟ್ ಪಂದ್ಯಗಳನ್ನು ಆಡಿರುವ ಶ್ರೀನಾಥ್  15,104 ಎಸೆತಗಳನ್ನು ಎಸೆದಿದ್ದರು. ಇದರಲ್ಲಿ 236 ವಿಕೆಟ್ ಉರುಳಿಸಿದ್ದರು. ಹಾಗೆಯೇ  86 ಕ್ಕೆ 8 ವಿಕೆಟ್ ಅವರ ಟೆಸ್ಟ್ ಇನಿಂಗ್ಸ್​ವೊಂದರ ಅತ್ಯುತ್ತಮ ಸಾಧನೆ.

229 ಏಕದಿನ ಪಂದ್ಯಗಳಲ್ಲಿ ಜಾವಗಲ್ ಶ್ರೀನಾಥ್ ಅವರು 227 ಇನಿಂಗ್ಸ್​ನಲ್ಲಿ ಬೌಲ್ ಮಾಡಿದ್ದರು. ಒಟ್ಟು 11,935 ಎಸೆತ ಬೌಲ್ ಮಾಡಿರುವ ಕನ್ನಡಿಗ  315 ವಿಕೆಟ್ ಕಬಳಿಸಿದ್ದಾರೆ. ಇದರಲ್ಲಿ  23 ರನ್​ಗೆ  5 ವಿಕೆಟ್ ಕಬಳಿಸಿರುವುದು ಶ್ರೇಷ್ಠ ದಾಖಲೆಯಾದರೆ, 3 ಬಾರಿ  5 ವಿಕೆಟ್​ಗಳ ಗುಚ್ಛ ಪಡೆದಿದ್ದರು.

ನವೆಂಬರ್  29, 1991 ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಟೆಸ್ಟ್​ ಪಂದ್ಯದೊಂದಿಗೆ ಅಂತರಾಷ್ಟ್ರೀಯ ಕ್ರಿಕೆಟ್ ಕೆರಿಯರ್ ಆರಂಭಿಸಿದ್ದ ಜಾವಗಲ್ ಶ್ರೀನಾಥ್ ಅವರು ಮಾರ್ಚ್​  23, 2003 ರಲ್ಲಿ ಆಸ್ಟ್ರೇಲಿಯಾ ವಿರುದ್ಧವೇ ತಮ್ಮ ಕೊನೆಯ ಅಂತರಾಷ್ಟ್ರೀಯ ಏಕದಿನ ಪಂದ್ಯವಾಡಿರುವುದು ವಿಶೇಷ.

ಜಾವಗಲ್‌ ಶ್ರೀನಾಥ್