Ishant Sharma: ಈ ಸಾಧನೆ ಮಾಡಿದ ಟೀಮ್ ಇಂಡಿಯಾದ 2ನೇ ವೇಗಿ, 4ನೇ ಬೌಲರ್ ಇಶಾಂತ್ ಶರ್ಮಾ..!

ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್​ ವಿರುದ್ಧದ ಪಿಂಕ್​ ಬಾಲ್ ಟೆಸ್ಟ್​ನಲ್ಲಿ ಕಣಕ್ಕಿಳಿಯುವ ಮೂಲಕ ಟೀಮ್ ಇಂಡಿಯಾ ವೇಗಿ ಇಶಾಂತ್ ಶರ್ಮಾ ಭಾರತದ ಪರ ನೂರು ಟೆಸ್ಟ್ ಪಂದ್ಯಗಳನ್ನಾಡಿದ ವಿಶೇಷ ಸಾಧನೆ ಮಾಡಿದ್ದಾರೆ.

ಅಲ್ಲದೆ ಈ ಸಾಧನೆ ಮಾಡಿದ ಭಾರತದ 2ನೇ ವೇಗಿ ಎಂಬ ಹಿರಿಮೆಗೆ ಪಾತ್ರರಾದರು. ಇದಕ್ಕೂ ಮುನ್ನ ಕ್ರಿಕೆಟ್ ದಂತಕತೆ ವೇಗ ಬೌಲರ್ ಕಪಿಲ್ ದೇವ್ 100 ಟೆಸ್ಟ್ ಪಂದ್ಯಗಳನ್ನಾಡಿದ್ದರು.

ಇನ್ನು ಭಾರತದ ಪರ 100 ಟೆಸ್ಟ್ ಪಂದ್ಯಗಳನ್ನಾಡಿದ 4ನೇ ಬೌಲರ್ ಎಂಬ ಗೌರವಕ್ಕೂ ಇಶಾಂತ್ ಪಾತ್ರರಾಗಿದ್ದಾರೆ. ಇದಕ್ಕೂ ಮೊದಲು ಅನಿಲ್ ಕುಂಬ್ಳೆ (132), ಕಪಿಲ್ ದೇವ್ (131) ಮತ್ತು ಹರ್ಭಜನ್ ಸಿಂಗ್ (101) ಬೌಲರುಗಳ ವಿಭಾಗದಲ್ಲಿ ನೂರು ಟೆಸ್ಟ್​​ನಲ್ಲಿ ಕಣಕ್ಕಿಳಿದಿದ್ದರು. ಇದೀಗ ಈ ಸಾಧನೆಯನ್ನು ಮಾಡಿ 32ರ ಹರೆಯ ವೇಗಿ ವಿಶೇಷ ಸಾಧಕರ ಪಟ್ಟಿಗೆ ಸೇರ್ಪಡೆಗೊಂಡಿದ್ದಾರೆ.

2007 ಮಾರ್ಚ್​ನಲ್ಲಿ ಟೆಸ್ಟ್ ಕ್ರಿಕೆಟ್ ಗೆ ಪದಾರ್ಪಣೆ ಮಾಡಿದ ಇಶಾಂತ್ ಅವರು ಇತ್ತೀಚೆಗಷ್ಟೇ 300 ಟೆಸ್ಟ್ ವಿಕೆಟ್ ಪಡೆದ ಸಾಧನೆ ಮಾಡಿದ್ದರು. 14 ವರ್ಷಗಳ ಟೀಮ್ ಇಂಡಿಯಾ ವೇಗದ ಬೌಲಿಂಗ್​ನಲ್ಲಿ ಗುರುತಿಸಿಕೊಂಡಿರುವ ಇಶಾಂತ್ ಅವರ ಸಾಧನೆಯನ್ನು ಪರಿಗಣಿಸಿ ಮೊಟೇರಾ ಮೈದಾನದಲ್ಲಿ ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಹಾಗೂ ಗೃಹ ಸಚಿವ ಅಮಿತ್ ಶಾ ಸ್ಮರಣಾರ್ಥ ನೀಡಿ ಗೌರವಿಸಿದರು.

ಟೀಮ್ ಇಂಡಿಯಾ ಪರ 100 ಟೆಸ್ಟ್​ಗಳನ್ನು ಆಡಿರುವ ಇಶಾಂತ್ ಇದುವರೆಗೆ 18450 ಎಸೆತಗಳನ್ನು ಎಸೆದಿದ್ದಾರೆ. ಅದರಲ್ಲಿ 9757 ರನ್ ಬಿಟ್ಟು ಕೊಟ್ಟು 303 ವಿಕೆಟ್ ಕಬಳಿಸಿದ್ದಾರೆ.

ಇನಿಂಗ್ಸ್​ನಲ್ಲಿ 74 ರನ್​ಗೆ 7 ವಿಕೆಟ್ ಹಾಗೂ ಮ್ಯಾಚ್​ವೊಂದರಲ್ಲಿ 108ಕ್ಕೆ 10 ವಿಕೆಟ್ ಪಡೆದಿರುವುದು ಇದುವರೆಗಿನ ಶ್ರೇಷ್ಠ ಸಾಧನೆ. ಇನ್ನು 5 ವಿಕೆಟ್​ಗಳ ಗುಚ್ಛವನ್ನು 11 ಬಾರಿ ಪಡೆದಿದ್ದರೆ, 10 ವಿಕೆಟ್​ ಗುಚ್ಛವನ್ನು ಒಂದು ಬಾರಿ ಪಡೆದಿದ್ದಾರೆ.