ಇರ್ಫಾನ್ ಪಠಾಣ್ ಸ್ಪೋಟಕ ಬ್ಯಾಟಿಂಗ್​: ಲಂಕಾ ವಿರುದ್ಧ ಇಂಡಿಯಾ ಲೆಜೆಂಡ್ಸ್​ಗೆ ಭರ್ಜರಿ ಜಯ

ಮುಂಬೈಯ ಡಿವೈ ಪಾಟಿಲ್ ಸ್ಪೋರ್ಟ್ಸ್ ಅಕಾಡೆಮಿಯಲ್ಲಿ ಮಂಗಳವಾರ ನಡೆದ ರೋಡ್ ಸೇಫ್ಟಿ ವರ್ಲ್ಡ್ ಸೀರೀಸ್ 2020 ಟೂರ್ನಿಯ 3ನೇ ಪಂದ್ಯದಲ್ಲಿ ಶ್ರೀಲಂಕಾ ಲೆಜೆಂಡ್ಸ್ ವಿರುದ್ಧ ಇಂಡಿಯಾ ಲೆಜೆಂಡ್ಸ್‌ 5 ವಿಕೆಟ್​ಗಳ ಜಯ ಸಾಧಿಸಿದೆ.

ಟಾಸ್ ಗೆದ್ದ ಇಂಡಿಯಾ ಲೆಜೆಂಡ್ಸ್ ನಾಯಕ ಸಚಿನ್ ತೆಂಡೂಲ್ಕರ್ ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡರು. ಶ್ರೀಲಂಕಾ ಲೆಜೆಂಡ್ಸ್‌ನಿಂದ ನಾಯಕ ತಿಲಕರತ್ನೆ ದಿಲ್ಶನ್ ಹಾಗೂ ರೊಮೇಶ್ ಕಲುವಿತರಣ ತಂಡಕ್ಕೆ ಉತ್ತಮ ಆರಂಭ ಒದಗಿಸಿದ್ದರು.

ತಂಡದ ಮೊತ್ತ 46 ಆಗಿದ್ದ ವೇಳೆ ದಿಲ್ಶಾನ್​ (23) ಬಾರಿಸಿದ ಚೆಂಡನ್ನು ಅದ್ಭುತವಾಗಿ ಕ್ಯಾಚ್ ಮಾಡಿ ಮೊಹಮ್ಮದ್ ಕೈಫ್ ಇಂಡಿಯಾ ಲೆಜೆಂಡ್ಸ್​ಗೆ ಮೊದಲ ಯಶಸ್ಸು ತಂದುಕೊಟ್ಟರು.

ಇದರ ಬೆನ್ನಲ್ಲೇ ರೊಮೇಶ್ ಕಲುವಿತರಣ (21) ಕೂಡ ವಿಕೆಟ್ ಇರ್ಫಾನ್ ಪಠಾಣ್​ಗೆ ವಿಕೆಟ್ ಒಪ್ಪಿಸಿದರು. ನಂತರ ಕ್ರೀಸ್​ಗಿಳಿದ ತಿಲಾನ್ ತುಷಾರ (10) ಚಮರ ಕಪುಗೆದೆರ (23), ಸಚಿತ್ರ ಸೇನಾನಾಯಕೆ (19), ಫರ್ವೀಜ್ ಮೆಹರೂಫ್ (10), ಅಜಂತ ಮೆಂಡಿಸ್ 9 ರನ್‌ ಬಾರಿಸಿದರು. ಈ ಮೂಲಕ ಲಂಕಾ ಲೆಜೆಂಡ್ಸ್​ ನಿಗದಿತ ಓವರ್​ನಲ್ಲಿ 8 ವಿಕೆಟ್ ನಷ್ಟಕ್ಕೆ 138 ರನ್ ಗಳಿಸಿತು.

ಇಂಡಿಯಾ ಲೆಜೆಂಡ್ಸ್​ ಪರ ಮುನಾಫ್ ಪಟೇಲ್ 4 ವಿಕೆಟ್ ಪಡೆದರೆ, ಇರ್ಫಾನ್ ಪಠಾಣ್, ಜಹೀರ್ ಖಾನ್, ಮನ್​ಪ್ರೀತ್ ಗೋನಿ ತಲಾ ಒಂದು ವಿಕೆಟ್ ಉರುಳಿಸಿದರು.

ಶ್ರೀಲಂಕಾ ಲೆಜೆಂಡ್ಸ್ ನೀಡಿದ ಸಾಧಾರಣ ಗುರಿಯನ್ನು ಬೆನ್ನತ್ತಿದ ಸಚಿನ್ ಪಡೆ ಆರಂಭದಲ್ಲೇ ಆಘಾತಕ್ಕೆ ಒಳಗಾಗಿತ್ತು. ಆರಂಭಿಕರಾದ ಸಚಿನ್ ತೆಂಡೂಲ್ಕರ್ ಶೂನ್ಯಕ್ಕೆ ಮರಳಿದರೆ, 3 ರನ್​ ಬಾರಿಸಿ ವೀರೇಂದ್ರ ಸೆಹ್ವಾಗ್ ಕೂಡ ಪೆವಿಲಿಯನ್​ನತ್ತ ಹೆಜ್ಜೆ ಹಾಕಿದರು.

ಆ ಬಳಿಕ ಬಂದ ಸ್ಫೋಟಕ ಬ್ಯಾಟ್ಸ್‌ಮನ್ ಯುವರಾಜ್‌ ಸಿಂಗ್‌ 1 ರನ್ ಗಳಿಸಿ ಚಾಮಿಂಡ ವಾಸ್ ಎಸೆತದಲ್ಲಿ ವಿಕೆಟ್ ಒಪ್ಪಿಸಿದರು. 19 ರನ್​ಗೆ ಪ್ರಮುಖ 3 ವಿಕೆಟ್​ ಕಳೆದುಕೊಂಡ ಇಂಡಿಯಾ ಲೆಜೆಂಡ್ಸ್​ಗೆ ಆಸರೆಯಾಗಿ ನಿಂತಿದ್ದು ಸಂಜಯ್ ಬಂಗಾರ್ ಮತ್ತು ಮೊಹಮ್ಮದ್ ಕೈಫ್.

ತಂಡದ ಸ್ಕೋರ್  62 ಇದ್ದಾಗ ಹೆರಾತ್ ಎಸೆತದಲ್ಲಿ ಬಂಗಾರ್ ವಿಕೆಟ್ ಒಪ್ಪಿಸಿ ಹೊರನಡೆದರು. ಈ ವೇಳೆ ಕ್ರೀಸ್​ಗಿಳಿದ ಎಡಗೈ ದಾಂಡಿಗ ಇರ್ಫಾನ್ ಪಠಾಣ್ ಪಂದ್ಯದ ಗತಿಯನ್ನೇ ಬದಲಿಸಿದರು.

ಶ್ರೀಲಂಕಾ ಲೆಜೆಂಡ್ಸ್​ ಬೌಲರುಗಳನ್ನು ಮನಸೋ ಇಚ್ಛೆ ದಂಡಿಸಿದ ಇರ್ಫಾನ್ ಅರ್ಧಶತಕ ಸಿಡಿಸಿ ಸಂಭ್ರಮಿಸಿದರು. 6 ಬೌಂಡರಿ ಹಾಗೂ 3 ಭರ್ಜರಿ ಸಿಕ್ಸರ್​ನೊಂದಿಗೆ  31 ಎಸೆತಗಳಲ್ಲಿ  57 ರನ್ ಬಾರಿಸಿದರು. ಈ ಸ್ಪೋಟಕ ಇನಿಂಗ್ಸ್​ನೊಂದಿಗೆ ಮಾಜಿ ಆಲ್​ರೌಂಡರ್  18ನೇ ಓವರ್​ಗೆ ತಂಡವನ್ನು ಗೆಲುವಿನ ಗುರಿ ಮುಟ್ಟಿಸಿದರು.

ಇರ್ಫಾನ್ ಪಠಾಣ್​ಗೆ ಮತ್ತೊಂದು ಬದಿಯಲ್ಲಿ ಉತ್ತಮ ಸಾಥ್ ನೀಡಿದ್ದ ಮೊಹಮ್ಮದ್ ಕೈಫ್  46 ರನ್​ಗಳಿಸಿದರು. ಹಾಗೆಯೇ ಆಲ್​ರೌಂಡರ್ ಪ್ರದರ್ಶನ ನೀಡಿದ ಇರ್ಫಾನ್ ಪಠಾಣ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ಈ ಗೆಲುವಿನೊಂದಿಗೆ ರೋಡ್ ಸೇಫ್ಟಿ ವರ್ಲ್ಡ್ ಸೀರೀಸ್ 2020 ಟೂರ್ನಿಯಲ್ಲಿ ಇಂಡಿಯಾ ಲೆಜೆಂಡ್ಸ್ 2ನೇ ಜಯ ಸಾಧಿಸಿದೆ.