IPL ಇತಿಹಾಸದ ಅತ್ಯಂತ ದುಬಾರಿ ಓವರ್ ಯಾರದ್ದು ಗೊತ್ತಾ?

ಐಪಿಎಲ್​ನ 14ನೇ ಸೀಸನ್ ಶುರುವಾಗಲು ಇನ್ನು ಕೆಲವೇ ಕೆಲವು ದಿನಗಳು ಮಾತ್ರ ಉಳಿದಿವೆ. ಕಳೆದ 13 ಸೀಸನ್​ಗಳಲ್ಲಿ ಕ್ರಿಸ್ ಗೇಲ್, ಎಬಿ ಡಿವಿಲಿಯರ್ಸ್, ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಯೂಸುಫ್ ಪಠಾಣ್, ಬ್ರೆಂಡನ್ ಮೆಕಲ್ಲಮ್ ಮತ್ತು ಆ್ಯಡಂ ಗಿಲ್‌ಕ್ರಿಸ್ಟ್ ಸೇರಿದಂತೆ ಹಲವಾರು ಸ್ಫೋಟಕ ಬ್ಯಾಟ್ಸ್‌ಮನ್‌ಗಳು ಐಪಿಎಲ್‌ನಲ್ಲಿ ರನ್ ಸುರಿಮಳೆಗೈದಿದ್ದಾರೆ.

ಅದರಲ್ಲೂ ಕೆಲ ಬೌಲರುಗಳನ್ನು ಬ್ಯಾಟ್ಸ್​ಮನ್ ಉಡೀಸ್ ಮಾಡಿದ್ದರು ಎಂದೇ ಹೇಳಬಹುದು. ಏಕೆಂದರೆ ಟಿ20 ಕ್ರಿಕೆಟ್​ನಲ್ಲಿ ಒಂದೇ ಓವರ್​ ಮೂಲಕ ಇಡೀ ಪಂದ್ಯದ ಫಲಿತಾಂಶವನ್ನು ಬದಲಿಸಬಹುದು. ಹೀಗೆ ದಾಂಡಿಗರ ಆರ್ಭಟದ ಮುಂದೆ ಮಂಕಾಗಿ ಐಪಿಎಲ್​ನ ಅತ್ಯಂತ ದುಬಾರಿ ಓವರ್​ ಎಸೆದ ಬೌಲರುಗಳ ಪರಿಚಯ ಇಲ್ಲಿದೆ.

6- ರಾಜಸ್ಥಾನ್ ರಾಯಲ್ಸ್​ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ನಡುವಣ ಐಪಿಎಲ್​-2020 ಯ ನಾಲ್ಕನೇ ಪಂದ್ಯದಲ್ಲಿ ಲುಂಗಿ ಎನ್​ಗಿಡಿ 30 ರನ್​ಗಳನ್ನು ನೀಡಿದರು. ಕೊನೆಯ ಓವರ್​ ಎಸೆದ ಎನ್​ಗಿಡಿ ಮೊದಲ 4 ಎಸೆತಗಳನ್ನು ಆರ್​ಆರ್ ಬೌಲರ್ ಜೋಫ್ರಾ ಆರ್ಚರ್ ಸಿಕ್ಸರ್​ಗೆ ಅಟ್ಟಿದರು. ಇದರ ಜೊತೆ 2 ನೋಬಾಲ್, 1 ವೈಡ್ ಹಾಗೂ ಮೂರು ಸಿಂಗಲ್ ಜೊತೆ ಒಟ್ಟು 30 ರನ್ ಬಿಟ್ಟುಕೊಟ್ಟರು.

5-ಐಪಿಎಲ್ 2017 ರ ಎರಡನೇ ಪಂದ್ಯದಲ್ಲಿ ರೈಸಿಂಗ್ ಪುಣೆ ಸೂಪರ್‌ಜೈಂಟ್ ವಿರುದ್ಧ ಬ್ಯಾಟ್ ಬೀಸಿದ ಮುಂಬೈ ಇಂಡಿಯನ್ಸ್ ತಂಡದ ಹಾರ್ದಿಕ್ ಪಾಂಡ್ಯ ಅಶೋಕ್ ದಿಂಡಾ ಅವರ ಒಂದೇ ಓವರ್​ನಲ್ಲಿ 30 ರನ್ ಕಲೆಹಾಕಿದ್ದರು. ಈ ಓವರ್​ನಲ್ಲಿ ನಾಲ್ಕು ಸಿಕ್ಸ್​, ಒಂದು ಬೌಂಡರಿ, ಒಂದು ವೈಡ್ ಹಾಗೂ ಒಂದು ಬೈಸ್ ಬಂದಿತ್ತು.

4- 2012 ರ ಐಪಿಎಲ್ ಸೀಸನ್​ನ 21 ನೇ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಪುಣೆ ವಾರಿಯರ್ಸ್ ಇಂಡಿಯಾ ಮುಖಾಮುಖಿಯಾಗಿತ್ತು. ಈ ಪಂದ್ಯದಲ್ಲಿ ಗೇಲ್ ಸ್ಪಿನ್ನರ್ ರಾಹುಲ್ ಶರ್ಮಾ ಅವರ ಓವರ್​ನಲ್ಲಿ ಐದು ಸಿಕ್ಸರ್ ಸಿಡಿಸಿದ್ದರು. ಅಲ್ಲದೆ ಒಟ್ಟು 31 ರನ್​ ಬಾಚಿದ್ದರು.

3- ರವಿ ಬೋಪಾರ: ಐಪಿಎಲ್ 2010 ರ ಸೀಸನ್​ನಲ್ಲಿ ಕ್ರಿಸ್ ಗೇಲ್ ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಪರ ಕಣಕ್ಕಿಳಿಯುತ್ತಿದ್ದರು. ಟೂರ್ನಿಯ 7 ನೇ ಪಂದ್ಯದಲ್ಲಿ ಕೆಕೆಆರ್ ಹಾಗೂ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಮುಖಾಮುಖಿಯಾಗಿತ್ತು. ಪಂಜಾಬ್ ತಂಡದ 13ನೇ ಓವರ್ ಎಸೆಯಲು ಬಂದಿದ್ದು ರವಿ ಬೋಪಾರ. ಇತ್ತ ಕ್ರೀಸ್​ನಲ್ಲಿ ಕ್ರಿಸ್ ಗೇಲ್ ಹಾಗೂ ಮನೋಜ್ ತಿವಾರಿ.

ಮೊದಲ ಎಸೆತದಲ್ಲಿ ಸಿಂಗಲ್ ತೆಗೆದು ಮನೋಜ್ ತಿವಾರಿ ಗೇಲ್​ಗೆ ಸ್ಟ್ರೈಕ್ ನೀಡಿದರು. ನಂತರ ಶುರುವಾಗಿದ್ದೆ ಕ್ರಿಸ್ ಗೇಲ್ ಆರ್ಭಟ. ಹೌದು, ಬ್ಯಾಕ್ ಟು ಬ್ಯಾಕ್ 4 ಸಿಕ್ಸ್ ಸಿಡಿಸಿದ ಗೇಲ್ ಬೋಪಾರ ಓವರ್​ನಲ್ಲಿ ಬೋಪಾರ ಓವರ್​ನಲ್ಲಿ ಒಟ್ಟು 33 ರನ್ ಗಳಿಸಿದರು.

2. ಪರ್ವಿಂದರ್ ಅವನಾ:  2014 ರ ಐಪಿಎಲ್ ಸೀಸನ್​ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು ಕ್ವಾಲಿಫಯರ್​ನಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡವನ್ನು ಎದುರಿಸಿತ್ತು. ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಪಂಜಾಬ್ ತಂಡವು 226 ರನ್​ಗಳ ಬೃಹತ್ ಮೊತ್ತ ಪೇರಿಸಿತು.

ಕಠಿಣ ಗುರಿ ಪಡೆದ ಚೆನ್ನೈ ಸೂಪರ್ ಕಿಂಗ್ಸ್ ಎರಡನೇ ಎಸೆತದಲ್ಲಿ ತಮ್ಮ ಮೊದಲ ವಿಕೆಟ್ ಕಳೆದುಕೊಂಡಿತು. ಬಳಿಕ ಕ್ರೀಸ್​ಗಿಳಿದ ಸುರೇಶ್ ರೈನಾ ಸ್ಪೋಟಕ ಬ್ಯಾಟಿಂಗ್ ಆರಂಭಿಸಿದ್ದರು. ಪಂದ್ಯದ ಆರನೇ ಓವರ್​ನಲ್ಲಿ ಸಿಡಿಲಬ್ಬರ ಬ್ಯಾಟಿಂಗ್ ನಡೆಸಿ ಪರ್ವಿಂದರ್ ಅವನಾ ಅವರನ್ನು ಬೆಂಡೆತ್ತಿದ್ದರು. ಆ ಓವರ್‌ನಲ್ಲಿ ಸುರೇಶ್ ರೈನಾ 5 ಬೌಂಡರಿ ಮತ್ತು 2 ಸಿಕ್ಸರ್​ನೊಂದಿಗೆ ಒಟ್ಟು 33 ರನ್​ ಗಳಿಸಿದ್ದರು.

1. ಪ್ರಶಾಂತ್ ಪರಮೇಶ್ವರನ್:  ಮೇ 8, 2011 ರಂದು, ಐಪಿಎಲ್‌ನ ನಾಲ್ಕನೇ ಸೀಸನ್​ನಲ್ಲಿ ಕೊಚ್ಚಿ ಟಸ್ಕರ್ಸ್ ಹಾಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮುಖಾಮುಖಿಯಾಗಿತ್ತು. ಮೊದಲು ಬ್ಯಾಟ್ ಮಾಡಿದ ಕೊಚ್ಚಿ ತಂಡವು 9 ವಿಕೆಟ್‌ಗಳಿಗೆ 125 ರನ್ ಗಳಿಸಿತು.

ಸಾಧಾರಣ ಗುರಿಯನ್ನು ಬೆನ್ನತ್ತಲು ಆರ್​ಸಿಬಿ ಆರಂಭಿಕರಾಗಿ ಕ್ರಿಸ್ ಗೇಲ್ ಕಣಕ್ಕಿಳಿದಿದ್ದರು. ಇನಿಂಗ್ಸ್​ನ ಮೂರನೇ ಓವರ್​ ಎಸೆಯಲು ಪ್ರಶಾಂತ್ ಪರಮೇಶ್ವರನ್ ಬಂದರು. ಇತ್ತ ಗೇಲ್ ಕೂಡ ರೆಡಿಯಾಗಿ ನಿಂತಿದ್ದರು. ಕೆರಿಬಿಯನ್ ದೈತ್ಯನ ಬ್ಯಾಟಿಂಗ್ ಮುಂದೆ ಯುವ ವೇಗಿ ಟ್ರ್ಯಾಕ್ ತಪ್ಪಿದರು. ಇದನ್ನೇ ಬಳಸಿಕೊಂಡ ಗೇಲ್ ಬ್ಯಾಕ್ ಟು ಬ್ಯಾಕ್ ಸಿಕ್ಸರ್ ಸಿಡಿಸಿದರು. ಅತ್ತ ಪರಮೇಶ್ವರನ್ ನೋ ಬಾಲ್​ಗಳನ್ನು ಎಸೆದು ತಪ್ಪು ಮಾಡಿದರು. ಫಲವಾಗಿ 6 ಸಿಕ್ಸ್, 3 ಬೌಂಡರಿಗಳು ಸೇರಿದಂತೆ ಒಟ್ಟು 37 ರನ್​ಗಳನ್ನು ಗೇಲ್ ಚಚ್ಚಿದರು. ಇದರೊಂದಿಗೆ ಇದು ಐಪಿಎಲ್​ನ ಅತ್ಯಂತ ದುಬಾರಿ ಓವರ್ ಎನಿಸಿಕೊಂಡಿತು.