ಈ ಬಾರಿಯ IPL ರದ್ದಾಗಲ್ಲ: ಈ ತಿಂಗಳಲ್ಲಿ ನಡೆಯಲಿದೆ ರಂಗು ರಂಗಿನ ಕ್ರಿಕೆಟ್ ಟೂರ್ನಿ?

ಕೊರೋನಾ ವೈರಸ್​ನಿಂದ ಕ್ರೀಡಾ ಅಂಗಳ ಸ್ತಬ್ಧವಾಗಿದೆ. ವಿಶ್ವದಾದ್ಯಂತ ಜರುಗಬೇಕಿದ್ದ ಅನೇಕ ಕ್ರೀಡಾಕೂಟಗಳನ್ನು ರದ್ದುಗೊಳಿಸಲಾಗಿದೆ. ಅದರಲ್ಲೂ ಭಾರತೀಯ ಕ್ರಿಕೆಟ್ ಪ್ರೇಮಿಗಳು ಕಾತುರದಿಂದ ಕಾಯುತ್ತಿದ್ದ ಇಂಡಿಯನ್ ಪ್ರೀಮಿಯರ್ ಲೀಗ್​ನ್ನು ಮುಂದೂಡಲಾಗಿದೆ.

ಎಲ್ಲವೂ ಅಂದುಕೊಂಡಂತೆ ನಡೆದಿದ್ದರೆ ಈಗಾಗಲೇ ಐಪಿಎಲ್ ಪ್ರಾರಂಭವಾಗಿ ನಾಲ್ಕೈದು ಪಂದ್ಯಗಳು ಮುಗಿದಿರಬೇಕಿತ್ತು. ಆದರೆ ಕೊರೋನಾ ಭೀತಿ ಹಿನ್ನೆಲೆಯಲ್ಲಿ ಬಿಸಿಸಿಐ ಟೂರ್ನಿಯನ್ನು ಏಪ್ರಿಲ್ 15 ರವರೆಗೆ ಮುಂದೂಡಲಾಗಿದೆ.

ಆದರೆ ದೇಶದಲ್ಲಿ ಕೊರೋನಾ ಸೋಂಕು ಹರಡುವಿಕೆ ನಿಮಿತ್ತ ಏಪ್ರಿಲ್​ನಲ್ಲಿ ರಂಗುರಂಗಿನ ಕ್ರಿಕೆಟ್ ಟೂರ್ನಿ ನಡೆಯುವುದು ಬಹುತೇಕ ಡೌಟ್.

ಹೀಗಾಗಿ ಈ ವರ್ಷದ ಐಪಿಎಲ್​ ಅನ್ನು ರದ್ದುಗೊಳಿಸಬೇಕಾದ ಒತ್ತಡದಲ್ಲಿದೆ ಬಿಸಿಸಿಐ. ಅಲ್ಲದೆ 13ನೇ ಆವೃತ್ತಿಯ ಟೂರ್ನಿಯನ್ನು ಮುಂದಿನ ವರ್ಷ ನಡೆಸುವ ಬಗ್ಗೆ ಕೂಡ ಚಿಂತಿಸಲಾಗಿದೆ.

ಇದರ ಬೆನ್ನಲ್ಲೇ ಇದೀಗ ಇಂಡಿಯನ್ ಪ್ರಿಮಿಯರ್ ಲೀಗ್​ನ್ನು ಇದೇ ವರ್ಷ ಆಯೋಜಿಸಲು ತೆರೆ ಮರೆಯ ಪ್ರಯತ್ನಕ್ಕೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಕೈ ಹಾಕಿದೆ.

ಅಂದರೆ ಈ ವರ್ಷಾಂತ್ಯದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್ ಮುಂದೂಡಿದರೆ ಐಪಿಎಲ್​ನ್ನು ಆಯೋಜಿಸಲು ಸಾಧ್ಯವಾಗಲಿದೆ ಎಂದು ಬಿಸಿಸಿಐ ತಿಳಿಸಿದೆ.

ಒಂದು ಮೂಲದ ಪ್ರಕಾರ ಭಾರತೀಯ ಕ್ರಿಕೆಟ್ ಮಂಡಳಿ, ಇಂಟರ್​ನ್ಯಾಷನಲ್ ಕ್ರಿಕೆಟ್ ಕೌನ್ಸಿಲ್ ಜೊತೆ ಈ ಬಗ್ಗೆ ಚರ್ಚಿಸಿದ್ದು, ಐಸಿಸಿ ನಿರ್ಧಾರದ ಮೇಲೆ ಐಪಿಎಲ್ ನಡೆಯುವ ಸಾಧ್ಯತೆ ಇದೆ.

ಏಕೆಂದರೆ ಈ ಬಾರಿ ಟಿ20 ವಿಶ್ವಕಪ್ ಆಸ್ಟ್ರೇಲಿಯಾದಲ್ಲಿ ನಡೆಯಲಿದೆ. ಅತ್ತ ಆಸ್ಟ್ರೇಲಿಯಾದಲ್ಲೂ ಕೊರೋನಾ ವೈರಸ್ ಮರಣ ಮೃದಂಗವಾಡುತ್ತಿದ್ದು, ಅಲ್ಲಿ ಕೂಡ ಲಾಕ್​ಡೌನ್ ಹೇರಲಾಗಿದೆ. ಈ ಕರ್ಫ್ಯೂ ಮುಂದಿನ ಆರು ತಿಂಗಳವರೆಗೂ ಮುಂದುವರೆಯುವ ಸಾಧ್ಯತೆ ಎಂದು ಹೇಳಲಾಗಿದೆ.

ಹೀಗಾಗಿ ಟಿ20 ವಿಶ್ವಕಪ್ ದಿನಾಂಕದಲ್ಲಿ ಬದಲಾವಣೆಯಾಗುವ ಸಾಧ್ಯತೆ ಹೆಚ್ಚು. ಆಸ್ಟ್ರೇಲಿಯಾ ಕ್ರಿಕೆಟ್ ಬೋರ್ಡ್ ಹಾಗೂ ಐಸಿಸಿ ಒಂದು ವೇಳೆ ವಿಶ್ವಕಪ್​ ಟೂರ್ನಿಯನ್ನು ಮುಂದೂಡಿದರೆ ಐಪಿಎಲ್ ನಡೆಸಲು ಅವಕಾಶವಿದೆ.

ಅಂದರೆ ಟಿ20 ವಿಶ್ವಕಪ್ ದಿನಾಂಕ ಅಕ್ಟೋಬರ್ 18ರಿಂದ ನವೆಂಬರ್ 15ರವರೆಗೆ ಐಪಿಎಲ್ ನಡೆಸಲು ಬಿಸಿಸಿಐ ಸಕಲ ರೀತಿಯಲ್ಲೂ ಸನ್ನದ್ಧವಾಗಿ ನಿಂತಿದೆ.

ಬಹುತೇಕ ಎಲ್ಲಾ ದೇಶಗಳು 6 ತಿಂಗಳವರೆಗೂ ನಿಯಂತ್ರಿತ ಲಾಕ್​ಡೌನ್ ಘೋಷಿಸುವ ಸಾಧ್ಯತೆ ಇದೆ. ಅಂದರೆ ಅಕ್ಟೋಬರ್ ಆರಂಭದಲ್ಲಿ ಲಾಕ್​ಡೌನ್ ಮುಗಿಯಲಿದೆ. ಹೀಗಾಗಿ ಐಸಿಸಿ ಟಿ20 ವಿಶ್ವಕಪ್​ನ್ನು 2021 ಗೆ ಮುಂದೂಡುವ ಸಾಧ್ಯತೆ ಹೆಚ್ಚು.

ಹೀಗಾಗಿ ಈ ಬಾರಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಅಕ್ಟೋಬರ್ ಮತ್ತು ನವೆಂಬರ್ ತಿಂಗಳಲ್ಲಿ ನಡೆಯಲಿದೆ ಎಂದೇ ಹೇಳಲಾಗುತ್ತಿದೆ.

ipl